လိက်ပရေၚ် – နံၚ်ယျိုဝ်
သၟတ်အပ္ဍဲဍုၚ်တံ ဒုၚ်ဖအိုတ်သြန်ကဵုကၠံကိုဋ်ဒကေဝ်တုဲ ညးတိတ်အာနကဵုသွပ်လပအ် အခေါၚ်ကၠောန်ကမၠောန်ဍုၚ်မ္ၚးတံဝွံ လက္ကရဴအိုတ် ပ္ဍဲကဵုရုၚ်စက်ဍုၚ်ဇိုၚ်ဝုတ်ဒိုဟ်မွဲရုၚ်ဂှ် ခတှ်ဂေတ်ကၠောံတုဲ ပရူဒဒှ်ဒးရုန်ဂ္စာန်မံၚ်ဘဝ ဗွဲမကြေပ်ဂြတ်ဂှ် တ္ၚဲဏံ အကြာသၟတ်တိတ်ဍုၚ်မ္ၚးတံ ဒှ်ကၠုၚ်သာဓက အရာဒးလေၚ်ဇွောဝ်မွဲရ။
အကာဲအရာ အခိၚ်လၟုဟ်ဏံဝွံ မိက်ဂွံတိတ်ဗလး နူဇြဟတ်ဓရိုဟ်ဒးယိုက်ဝန်ပၞာန်ကဵု ပရေၚ်ကြေပ်ဂြတ်စသုၚ်မံၚ်စံၚ်ဂှ်ရ သၟတ်ဗွဲမဂၠိုၚ် ရုဲစှ်ဂၠံၚ်ဍာန်တိတ်ဍုၚ်မ္ၚးဂၠိုၚ်ကၠုၚ်ရောၚ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ISP Myanmar ရ။
သွက်ဂွံတိတ်ဍုၚ်မ္ၚးမာန်ဂှ်မ္ဂး ပတှေ်ဖျေံစိုတ် အေဂျေန်ဇြဳဂမၠိုၚ်ကဵု ဃံၚ်စအကြာ (ပွဲစား) ဂမၠိုၚ်တုဲ ညံၚ်ဂွံအာစိုပ် မပ္တံဍုၚ်သေံ၊ မလေဝ်ယှာ၊ သေၚ်ကာပေါဝ်၊ ဂျပါန်တံဂှ် ရုဲစှ်ကၠုၚ် ဇၞော်ကဵုဇြဟတ်ရ။
ၜိုန်ဂှ်ကီုလေဝ် လက္ကရဴဓဝ်ပတှေ်ဗၠေတ်မှာမွဲဂှ် သွပ်လပအ်ဂမၠိုၚ် လီုလာ်အာတုဲ ဒးဆဵုဂဗ ဘဲအန္တရာဲ ဗၠိုက်တၞီမံၚ်ကဵုခတှ်ရ။
လိက်ပရေၚ်ဏံဝွံ နကဵုသၟတ်ဂိုတ်ဂ္စာန်ဒၟံၚ် သွက်သ္ဂောံကၠောန်ကမၠောန်ပ္ဍဲဍုၚ်မ္ၚးတံ ညံၚ်ဟွံဂွံစိုပ်အာ အပ္ဍဲဒၞက်လှေံလှန်လီဠာန်ဂှ်ကဵု ညံၚ်ဂွံရုဲစှ်ဂၠံၚ်ဍာန်ဗွဲမဍာံပြမာန်ဂှ် ရန်တၟံတုဲ ချူဏာလဝ် နဒဒှ်ဆဝ်မ္ၚုဟ်ကဵုသတိရ။
⬛ပရေၚ်တံၚ်ဂြဲ နူဇာနှိက်ပရေၚ်မၞိဟ် ကေုာံ ဒၞက်ပ္ဍဲဗလးတိ ………
