ထားဝယ်တက္ကသိုလ် ကျောင်းသားသမဂ္ဂဥက္ကဌ ကိုအောင်ဝေယံကျော်အပါအဝင် နိုင်ငံရေးအကျဥ်းသားအချို့ ယနေ့ အောက်တိုဘာလ ၂ ရက်နေ့ နံနက်ပိုင်းက ထားတယ်အကျဉ်းထောင်မှ ပြစ်ဒဏ်စေ့ပြီး ပြန်လည်လွတ်မြောက်လာကြောင်း သိရသည်။
ပြန်လွတ်လာသူ ၁၄ ဦးတွင် ကိုအောင်ဝေယံကျော်၊ ကိုသုတတင်စိုး(ခ) မောင်တူး၊ ကိုအောင်သူရဇော်၊ ကိုရဲထွန်း၊ ကိုဝေယံထက်၊ ကိုကျော်မင်းဦး၊ ကိုဇင်မြတ်ဦး၊ ကိုကိုလင်းနိုင်၊ ကိုဝင်းလတ်ထွေး၊ ကိုဥက္ကာရှိုင်းအောင်၊ ကိုဝေယံဌေးတို့ဖြစ်ပြီး ကျန်သုံးဦးအမည်ကို အတည်ပြုဆဲဟု ထားဝယ်နိုင်ငံရေးအကျဥ◌်းသားများကွန်ရက် (Dawei Political Prisoners Network-DPPN) က ထုတ်ပြန်ထားသည်။
ပြန်လည်လွတ်မြောက်လာသူများသည် နိုင်ငံတော်အကြည်အညိုပျက်စေမှု ပုဒ်မ ၅၀၅ (က) အတွက် ထောင်ဒဏ် ၃ နှစ်နှင့် လက်နက်ကိုင်ဆောင်မှု ပုဒ်မ ၁၉ (စ) အတွက် ထောင်ဒဏ် ၁ နှစ် စုစုပေါင်း ထောင်ဒဏ် ၄ နှစ် အမိန့်ချမှတ်ခံထားရသူများဖြစ်ကြောင်း ထားဝယ်အကျဉ်းထောင်နှင့် နီးစပ်သူတစ်ဦးက ပြောသည်။
“ပြစ်ဒဏ်ကျခံရတာက ၄ နှစ်ဆိုပေမယ့် လျှော့ရက်နဲ့ဆိုတော့ မနေ့ (အောက်တိုဘာလ ၁ ရက်) ကတည်းက ပြစ်ဒဏ်က စေ့သွားပါတယ်။ ဒါပေမယ့် မနေ့က တနင်္ဂနွေဖြစ်နေလို့ ဒီနေ့မှ လွှတ်လိုက်တာ” ဟု ၎င်းက ပြောသည်။
ကိုအောင်ဝေယံကျော်အပါအဝင် ၉ ဦးတို့သည် ၂၀၂၁ ခုနစ် မတ်လ ၁၈ ရက်နေ့က ထားဝယ်မြို့၊ ပေါ်ဝဲကျွန်းရပ်ကွက်ရှိ နေအိမ်တစ်အိမ်တွင် စစ်ကောင်စီတပ်တို့မှ အင်အားအလုံးအရင်းဖြင့် ဝင်ရောက်စီးနင်းချိန် တွင် ဖမ်းဆီးခံခဲ့ရခြင်းဖြစ်သည်။
လွတ်ရက်စေ့ပြီး ပြန်လွတ်လာသူများထဲတွင် မူးယစ်ဆေးဝါးအမှုဖြင့် ထောင်ဒဏ်ကျခံနေရသည့် အကျဥ်းသား ၅ ဦးလည်း ပါဝင်ကြောင်းအကျဉ်းထောင်နှင့် နီးစပ်သူတို့ထံမှ သိရသည်။
ပြီးခဲ့သည့် သြဂုတ်လ ၁ ရက်နေ့ကလည်း ထားဝယ်အကျဥ်းထောင်မှ နိုင်ငံရေးအကျဥ်းသား ၃ ဦးအပါအဝင် အကျဥ်းသား ၃၀ ကျော် လွတ်ငြိမ်းချမ်းသာခွင့်ဖြင့် ပြန်လည်လွတ်မြောက်လာခဲ့ကြောင်း သိရသည်။
ထားဝယ်အကျဉ်းထောင်တွင် နိုင်ငံရေးအကျဥ◌်သား ၄၀၀ နီးပါးအထိ ရှိနေဆဲဖြစ်ကြောင်း ထားဝယ်နိုင်ငံရေးအကျဉ်းသားများကွန်ရက်က ထုတ်ပြန်ထားသည်။
