လွတ်လပ်သောမွန်သတင်းအေဂျင်စီ – မွန်ဒေသလုံးဆိုင်ရာဒီမိုကရေစီပါတီဝင် ၃ ဦးတို့သည် အခြားနိုင်ငံရေးပါတီခြောက်ဖွဲ့မှ ပါတီဝင်များနှင့်အတူ ယနေ့ဇူလိုင်လ ၂ ရက်နေ့တွင် ဂျပန်နိုင်ငံသို့သွားရောက်လေ့လာမည် ဖြစ်သည်။
“ကျနော်နဲ့အတူ ကျနော်တို့ပါတီဝင်လူငယ်တွေဖြစ်ကြတဲ့ မိစန္ဒာဝန်းနဲ့ မင်းညွန့်ရီတို့ပါဝင်တယ်” ဟု မွန်ဒေသလုံးဆိုင်ရာဒီမိုကရေစီပါတီမှ အမျိုးသားလွှတ်တော် နိုင်မျိုးတင့်လွင် (ခေါ်) ကိုသားကြီးက ပြောသည်။
အဆိုပါခရီးစဉ်ကို ဂျပန်-မြန်မာ ချစ်ကြည်ရေးအသင်းနှင့် ဂျပန်- မြန်မာပါလီမန်များ ချစ်ကြည်ရေးအသင်းက ဖိတ်ကြားခဲ့ပြီး ပြည်ခိုင်ဖြိုးပါတီမှဦးဆောင်သည်ဟု အထွေထွေအတွင်းရေးမှူးဦးဌေးဦး၏ ပြောကြားချက်ကို Eleven Media Group အင်တာနက်သတင်းတွင် ဖေါ်ပြထားသည်။
ခရီးစဉ်အတွင်း ဂျပန်နိုင်ငံရှိ နိုင်ငံရေးပါတီအသီးသီးမှ လွှတ်တော်ကိုယ်စားလှယ်များ၊ လူမှုရေးအဖွဲ့အစည်းများနှင့် တွေ့ဆုံမည်ဖြစ်သည့်အပြင် ဂျပန်နိုင်ငံလွှတ်တော်အတွင်းသို့လည်း သွားရောက်လေ့လာမည်ဟု သိရသည်။
ထို့အတူ ယမန်နှစ်တွင်လည်း နိုင်ငံရေးပါတီခြောက်ပါတီမှ ပါတီဝင် ၂၀ ဦးတို့ ဂျပန်နိုင်ငံသို့လေ့လာရေးခရီး သွားရောက်ခဲ့ရာတွင် မွန်ဒေသလုံးဆိုင်ရာဒီမိုကရေစီပါတီအဖွဲ့ဝင် လူငယ် ၂ ဦးလည်းပါဝင်ခဲ့သည်။