“အရေဝ်ဘာသာ ဟွံဒးနွံပၟိက် (ဟွံဒးကေတ်) မွဲသာ် ကော်ဗွဲမပြဟ်ရောၚ်” ၊ “တၚ်ဒုၚ်လျိုၚ် ကမၠောန်ကၟိတ်နွံရ” ၊ “ဟွံဒးနွံပၟိက် (ဟွံဒးကေတ်) ပရေၚ်ဆဵုဂဗကမၠောန်” မပ္တံလိက်လလောၚ်တံၚ်ဂြဲသာ်ဏံဂှ် ဇၟာပ်တ္ၚဲ ဂွံဆဵုကေတ်ဒၟံၚ် ပ္ဍဲ Facebook၊ Telegram ကေုာံ TikTok တံရ။
သွက်သၟတ်မိက်ဂွံစိုပ် အနာဂတ် ခိုဟ်ခိုဟ်/ပြဟ်ပြဟ်တံဝွံ ယၚ်ဝေါဟာတံၚ်ဂြဲဂမၠိုၚ်ဂှ် ထေၚ်ကေတ်အခေါၚ်အရာမွဲကီုလေဝ် ဒှ်ဒၞက်လီဠာန် ဘဝဂွံလီုလာ်မွဲမာန်ဍာံဍာံရ။
ဟိုတ်နူလိက်လလောၚ်သာ်ဝွံတုဲ မဒးစိုပ်အာ ဇရေၚ်ဂိုဏ်လီဠာန်သြန်ကျာဖျမာန်တုဲ ပရေၚ်လီဠာန်သြန် နူအေဂျေန်ဇြဳဟွံလုပ်သၞောဝ်ကီု၊ ပရေၚ်လီဠာန်လိက်ကသုက် ကေုာံ ဗွိုၚ်ကမၠောန်ဟွံဍာံပြကီု ကတဵုဒှ်မံၚ်ရ။
သၞာံ (၂၀၂၄) တုဲကၠုၚ်တေံဝွံ သွက်သ္ဂောံကၠောန်ကမၠောန်ပ္ဍဲဍုၚ်ဂျပါန်ဂှ် သၟတ် နူတွဵုရးဍုၚ်မန် ၊ ဍုၚ်လ္ဂုၚ် ကေုာံ နူဍုၚ်ဗၟာသ္ကုတ်လ္တူကီု သီုဖအိုတ် ၜိုတ် (၂၀) တံဂှ် ဒးဒုၚ်ပလံၚ်ဏာလဝ် ပ္ဍဲဍုၚ်သေံတုဲ ပရူဒဒှ်ဒးဒုၚ်ထပိုတ်လဝ်အဆက်စၠောံဂှ်လေဝ် ယၟုဇၞော်ဒယှ်တှ်မံၚ် ပ္ဍဲဇာနှိက်ပရေၚ်မၞိဟ်ရ။
အတိုၚ်ဌာန်ပရိုၚ်ဗၠးၜးမန် IMNA သၟာန်သၟုက်လဝ်ဂှ်မ္ဂး အပ္ဍဲကဵုသၟတ် (၂၀) တၠဂှ် သၟတ်ဗြဴမန်ပါလုပ် (၁) တၠတုဲ ဟိုတ်နူဒးဒုၚ်လီဠာန်ဂှ်ရ ဒးကၠောန်မံၚ်ကမၠောန်ပ္ဍဲဍုၚ်သေံ နဒဒှ်သၟာကမၠောန်သဇိုၚ်မွဲတၠဟေၚ်တုဲ စဵုကဵုတ္ၚဲဏံ ဒးပသောၚ်မံၚ် ကိစ္စလျိုၚ်ခတှ်ဖိုဟ်ရောၚ် ဂွံတီကေတ်ရ။
အေဂျေန်ဇြဳကမၠောန်ကၟိတ်ဍုၚ်မ္ၚး Su Latt Myint Mo Services Agency ကေုာံ Nay Won Kabar Agency တံဝွံ နူသၞာံ (၂၀၂၅)၊ ဂိတုအေဗရဴဂှ်ရ အံၚ်ဇၞး အေန်တာဗျူ ကမၠောန်ကၟိတ်ဂျပါန်ဂးတုဲ ကေတ်သြန် နူကဵုသၟတ် (၁၀၀၀) ပြၚ် ညးမိက်ဂွံအာဂျပါန်တံဂှ်တုဲ ထပိုတ်အဆက်လီဠာန်ကၠုၚ်လဝ်နွံရ။
