spot_img
Thursday, July 18, 2024
More
    spot_img
    Homeသတင်းရေး၊ ကျုံလောင်းရွာဟောင်းတွင် လက်နက်ကြီးကျည်ကျပြီး ကလေးအပါ ၉ ဦး ဒဏ်ရာရ

    ရေး၊ ကျုံလောင်းရွာဟောင်းတွင် လက်နက်ကြီးကျည်ကျပြီး ကလေးအပါ ၉ ဦး ဒဏ်ရာရ

    -

    လွတ်လပ်သောမွန်သတင်းအေဂျင်စီ၊ ဖေဖော်ဝါရီ ၈၊ ၂၀၂၄။

    မွန်ပြည်နယ်၊ ရေးမြို့နယ်၊ ကျုံလောင်းရွာဟောင်းတွင် စစ်ကောင်စီအမြှောက်တပ်မှ ပစ်ခတ်သည့် လက်နက်ကြီး ကျရောက်ပေါက်ကွဲမှုကြောင်း ကလေး ၂ ဦးအပါအဝင် အရပ်သားပြည်သူ ၉ ဦး ထိခိုက်ဒဏ်ရာရရှိခဲ့ကြောင်း ဒေသခံတို့ထံမှ သိရသည်။

    ဖေဖော်ဝါရီ ၇ ရက်နေ့ ညနေ ၆ နာရီအချိန်ခန့်က ရေးမြို့နယ်၊ ကလော့ကျေးရွာအခြေစိုက် စစ်ကောင်စီ အမြှောက်တပ် ၃၁၆ တပ်ရင်းမှ တိုက်ပွဲဖြစ်ပွားဖြစ်ပွားခြင်းမရှိပဲ လက်နက်ကြီးဖြင့် ပစ်ခတ်ခဲ့သည်။

    စစ်ကောင်စီအမြှောက်တပ်မှ ပစ်ခတ်လိုက်သည့် လက်နက်ကြီးသည် ကျုံလောင်းရွာဟောင်းထဲ ကျရောက်ပေါက်ကွဲခဲ့ပြီး အသက် ၁၀ နှစ်အရွယ် ကလေး ၂ ဦးအပါအဝင် အရပ်သား ၉ ဦး ထိခိုက်ဒဏ်ရာရရှိခဲ့သည်ဟု ကျုံလောင်းရွာခံတစ်ဦးက ပြောသည်။

    “ညနေလောက် ၆ နာရီကျော်လောက်က စပစ်တယ်။ ကျုံလောင်းရွာဟောင်းထဲကျတော့ လူ ၉ ယောက်လောက် ကျည်စထိမှန် ဒဏ်ရာရတယ်။ ၉ ယောက်ထဲမှာ အသက် ၁၀ နှစ် ကလေး နှစ်ယောက်က ကျည်စထိသွားတယ်။ ၁ ယောက်ကတော့ နည်းနည်းစိုးရိမ်ရတယ်။ နေအိမ် ၃ လုံးထိသွားတယ်။ တချို့အိမ်က အစမှန် သွပ်လန် အဲ့လိုထိတာလည်းရှိတယ်” ဟု ၎င်းဒေသခံက ပြောသည်။

    လက်နက်ကြီးကျည်ထိမှန်ဒဏ်ရာရသူများကို မွန်ပြည်သစ်ထိန်းချုပ်နယ်မြေရှိဆေးရုံတွင် ပို့ဆောင် ဆေးကုသခံယူနေရကြောင်း ၎င်းက ဆက်ပြောသည်။

    ထိုသို့ တိုက်ပွဲဖြစ်ပွားခြင်းမရှိပဲ ကျေးရွာထဲ လူနေအိမ်ပေါ် လက်နက်ကြီး ကျရောက်ပေါက်ကွဲနေခြင်းကြောင့် ကျုံလောင်းရွာခံ ၃ ပုံ ၂ ပုံခန့်က မွန်ပြည်သစ်ထိန်းချုပ်ရာနယ်မြေအတွင်းရှိ ကျေးရွာဘက်နှင့် ခြံဘက်သို့ တိမ်းရှောင်နေကြသည်။

    “လောလောဆယ်က တိုက်ပွဲဖြစ်တာမရှိဘူး။ ပစ်ခတ်တာ ခြံကနေ အိမ်ပြန်လာတဲ့အချိန်မှာ ပစ်တာ။ နောက်ပြီး ဒီလိုပဲ ထပ်ပစ်နေမှာစိုးရိမ်ကြတယ်။ စစ်ကြောင်းဝင်လာမှာလည်း စိုးရိမ်နေရတယ်။ ကျုံလောင်းမှာ လက်နက်ကြီးခဏခဏကျတယ်။ ရွာအပြင်မှာပဲကျတယ်။ အခုက ရွာထဲကျတော့ စိုးရိမ်ပြီး ရွာကလူ ၃ ပုံ ၂ ပုံလောက်က မွန်ပြည်သစ်ဘက်က ခြံနှင့် ရွာတွေဘက်ကို ပြောင်းရွှေ့ကြတယ်” ဟု အခြားကျုံလောင်းရွာခံတစ်ဦးက ပြောသည်။

    ပြီးခဲ့သည့် နိုဝင်ဘာလအတွင်းကလည်း မွန်ပြည်သစ်ထိန်းချုပ်နယ်မြေအနီးရှိ ကျေးရွာထဲကို ရေးမြို့နယ်အခြေစိုက် အမှတ် ၃၁၇ မှ လက်နက်ကြီးဖြင့် နှစ်ရက်ဆက်တိုက်ပစ်ခတ်ခဲ့သေးသည်။

    ဇန်နဝါရီလ ၂၁ ရက်နေ့ကလည်း ရေးမြို့နယ်၊ အာယုတောင်အခြေစိုက် ခမရ – ၃၄၃ နှင့် ခမရ – ၅၇၈ တို့မှ လက်နက်ကြီးဖြင့် ပစ်ခတ်ခဲ့မှုကြောင့် ၁၁ နှစ်အရွယ်ကလေး သေဆုံးသွားခဲ့ပြီး အရပ်သားပြည်သူ ၃ ဦး ထိခိုက်ဒဏ်ရာရရှိခဲ့သေးသည်။

    ရေးမြို့နယ်အခြေစိုက် စစ်ကောင်စီတပ်ရင် တပ်စခန်းတို့မှ လူနေကျေးရွာထဲ လက်နက်ကြီးဖြင့် မကြာခဏပစ်ခတ်လေ့ရှိပြီး လက်နက်ကြီးကျရောက်ပေါက်ကွဲမှုကြောင့် အရပ်သားထိခိုက်သေဆုံးမှုရှိခဲ့သည်။

    ဆက်စပ်သတင်း

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.

    Stay Connected

    0FansLike
    0FollowersFollow
    409FollowersFollow
    26,200SubscribersSubscribe
    spot_img

    Latest posts