ထိုင်း-မြန်မာနယ်စပ်၊ ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့အနီး ကျော့ပလုကျေးရွာတွင် ဒီမိုကရေစီအကျိုးပြု ကရင့်တပ်မတော် (DKBA) တပ်ဖွဲ့နှင့် လက်နက်ကိုင်ဆောင်ထားသည့် ဒေသခံတစ်ဦးအကြား ပစ်ခတ်မှုဖြစ်ပွားခဲ့ပြီး ထိုဒေသခံသေဆုံးခဲ့ကြောင်း သိရသည်။
ပြီးခဲ့သည့် မတ်လ ၂ ရက်နေ့ ညနေ ၇ နာရီဝန်းကျင်ခန့်က ဘုရားသုံးဆူမြို့အနီး ကျော့ပလုကျေးရွာ နာရေးအိမ်တခုတွင် လက်နက်ကိုင်ဆောင်ထားသည့် အသက် ၅၅ နှစ်အရွယ် ဒေသခံ နိုင်မွန်ချမ်းဆိုသူနှင့် DKBA တပ်ဖွဲ့ဝင်တို့အကြား ပစ်ခတ်မှု ဖြစ်ပွားခဲ့သည်။
ထိုဖြစ်စဉ်အတွင်း နိုင်မွန်ချမ်း ပစ်ခတ်မှုကြောင့် DKBA တပ်ဖွဲ့ဝင် ၂ ဦး ဒဏ်ရာရကာ DKBA ဘက်က ပစ်ခတ်မှုကြောင့် နိုင်မွန်ချမ်းသည် သေနတ်ဒဏ်ရာ နှစ်ချက်ဖြင့် အခင်းဖြစ်ပွားရာနေရာတွင်ပင် သေဆုံးသွားခဲ့သည်။
“အဲနေ့က လကြပ်နေတော့ နိုင်မွန်ချမ်းက သေနတ်ဖောက်တယ်။ အဲဒါကို အုပ်ချုပ်ရေးမှူးက DKBA နဲ့ သွားတိုင်တော့ DKBA က နိုင်မွန်ချမ်းကို လာဖမ်းတယ်။ အဲမှာ နိုင်မွန်ချမ်းက ကောင်းကောင်းပြောပြီး သူ လိုက်သွားမယ်ပြောတယ်။ အဲဒါပြီးတော့ သူ အပေါ့သွားမယ်ဆိုပြီး ထွက်သွားတဲ့အချိန်မှာ သေနတ်ထုတ်ပြီး DKBA တပ်ဖွဲ့တွေကို ပစ်တယ်။ DKBA ဘက်ကလည်း ပြန်ပစ်တော့ ထိသွားတယ်” ဟု ဘုရားသုံးမြို့ခံ အမျိုးသားတစ်ဦးက ပြောသည်။
အဆိုပါ ပစ်ခတ်မှုအတွင်း ဒေသခံတစ်ဦးလည်း ထိခိုက်ဒဏ်ရာရရှိကြောၚ်း DKBA တပ်ဖွဲ့ဝင် ၂ ဦးအပါ ၎င်းတို့ကို ဘုရားသုံးဆူမြို့အနီး ကြိမ်ချောင်းရွာရှိ ဆေးရုံးသို့ ပိုဆောင်ဆေးကုသမှု ခံယူနေရသည်ဟု သိရသည်။
နိုင်မွန်ချမ်း၏ ရုပ်အလောင်းကိုတော့ ဒေသခံပရဟိတတို့က ဘုရားသုံးဆူမြို့ရှိ ဆေးရုံကြီးသို့ ပို့ဆောင်ပြီးနောက် မတ်လ ၄ ရက်နေ့တွင်ပင် မိသားစုဝင်များက အာသုဘချခဲ့သည်ဟု အထက်ပါ မြို့ခံက ဆက်ပြောသည်။
စစ်ကော်မရှင်တပ်အပြင် ကရင်အမျိုးသားအစည်းအရုံး KNU၊ ကရင်နယ်ခြားစောင့်တပ် BGF၊ ဒီမိုကရေစီအကျိုးပြု ကရင့်တပ်မတော် (DKBA)၊ မွန်ပြည်သစ်ပါတီ (NMSP) အပြင် အာဏာသိမ်းပြီးနောက် ပေါ်ပေါက်လာသည့် လက်နက်အဖွဲ့အစည်းများ လှုပ်ရှားနေသည့် ဘုရားသုံးဆူမြို့တွင် ပစ်ခတ်မှုဖြစ်စဉ် မကြာခဏဖြစ်ပွားလေ့ရှိသည်။
