ပ္ဍဲလ္တူဂၠံင်ဇၞော်ဂြိပ်တရဴဇမ္ၚောဲ ဇြူဘာန်ၝုရဳ၊ ကၟိန်ဍုင်သေံဝွံ ကွဳစက် (Van) ကၠတ်ဖ္ဍိုက်ပၠောပ်နင် ကောန်ဍုင်ဗၟာဟွံလုပ်သၞောဝ် (၄၃) တၠ မွဲဖ္ဍိုက်ဂှ် ဗကပ်အာတုဲ ဗၠာဲသၟိင်သေံတံ ရပ်ဂွံလဝ်ရောင် ဂွံတီကေတ်ရ။
ကွဳစက် (Van) ဒှ်သံသယ မဖ္ဍိုက်ပၠောပ်နင်ကောန်ဍုင်ဗၟာမွဲဖ္ဍိုက်ဂှ် ဂကောံဒပ်ဗၠာဲသၟိင်သေံတံ ဗဒေံါသွက်ဂွံစၟဳစၟတ်ဂှ် ဒဳဂြိပ်တိတ်အာမွဲအသိင် စဵုကဵု (၆၀) ကဳလိုဝ်မဳတာပြင်ရ။
အဃောဂိုတ်ဂ္စာန် သွက်သ္ဂောံက္လေင်ဂေတ်သ္ပဝ်ဂၠံင်ဍာန် ပ္ဍဲကြပ်ပွိုင်ဍုင်ဘိုဝ်ဖလောင်၊ ခရိုင်ကာန်ချဏၝုရဳဂှ် အသိင်လောန်အာဂှ်ရ က္လေင်ထိင်ဟွံမာန်မွဲသာ် ဗကပ်အာတုဲ ညးဒဳကွဳစက်ဂှ် တၟာတ်ဆိုအ်မံင် ပ္ဍဲကွဳစက်ရ။
ကာလစၟဳစၟတ် အပ္ဍဲကွဳစက် (Van) ဂှ်ဝွံ သၟာကမၠောန်ကောန်ဍုင်ဗၟာဟွံလုပ်သၞောဝ် ညးတြုံ (၃၂) တၠ၊ ညးဗြဴ (၁၁) တၠ သီုဖအိုတ် (၄၃) တၠတံဂှ် ဂွံဆဵုကေတ်တုဲ ထ္ၜးလိက်သဳ ပရေင်မၞိဟ်လုပ်တိတ်ဗဗွဲသၞောဝ် ဟွံမာန်ရ။
အတိုင်စၟဳစၟတ်ဂၠိုက်ဂၠာဲလဝ်ဂှ်မ္ဂး ယင်သၟာကမၠောန်ဂမၠိုင်ဂှ်ဝွံ နူဂၠံင်ဂြိုပ်သဘာဝ သင်ခဠၝုရဳ၊ ခရိုင်ကာန်ချဏၝုရဳ မွဲတဆံင်ဂှ် လုပ်စိုပ်ကၠုင် အပ္ဍဲကၟိန်ဍုင်သေံတုဲ ညးလ္ၚဵုတံဂှ် သွက်ဂွံအာစိုပ်ကၠောန်ကမၠောန် ဇရေင်ကၟိန်ဍုင်မလေဝ်ယှာတေံရောင် ဂွံတီကေတ်ရ။ ညးမွဲတၠမ္ဂး ဒးကဵုစရိတ်ကွဳစက် နူ (၉၆၀၀၀) ၝာတ် စဵုကဵု (၁၀၀၀၀၀) ၝာတ်တုဲ တၠကမၠောန်ပ္တိတ်ကဵုလဝ်ရ။
အတိုင်ညးဒဳကွဳစက် ဟီုပ္တိတ်လဝ်ဂှ်မ္ဂး သွက်ဂွံပလံင်ဗ္စိုပ် သၟာကမၠောန်ဟွံလုပ်သၞောဝ်တံ ဇရေင်ဍုင်ဟာတ်ယာဲဂှ် ဒုင်လိင်လဝ်နကဵုသြန်တုဲ ယဝ်လၟေင်တရဴအံင်ဇၞးမ္ဂး ညးမွဲမွဲတၠဂှ် ကလိဂွံသြန် (၂၅၀၀) ၝာတ်ရောင် ဒုင်လဝ်ဝန်ရ။
အခိင်လၟုဟ်ဏံဝွံ ဗၠာဲသၟိင်တံ ပံက်လဝ်အမှုကဵု ညးဒဳကွဳစက် နရီုဗင်ကဵုဇြဟတ် ကုညးလုပ်စိုပ်ဟွံလုပ်သၞောဝ်ဂှ်တုဲ ကုသၟာကမၠောန်ဗၟာ (၄၃) တၠဂှ်လေဝ် သွက်ဂွံကေတ်အရေဝ် နကဵုအမှုလုပ်စိုပ်ကၠုင်အပ္ဍဲကၟိန်ဍုင် ဟွံလုပ်သၞောဝ်ဂှ် လှောဲပအပ်လဝ်ကဵု ညးတာလျိုင်စၟဳစၟတ်ဂၠိုက်ဂၠာဲတံရ။
သၟာင်နူဂှ်ပၠန် ပ္ဍဲကဵုဇာနှိက်ကၠတ်လုပ်လၟုဟ်ဏံဝွံ ညးပါလုပ်ဆေင်စပ်သီုဖအိုတ်တံဂှ် ဆက်ဂၠိုက်ဂၠာဲစၟဳစၟတ် ဓမံက်ပ္တိတ်အာရောင် ဂွံတီကေတ်ရ။
