လွတ်လပ်သောမွန်သတင်းအေဂျင်စီ၊ ဖေဖော်ဝါရီ ၈၊၂၀၂၄။
တနင်္သာရီတိုင်းဒေသကြီး၊ ထားဝယ်မြို့နယ်၊ မယ်ဝေးတောင်ပေါ်ရှိ စစ်ကောင်စီတပ်စခန်းတစ်ခုကို ပြည်သူ့ကာကွယ်ရေးတပ်ဖွဲ့တို့က တိုက်ခိုက်သိမ်းပိုက်ခဲ့ကြောင်း သိရသည်။
အဆိုပါ တပ်စခန်းကို Ba Htoo Army – BHA နှင့် ထားဝယ်စုပေါင်းစစ်ကြောင်း (DCC) တို့ ပူးပေါင်းကာ ဖေဖော်ဝါရီလ ၅ ရက်နေ့ ညနေပိုင်းက ဝင်ရောက်တိုက်ခိုက်ခဲ့ခြင်းဖြစ်သည်။
တိုက်ခိုက်မှုဖြစ်စဉ်အတွင်း စစ်ကောင်စီတပ်သား ၂ ဦးသေဆုံးကာ သေနတ် ၃ လက်နှင့် ခဲယမ်းများ သိမ်းဆည်းရရှိခဲ့ကြောင်း ပြည်သူ့ကာကွယ်ရေးတပ်ဖွဲ့က ပုံနှင့်တကွ ထုတ်ပြန်ထားသည်။
စစ်ကောင်စီတပ်သားများ စခန်းစွန့်ခွာထွက်ပြေးခဲ့ခြင်းကြောင့် အလွယ်တကူသိမ်းပိုက်ရရှိခဲ့ခြင်းဖြစ်ကြောင်း အဆိုပါအဖွဲ့များထံမှ သိရသည်။
ပြည်သူ့ကာကွယ်ရေးတပ်ဖွဲ့ဝင်တစ်ဦးက “စခန်းက တပ်သား ၅ ယောက်လောက်ပဲရှိတယ်ဆိုတာ ဟုတ်ပါတယ်။ ဒါပေမယ့်အခု စခန်းက အနီးနားမှာ ခမရ ၄၀၁ ၊ ခမရ ၄၀၂ တို့ရှိတယ်။ အဲဒီစခန်းကိုဝင်သိမ်းခဲ့တာပါ” ဟု ပြောသည်။
အဆိုပါ စခန်းသည် သာသနာ့ နယ်မြေအတွင်းတွင် ဖြစ်သောကြောင့် စခန်းကုန်းကို မီးရှို့ဖျက်ဆီးခြင်းမပြုလုပ်ဘဲ ပြန်လည် ဆုတ်ခွာခဲ့ကြောင်း သိရသည်။
ပြန်လည်ဆုတ်ခွာခဲ့သည့်ညတွင် အဆိုပါ စခန်းကုန်းသို့ စစ်ကောင်စီ၏ ခမရ တပ်ရင်းများမှ လက်နက်ကြီးများဖြင့်ပစ်ခတ်ခဲ့ပြီး လေကြောင်းဖြင့်ပါ တိုက်ခိုက်မှုပြုလုပ်ခဲ့ကြောင်း သိရသည်။
