စစ်အာဏာရှင်စနစ်အမြစ်ပြတ်ခြေမှုန်းရေးအတွက် တိုက်ပွဲဝင်နေသော တပ်ဖွဲ့နှင့် ရေးဘီလူးအဖွဲ့အမည်ခံထားသူများမှ အသေးစားလုပ်ငန်းရှင်များထံ ငွေကြေးတောင်းမှုလုပ်ဆောင်နေကြောင်း ရေးဒေသခံများ၏ ပြောပြချက်အရ သိရသည်။
အထူးသဖြင့် ဆက်သွယ်ရန် ဖုန်းနံပါတ်များကို လူထုထံ ဖြန့်ဝေထားသည့် အသေးစားလုပ်ငန်းများအား ပစ်မှတ်ထားပြီး ဖုန်းခေါ်ဆိုခြင်း၊ Viber၊ Telegram ၊ messager အစရှိသည့် လူမှုကွန်ရက်စာမျက်နှာများမှတစ်ဆင့် စာပေးပို့၍ ငွေကြေးတောင်းခံနေရကြောင်း သိရသည်။
ငွေကြေးတောင်းခံရာတွင် ၎င်းတို့ကိုယ်တိုင် ရေးဘီလူးအဖွဲ့မှဖြစ်ကြောင်း ပြောဆိုလေ့ရှိပြီး မည်သည့်တော်လှန်ရေးအဖွဲ့၏ အမှတ်တံဆိပ်ဖြစ်သည်ကို အတည်မပြုနိုင်သည့် ဖြတ်ပိုင်းဂုဏ်ပြုလွှာများကို ပေးပို့လေ့ရှိသည်ဟု ကိုယ်တိုင်ကြုံတွေ့ရသူနှင့် နီးစပ်သည့် ရေးဒေသခံ အမျိုးသားတစ်ဦးက ပြောသည်။
ရေးဒေသခံတစ်ဦးက “ ခဏခဏ အတောင်းခံနေရတာ။ ဟိုနေ့ကပဲ ကျနော်အသိတစ်ယောက်ထိသွားတယ် တော်သေးတယ် သူများနဲ့ တိုင်ပင်လိုက်လို့ ပိုက်ဆံမပါသွားတာ Viber ကနေ စာလာပို့တာ သိန်း ၁၀၀ တောင်းတယ် ပိုက်ဆံမရှိဘူးပြောတာ သိန်း ၃၀ လဲရတယ်တဲ့ ရေးဘီလူးအဖွဲ့ကပြောပြီး ပြထားတဲ့တံဆိပ်က ရေးဘီလူးတံဆိပ်မဟုတ်ဘူး။ အဲ့ကြောင့် သိသွားတာ အစက စိုးရိမ်နေကြတယ် မပေးရင် အန္တရယ်ပေးမှာကို ကြောက်နေကြတာ။ ” ဟု ပြောသည်။
အသေးစားလုပ်ငန်းရှင်များဖြစ်သည့် သောက်ရေသန့်ဖြန့်ဝေရေးလုပ်ငန်းများ၊ အွန်လိုင်းဝန်ဆောင်မှုလုပ်ငန်းများ အရောင်းအဝယ်လုပ်ကိုင်သူအချို့ထံတွင်လည်း ငွေကြေးလိမ်လည်တောင်းခံရသည့် ဖြစ်ရပ်များ ရှိနေသည်။
ထို့ကြောင့် မည်သည့်အကြောင်းပြချက်ဖြင့် ငွေကြေးတောင်းခံလာသည်ကို မယုံကြည်ရန်၊ ငွေပေးချေခြင်းမပြုကြရန်နှင့် အဖွဲ့အစည်း၏ တရားဝင်တာဝန်ရှိသူများထံသို့ ပြန်လည်အတည်ပြု စုံစမ်းကြရန်လည်း ဒေသခံက တိုက်တွန်းထားသည်။
ရေးဘီလူးဘက်မှလည်း ၎င်းတို့၏ အမည်၊ အမှတ်တံဆိပ်အပြင် အဖွဲ့အစည်းနှင့် သက်ဆိုင်သူများ၏ အမည်များကို အသုံးပြုကာ စီးပွားရေးလုပ်ငန်းရှင်များ၊ ရပ်ကွက်/ကျေးရွာအုပ်ချုပ်ရေးမှူးများနှင့် သက်ဆိုင်ရာပုဂ္ဂိုလ်များထံမှ ငွေကြေးများ လိမ်လည်တောင်းခံမှုများရှိနေကြောင်းလည်း ထုတ်ပြန်ထားသည်။
၎င်းတို့၏ အမည်နှင့် ဂုဏ်သိက္ခာကို အလွဲသုံးစားပြုလုပ်၍ ငွေကြေးလိမ်လည်တောင်းခံနေမှုများကို ပြင်းထန်စွာ အရေးယူဆောင်ရွက်သွားမည်ဖြစ်ကြောင်း စက်တင်ဘာလ ၂၉ ရက်နေ့က အသိပေးထုတ်ပြန်ထားသည်။
ထို့ကြောင့် ရေးဘီလူးအဖွဲ့အစည်း၏ အမည်နှင့် ဂုဏ်သိက္ခာကို အလွဲသုံးစားပြု၍ ကိုယ်ကျိုးအတွက် ငွေကြေးလိမ်လည်တောင်းခံသူ မည်သူ့ကိုမဆို ပြင်းထန်စွာ ထိရောက်စွာ အရေးယူဆောင်ရွက်သွားမည်ဖြစ်သည်ဟု ဆိုထားသည်။
