မွန်သတင်းအေဂျင်စီ (၁၇ သြဂုတ် ၂၀၂၁)
ရေးမြို့နယ် အစင်ကျေးရွာ ပြည်ခိုင်ဖြိုးပါတီခေါင်းဆောင်တစ်ဦးဖြစ်သူ ဦးကိုကို အသက် (၅၁) နှစ်သည် ၄င်း၏ဥယာဥ်ခြံသို့ သွားသည့်ကားလမ်းဘေး၌ ယမန်နေ့ ညနေပိုင်းက ထိုးသွင်းဒဏ်ရာဖြင့် လဲကျလျက်တွေ့ရှိရပြီး ရေးမြို့ဆေးရုံကြီးအရောက်တွင် သေဆုံးခဲ့ကြောင်း သတင်းရရှိသည်။
အစင်ကျေးရွာ ဝယ်ပွဲ-ဖယ်ဝီးရပ်ကွက် ကားလမ်းဘေး၌ ဦးကိုကို၏ ဝဲဘက်ရင်အုံတွင် ထိုးသွင်းဒဏ်ရာ တစ်ချက် ပက်လက်လှန်လဲကျလျက် သွားရောက်ကြည့်ရှုခဲ့သည့် ဇနီးဖြစ်သူ ဒေါ်မိုးမိုးဝင်း တွေ့ရှိခဲ့ရပြီး အလုပ်သမားများနှင့်အတူ မြို့နယ်ပြည်သူ့ဆေးရုံကြီးသို့ ပို့ဆောင်ခဲ့ခြင်း ဖြစ်သည်။
ရေးမြို့မ ရဲစခန်းမှူး ဒုရဲမှူး ဝင်းမြင့်က “သူက ဖယ်ဝီး ခြံကနေ ညနေ ၅ နာရီလောက် လမ်းမှာ အထိုးခံရပြီး သတိလစ် လဲကျနေတယ်၊ လမ်းမှာတွေ့တဲ့လူက လာပြောပြတယ်၊ တရားခံစုံစမ်းဆဲပဲ မျက်မြင်သက်သေလည်း မပေါ်သေးဘူး” ဟု မွန်သတင်းအေဂျင်စီသို့ ပြောသည်။
အခင်းမဖြစ်ပွားမီ နာရီပိုင်းအလိုတွင် ၄င်း၏ဥယျာဉ်ခြံသို့ ဆိုင်ကယ်ဖြင့်တစ်ဦးတည်းထွက်ခွာသွားခဲ့ရာမှ ယင်းသို့ လက်သည်မပေါ် လုပ်ကြံခံ သေဆုံးရခြင်းဖြစ်ကြောင်း အစင်ကျေးရွာသားတစ်ဦးက ဆိုသည်။
ဖြစ်စဉ်နှင့်ပတ်သက်၍ ရေးမြို့မရဲစခန်း၏ (ပ)၈၄/၂၀၂၁၊ ရာဇသတ်ကြီး ဥပဒေပုဒ်မ-၃၀၂ အရ သေဆုံးသူဇနီးမှ အမှုဖွင့်လှစ်၍ ရေးမြို့မရဲစခန်းမှူးက စစ်ဆေးဆောင်ရွက်လျှက် ရှိကြောင်း သိရသည်။
အလားတူ အစင်ကျေးရွာ ပြည်ခိုင်ဖြိုးပါတီ USDP အလုပ်အမှုဆောင် ဦးမောင်အုန်း နေအိမ်အတွင်းသို့ ဇူလိုင် ၂၉ ရက် ညဦးပိုင်းအချိန်က အမည်မသိလူ ၂ ဦးမှ လက်ပစ်ဗုံးတစ်လုံး ပစ်သွင်းဖောက်ခွဲခဲ့သဖြင့် အမျိုးသမီးတစ်ဦး ပြင်းထန်စွာဒဏ်ရာရရှိခဲ့ပြီး မော်လမြိုင်သို့ ပို့ဆောင်ခဲ့ရသည်။
ပင်လယ်တံငါလုပ်ငန်း အဓိကလုပ်ကိုင်ကြသည့် အစင်ကျေးရွာတွင် ရပ်ဝေးမှ ရွှေ့ပြောင်းလာရောက်နေထိုင်သူ ဗမာတိုင်းရင်းသားအများစုနေထိုင်လျက်ရှိပြီး အမျိုးသားဒီမိုကရေစီအဖွဲ့ချုပ် NLD နှင့် ပြည်ခိုင်ဖြိုးပါတီတို့ ၂၀၂၀ ရွေးကောက်တွင် အဓိက ယှဥ်ပြိုင်ခဲ့သည့် ကျေးရွာအုပ်စုတစ်ခု ဖြစ်သည်။
