ဆရာတော၏ကြွင်းကျန်ရုပ်ကလာပ်အား ဝင်းစိန်တောရကျောင်းသို့ ယနေ့ညနေပိုင်းတွင် သယ်ဆောင်လာရာ ရပ်ဝေးရပ်နီးဒါယကာအများအပြား လာရောက်စောင့်ကြိုနေကြောင်း သိရသည်။
“မော်လမြိုင်ကို ရောက်နေပြီးလို့ ကြားတယ်။ ခဏနေ မိနစ် ၂၀ လောက်ဆိုရင် ဝင်းစိန်ကို ရောက်လာတော့မယ်” ဟု ဆရာတော်အား သွားရောက်ကြိုဆိုသူ မုဒုံမြို့မှ မမော်က ပြောသည်။
ကားလမ်းကြီးနံဘေးဝဲယာမှ ရတနာတောင်ဝင်းစိန်တောရကျောင်းအထိ လာရောက်ဖူးမျှော်သူများဖြင့် ပြည့်နေကြောင်း မမော်က ပြောသည်။
ဆရာတော်အား ညနေ ၄ နာရီခန့်တွင် ရန်ကုန်မှ ပြန်လည်သယ်ဆောင်လာခဲ့ပြီး ယနေ့ ည ၉ နာရီခန့်မှ ဆရာတော်ရုပ်ကလာပ်အား မြိုင်ကုန်းကျေးရွာတွင် စောင့်ကြိုနေကြကြောင်း ဆရာတော်၏ ဒါယကာတစ်ဦးက ပြောသည်။
ဆရာတော်သည် ယမန်နေ့ ဧပြီလ ၂၅ ရက်နေ့ ညနေ ၃ နာရီခန့်တွင် နှလုံးအမောဖောက်သဖြင့် ဆေးဝါးကုသရန် ရန်ကုန်သို့ တင်ဆောင်သွားကြောင်း ၄င်းဒါယကာက ပြောသည်။
၂၀၁၄ ခုနှစ်တွင် ဆရာတော်အား အဘိဓဇ အဂ္ဂမဟာသဒ္ဓမ္မဇောတိက ဘွဲ့တံဆိပ်တော်ကို နိုင်ငံတော်က ချီးမြင့်ခဲ့သည်။
အတောင် ၄၀ဝ ပြည့် ဇိနသုခရန်အောင်ချမ်းသာကမ္ဘာ့အကြီးဆုံးလျောင်းတော်မူဘုရားကို ၁၉၉၂ ခုနှစ်တွင်၄င်း၊ အတောင် ၆၀ဝ ပြည့်လျောင်းတော်မူ ဘုရားကို ၂၀၁၀ ခုနှစ်တွင်၄င်း ဆရာတော်က အုတ်မြစ်ချခဲ့သည်။
ဆရာတော်၏ သက်တော် ၉၄ နှစ်ပြည့် မွေးနေ့မင်္ဂလာကို ၂၀၁၅ ခုနှစ် ဇန်နဝါရီလ ၁၄ ရက်နေ့တွင် ကျင်းပပြုလုပ်ခဲ့ပြီး ပျံလွန်တော်မူချိန်တွင် ရဟန်း ၄၅ ဝါရှိပြီဟု သိရသည်။