တုပ်တဴအေဂျေန်ဇြဳတံကီု နကဵုပရေၚ်ဆက်စၠောံဃံၚ်စအကြာ (ပွဲစား) တုဲ သၟတ်လုပ်စိုပ်ကၠုၚ် အပ္ဍဲဍုၚ်သေံ ဟွံလုပ်သၞောဝ်ဗွဲမဂၠိုၚ်တံဂှ်လေဝ် ဒးဒစးဒုၚ်ကဵုသြန်တုဲဂှ် ဒးဒုၚ်ကၠဟ်ထောံလဝ် ညံၚ်ညးကေတ်လျိုၚ်ဟွံမွဲဂှ်ရ ဒးဒုၚ်ရပ်ကဵု ညးတာလျိုၚ်ဍုၚ်မွဲလ္ပာ်တေံ အဆက်ဆက်နွံရ။
အဃောဂၠာဲမံၚ်ဂၠံၚ်ဍာန်ဂှ်ရ သွပ်လပအ်သၟတ်ဂမၠိုၚ်တံဝွံ ဒးဒုၚ်လီဠာန်ကဵု ဃံၚ်စအကြာ ကေုာံ ဟိုတ်နူအေဂျေန်ဇြဳ မကၠောန်သ္ပညံၚ်ဟွံမွဲကဵုတာလျိုၚ်ဂှ်ရ ဒးဆဵုဂဗမံၚ်ကဵု အနာဂတ်ပရေံပရေံဟေၚ်ရ။
⬛သၟတ်တိတ်ဍုၚ်မ္ၚးဂမၠိုၚ် မုဟိုတ်ဒှ်မၞိဟ်သ္ဒးဒုၚ်သ္ပဒၞန်ရော ………
သြန်ဂိတုအပ္ဍဲဍုၚ်အောန်၊ အခေါၚ်အရာ ကမၠောန်ကၟိတ်အောန်၊ စိုတ်ထတ်ကဵု သွက်ဂွံတိတ်ဍုၚ်မ္ၚး ကေုာံ ပတှေ်ဖျေံစိုတ် လ္တူညးတၞဟ်ဂၠိုၚ်လောန်အာ မဒှ်ရ။
သွက်ပရေၚ်စသုၚ်မံၚ်စံၚ်သ္ၚိကၟိန် ဂွံပြေပြံၚ်ဂှ်မ္ဂး အပ္ဍဲအခိၚ်ဂၠေံဂၠေံ စိုတ်ဆန္ဒ မိက်ဂွံဂွံသြန်လုပ်ဂၠိုၚ်/ခိုဟ်ဂှ်ရ ဟွံလ္ၚတ်ဂၠိုက်ဂၠာဲမွဲသာ် အတိုၚ်ဒးဒုၚ်တံၚ်ဂြဲလှေံလှန်ဂှ် ဗက်အာလက္ကရဴ ဗွဲမလောဲသွာလေပ်ရ။
တုဲပၠန် ဟိုတ်နူဒးဆဵုဂဗ တၚ်ခက်ခုဲ ပ္ဍဲဂၠံၚ်တရဴလုပ်သၞောဝ်ဂှ်ကဵု နူကမ္မယှေန်ပၞာန် သၞောတ်ဗ္ၜတ်ထောံ ဆေၚ်ကဵုအခေါၚ်တိတ်ဍုၚ်မ္ၚးဂှ်တုဲ သၟတ်လ္ၚဵုတံ ရုဲစှ်ကၠုၚ် ဂၠံၚ်ဟွံလုပ်သၞောဝ်ဂှ်ရ။
ဂၠံၚ်တရဴလုပ်သၞောဝ် ဍန်ဂြက်ကၠုၚ်ဗက်ဟွံဂတာပ် ဒးဗဒဗဒဲါ ဒးပတှေ်ကၠုၚ် ဃံၚ်စအကြာကဵု ဂကောံဒုၚ်အကြာတံ ဂၠိုၚ်ကၠုၚ်ရ။
