အောက်တိုဘာ ၂၆၊ ၂၀၂၃
တနင်္သာရီတိုင်းဒေသကြီး၊ သရက်ချောင်းမြို့ရှိ သရက်ချောင်းမြို့မရဲစခန်း အောက်တိုဘာ ၂၅ ရက်နေ့ နံနက်ပိုင်းက တိုက်ခိုက်ခံရကြောင်း မြို့ခံတို့ထံမှ သိရသည်။
စစ်ကောင်စီတပ်များပါ တပ်စွဲထားသည့် သရက်ချောင်းမြို့ခံရဲစခန်းကို မြို့နယ်ပြည်သူ့ကာကွယ်ရေး ပူးပေါင်းတပ်ဖွဲ့တို့က ယမန်နေ့ နံနက် ၅ နာရီအချိန်ခန့်က လက်နက်ကြီး၊ လက်နက်ငယ်များဖြင့် ဝင်ရောက်တိုက်ခိုက်ခဲ့ပြီး နှစ်ဖက်အပြန်အလှန် ပစ်ခတ်မှု နာရီဝက်ခန့်ဖြစ်ပွားခဲ့သည်။
ရဲစခန်းတိုက်ခိုက်ခံရမှုတွင် သရက်ချောင်းမြို့နယ်အခြေစိုက် စစ်ကောင်စီတပ်ရင်းတို့မှ လက်နက်ကြီးဖြင့် ပစ်ကူခဲ့သည်လည်းရှိသည်ဟု ဒေသခံတို့ထံမှ သိရသည်။
ရဲစခန်းတိုက်ခိုက်မှုတွင် စစ်ကောင်စီဘက်က ၄ ဦးထက်မနည်း ထိခိုက်သေဆုံးမှုရှိနိုင်ပြီး ဒဏ်ရာရသူများလည်း ရှိနိုင်သည်ဟု ပြည်သူ့ကာကွယ်ရေးပူးပေါင်းတပ်ဖွဲ့ဘက်က ထုတ်ပြောသော်လည်း လွတ်လပ်သောမွန်သတင်းအေဂျင်စီအနေဖြင့် သီးခြားအတည်ပြုနိုင်ခြင်းမရှိပေ။
စစ်ကောင်စီတပ်ရင်းဘက်မှ လက်နက်ကြီးဖြင့် ပစ်ခတ်ခဲ့မှုကြောင့် အရပ်သား ထိခိုက်ဒဏ်ရာရရှိမှု၊ နေအိမ်ထိခိုက်ပျက်စီးမှုလည်း ရှိနေသည်ဟု ဒေသခံတို့ထံမှ သိရသည်။
ပြီးခဲ့သည့် အောက်တိုဘာလ ၁၇ ရက်နေ့ကလည်း သရက်ချောင်းမြို့နယ်၊ ကတွဲရွာနှင့် ရငဲရွာကြားတွင် စစ်ကောင်စီတပ်နှင့် ဒေသကာကွယ်ရေးတပ်တို့ကြား တိုက်ပွဲဖြစ်ပွားခဲ့သေးသည်။
