မွန်ပြည်နယ်အတွင်းရှိ အခြေခံပညာ မူလတန်းအဆင့်တွင် မွန်တိုင်းရင်းသားစာပေကို Grade 5 အထိ တိုးမြှင့်သင်ကြားသွားရန် ပြည်နယ်လွှတ်တော်က အတည်ပြုလိုက်သည်။
အခြေခံပညာ မူလတန်းအဆင့်တွင် မွန်တိုင်းရင်းသားစာပေကို Grade 5 အထိ တိုးမြှင့်သင်ကြားနိုင်ရေး အဆိုကို ပေါင်မြို့နယ် ကိုယ်စားလှယ်အမှတ် ၂ ပြည်နယ်လွှတ်တော်ကိုယ်စားလှယ် ဦးစံတင်က ပြီးခဲ့သည့် ဇွန်လ ၉ ရက်နေ့က ကျင်းပခဲ့သည့် တတိယအကြိမ် မွန်ပြည်နယ်လွှတ်တော် ဒုတိယပုံမှန်အစည်းအဝေး (ပထမနေ့) တွင် တင်သွင်းခဲ့သည်။
မူလတန်းအဆင့်၌ တိုင်းရင်းသားစာပေ သင်ကြားနေမှုသည် အခြေခံအဆင့်သာ တက်မြောက်ရန် မဟုတ်ပဲ အပြည့်အဝတက်မြောက်ရန် Grade 5 အထိ တိုးမြှင့် သင်ကြားသင့်ကြောင်း လွှတ်တော်ကိုယ်စားလှယ်တို့က ထောက်ခံဆွေးနွေးကြသည်။
“Grade 5 အထိ တိုးမြှင့်သင်ကြားမှသာလျှင် အပြည့်အဝ တတ်မြောက်မည်ဖြစ်ကြောင်း၊ မွန်တိုင်းရင်းသား စာပေကို ထိန်းသိမ်းရာလည်း ရောက်မည်ဖြစ်သဖြင့် အဆိုကို လွှတ်တော်တွင် လက်ခံ ဆွေးနွေးသင့်ပါကြောင်း” ဟု ဘီးလင်းမြို့နယ်၊ ကိုယ်စားလှယ်အမှတ်(၂) ပြည်နယ်လွှတ်တော်ကိုယ်စားလှယ် ဦးကျော်ဇေယျာမင်း ထောက်ခံဆွေးနွေးခဲ့သည်။
အဆိုကို အတည်ပြုသင့်ကြောင့် ယနေ့ ဇွန်လ ၁၅ ရက်နေ့ လွှတ်တော်အစည်းအဝေးတွင် လွှတ်တော်ကိုယ်စားလှယ် ၃ ဦးတို့က ထောက်ခံဆွေးနွေးပြီးနောက် အဆိုကို ကန့်ကွက်သူမရှိ လွှတ်တော်က အတည်ပြုသည်။
အဆိုနှင့် ပတ်သက်ပြီး ပြည်နယ် စစ်အစိုးရအဖွဲ့ ဗမာတိုင်းရင်းသားရေးရာဝန်ကြီး ဦးမျိုးမင်းလှိုင်က “ တိုင်းရင်းသားစာပေကို Grade 5 အထိ တိုးမြှင့် သင်ကြားနိုင်ရေးတို့အတွက် သက်ဆိုင်ရာ ပြည်ထောင်စုဝန်ကြီးဌာနများသို့ လုပ်ထုံးလုပ်နည်းများနှင့်အညီ ဆက်လက်တင်ပြ၍ အကောင်အထည်ဖော် ဆောင်ရွက်ပေးသွားမည်” ဟု ဆိုသည်။
အဆိုကို လွှတ်တော်က အတည်ပြုလိုက်ပြီးဖြစ်သည့်အတွက် မူလတန်းအဆင့် တိုင်းရင်းသားစာပေးသင်ကြားရေးကို Grade 5 အထိ တိုးမြှင့်သင်ကြားသွားနိုင်ရန် ပြည်နယ်အစိုးရက မဖြစ်မနေ အကောင်အတည်ဖော်ရမည်ဖြစ်သည်။
လက်ရှိတွင် အခြေခံပညာ မူလတန်းအဆင့်တွင် မွန်စာပေးသင်ကြားရေးကို Grade 3 အထိသာ သင်ကြားနေပြီး ထိရောက်မှုမရှိဘူးလို့ မွန်စာပေသင်ကြားရေး ဆရာ၊ ဆရာမတို့ထံမှ သိရသည်။