ယၚ်အကာဲအရာဂမၠိုၚ်ဂှ်ဝွံ တုပ်ညံၚ်ရဴကဵုဇြဟတ် ကုသၟတ်ဂမၠိုၚ် ဒးဒုၚ်လီဠာန်ဂၠိုၚ်ကၠုၚ်ရောၚ်ဂှ် ဂကောံသၟတ် မပလေဝ်ပလေတ်မံၚ် သွက်ဂွံတိတ်ဍုၚ်မ္ၚးတံ သ္ၚဳဂၠိပ်လဝ်ရ။
⬛နဲကဲစကာနတဲ သ္ဂောံဗၠးနူဘဲလီဠာန် ………
နကဵုသၟတ် ပလေဝ်ပလေတ်ဒၟံၚ် သွက်ဂွံတိတ်ဍုၚ်မ္ၚးတံဝွံ အေဂျေန်ဇြဳ ဇကုပတှေ်တုဲ ပအပ်ကဵုသြန်ဂှ်ကီု (ဝါ) လာၚ်ဇြေန်ကမၠောန်လုပ်သၞောဝ် ဃံၚ်စအကြာ နွံ/ဟွံမွဲကီုဂှ် ဗွဲကိုပ်ကၠာ ဒးစၟဳစၟတ်ထေက်ရောၚ် ဂကောံပရေၚ်ပညာဂျပါန် (မန်ပုညကာရဳ) ဖ္တိုက်ဖၟောဝ်လဝ်ရ။
သၟာၚ်နူဂှ်ပၠန် ဝၚ်လက္ကရဴဂကောံတံဂှ်၊ ပရေၚ်ဆဵုဂဗကမၠောန် မရေၚ်တၠုၚ်လဝ်ကိုပ်ကၠာတေံ၊ အပ္ဍဲဗွိုၚ်ပရေၚ်မၞိဟ်ဂှ် ပတှေ်ဖျေံစိုတ် ဂွံ/ဟွံဂွံဂှ်လေဝ် ဒးလ္ၚတ်ဂၠိုက်ဂၠာဲကီုရောၚ် ကဵုလဝ်ကသပ်ရ။
တုဲပၠန် မပ္တံပရေၚ်ပညာ၊ ကမၠောန်ကၟိတ် ကေုာံ ဂကောံရီုဗၚ်မၞိဟ် ကုဍုၚ်ဇကုမိက်ဂွံအာစိုပ်ဂှ် ကေတ်အဆက်စၠောံတိုက်ရိုက်တုဲ တၚ်နၚ်မိက်ဂွံတီဂှ် ဒးသၟာန်သၟုက်ကီု၊ အေဂျေန်ဇြဳ ကေုာံ ဃံၚ်စအကြာ လ္တူအန်လာၚ် တၚ်နၚ်တမ်ရိုဟ် ဟွံကၠးဖ္ဍးတံဂှ် လ္ပပတှေ်လောဲလောဲညိဂှ်လေဝ် ကဵုလဝ်သတိရ။
ဇၟာပ်လလောၚ်ဇြဟတ်တံၚ်ဂြဲခိုဟ် လ္တူဇာနှိက်ပရေၚ်မၞိဟ်တံဂှ် ဒှ်အခေါၚ်အရာဍာံပြရောၚ် ဟီုဟွံမာန်တုဲ တၚ်သ္ဂုတ်သွာတ်ပြဟ်ပြေဟ်မြက်ဇက်မွဲဏံဂှ်ဝွံ သကဵုဇီုကပိုက်အာ အလုံအနာဂတ်မွဲမာန်ရ။
ဟိုတ်ဂှ်ရ ယွံ သၟတ်ဂမၠိုၚ်တံဝွံ သွက်ဂွံဓမံက်ရုပ်ရဴ သွပ်လပအ်ဂှ် လ္တူနူဃရက်ဃဗက် (ဂရက်ဂဗက်) ဂှ်မ္ဂး ညံၚ်ဂွံရုဲစှ်ဂၠံၚ်တရဴဍာံပြမာန်ဂှ်ဟေၚ် သာတုဲကိစ္စဇၞော်ရောၚ်။
