မွန်သတင်းအေဂျင်စီ (၁၈ ဇွန် ၂၀၂၁)
မော်လမြိုင်မြို့ မြိုင်သာယာရပ်ကွက်ရှိ အလက (၆) စာသင်ကျောင်းတွင် ယမန်နေ့ည ၉ နာရီအချိန်ခန့်က ဗုံးဟုယူဆရသော ပေါက်ကွဲသံကြီးတစ်ခုဖြစ်ပေါ်ခဲ့သော်လည်း ထိခိုက်ပျက်စီးမှုမရှိကြောင်း စာသင်ကျောင်းအနီးပတ်ဝန်းကျင်နေသူများထံမှ သိရသည်။
“ဗုံးပေါက်တာက ည ၉ နာရီအချိန်လောက်မှာ၊ ကျောင်းဝင်းထဲမှာပဲ ပေါက်တယ်။ ခဏနေတော့ ရဲတွေ စစ်သားတွေ အများကြီးရောက်လာကြပြီးတော့ စစ်ဆေးနေကြတယ်၊၊ အသံဗုံးလား ဘာဗုံးလဲ ဘာမှမသိရပါ” ဟု ၎င်းက ဆိုသည်။
အဆိုပါဗုံးပေါက်ကွဲမှုဖြစ်သည်အပေါ် မည်သူ၊ မည်သည့်အဖွဲ့အစည်းလက်ချက်ဖြစ်ကြောင်း မသိရှိရပေ။
ထို့အတူ ရေးမြို့၊ အောင်မေတ္တာရပ်ကွက်၊ အလက(၂)ကျောင်းရှေ့တွင် ဇွန်လ ၁၄ ရက်နေ့၊ ညနေ ၃ နာရီ ကျောင်းဆင်းချိန်တွင် ဆိုင်ကယ်စီးသေနတ်သမားတစ်ဦး ပစ်ခတ်မှုကြောင့် မော်တော်ကားလမ်းရှင်းပေးသော ရပ်ကွက်အုပ်ချုပ်ရေးမှူးလက်တွင်ထိမှန်၍ ရပ်မိရပ်ဖတစ်ဦး နားထင်၌ သေနတ်ထိမှန်သေဆုံးခဲ့ကြောင်း မြို့ခံများမှ သိရသည်။
စစ်ကျွန်ပညာရေးသင်ကြားပေးနေသည့် စာသင်ကျောင်းများသို့ မတက်ကြရန် စစ်ကောင်စီကိုဆန့်ကျင်နေသည့် အင်အားစုတချို့က တိုက်တွန်းမှုများရှိခဲ့သလို ဗုံးဖောက်ခွဲမည့် ခြိမ်းခြောက်ပြောဆိုမှုများကိုလည်း လူမှုကွန်ရက်စာမျက်နှာများပေါ်တွင် တွေ့ရှိနေရသည်။
၂၀၂၁-၂၀၂၂ ပညာသင်နှစ်ကို ဇွန်လ ၁ ရက်နေ့မှစ၍ စာသင်ကျောင်းများ စတင်ဖွင့်လှစ်ခဲ့ရာတွင် နိုင်ငံတဝန်း သေနတ်ပစ်ခတ်မှုနှင့် ဗုံးပေါက်ကွဲမှု မကြာခဏဖြစ်ပေါ်ခဲ့သည့်အတွက် ကျောင်းသူ/သားများ၏ လုံခြုံရေးအတွက် ကျောင်းသားမိဘများက စိုးရိမ်နေရကြောင်း တွေ့ရှိရသည်။
စစ်အာဏာသိမ်းပြီးကာလမှစတင်၍ မော်လမြိုင်မြို့ပေါ်နေရာများတွင် ဗုံးပေါက်ကွဲမှု၊ ဗုံးတွေ့ရှိမှုများ လစဉ်ဖြစ်ပေါ်ခဲ့သည်။
