မွန်သတင်းအေဂျင်စီ (၂၅ ဇူလိုင် ၂၀၂၂)
အမည်မသိမွန်လက်နက်ကိုင်အဖွဲ့က မွန်ပြည်နယ် ရေးတောင်ပိုင်း ရင်းရဲကျေးရွာအုပ်စု ရင်းဒိန်းရွာသို့ ယမန်နေ့ညနေပိုင်းအချိန် ရောက်ရှိလာပြီး ရွာသားတစ်ဦးကို ဖမ်းဆီးရိုက်နှက်ညှင်းပမ်း၍ ငွေအတင်းအဓမ္မတောင်းခံယူဆောင်သွားကြောင်း စုံစမ်းသိရှိရသည်။
အင်အား ၆ ယောက်ခန့်ရှိသည့် ဘက်တံဆိပ်မပါ စစ်ယူနီဖောင်းဝတ် မွန်လက်နက်ကိုင်အဖွဲ့က ဇူလိုင် ၂၄ ညပိုင်းတွင် ရင်းရဲရွာသို့ဝင်ရောက်လာပြီး နိုင်ချွဲ အသက် (၅၇) နှစ်ခန့်ကို ဖမ်းဆီးခေါ်ဆောင်သွားကြောင်း၊ နိုင်ချွဲ ရိုက်နှက်ညှင်းပမ်းနှိပ်စက်ခံရသဖြင့် ခန္ဓာတစ်ကိုယ်လုံးနေရာအနှံ့ ဒဏ်ရာရရှိခဲ့ကြောင်း၊ နိုင်ချွဲထံမှ ငွေ ၁၀ သိန်းတောင်းသော်လည်း ချက်ချင်းပေးဆောင်ရန်ငွေမရှိသဖြင့် အိမ်နီးနားချင်းများထံမှ အရေးပေါ်ချေးယူ၍ ငွေသား ၂ သိန်းတိတိ အဆိုပါလက်နက်ကိုင်အဖွဲ့ကို ပေးဆောင်လိုက်ရကြောင်း သိရသည်။
အဆိုပါအမည်မသိလက်နက်ကိုင်အဖွဲ့ အင်အား ၅-၆ ယောက်ခန့် ရင်းရဲရွာသို့ ဝင်ရောက်လာကြောင်း ရေးတောင်ပိုင်းသို့ရောက်ရှိနေသော မွန်ပြည်သစ်ပါတီ အရာရှိတစ်ဦးက မွန်သတင်းအေဂျင်စီသို့ ပြောသည်။
သို့ရာတွင် အင်အား ၃၀ ကျော်ရှိ အမည်မသိမွန်လက်နက်ကိုင်အဖွဲ့ ရင်းရဲရွာသို့ ဝင်ရောက်၍ မူးယစ်ဆေးဝါးရောင်းချသူများကို ဝင်ရောက်ဖမ်းဆီးခဲ့ကြောင်း လူမှုကွန်ယက်စာမျက်နှာတချို့က မွန်ဘာသာဖြင့် ရေးသားနေသည်ကို တွေ့ရသော်လည်း အဆိုပါလက်နက်ကိုင်အရေအတွက်ကို မွန်သတင်းအေဂျင်စီက သီးခြားအတည်ပြုနိုင်ခြင်းမရှိပေ။
