ပဲခူးတိုင်း၊ ညောင်လေးပင်ခရိုင်၊ ဖြူးမြို့နယ်တွင် စစ်ကောင်စီတပ် လက်နက်ကြီးဖြင့် ပစ်ခတ်မှုကြောင့် ရဟန်းတစ်ပါး ပျံလွန်တော်မူပြီး၊ ၇ ဦး ထိခိုက်ဒဏ်ရာရရှိသည်ဟု ကရင်အမျိုးသားအစည်းအရုံး KNU ဗဟိုက ထုတ်ပြန်သည်။
ဖြူးမြို့အရှေ့ လိပ်ပေါက်ကျေးရွာအနီးတွင် ကရင်အမျိုးသားလွတ်မြောက်ရေးတပ်မတော် KNLA နှင့် စစ်ကောင်စီ တပ်တို့ သြဂုတ်လ ၁၇ မှ ၁၉ ရက်နေ့အထိ တိုက်ပွဲဖြစ်ပွားခဲ့သည်။
ထိုတိုက်ပွဲဖြစ်ပွားပြီးနောက် စစ်ကောင်စီ ခမရ-၄၃၉ တပ်ရင်းမှ ကုန်းအင်းတောင်ကျေးရွာ၊ ကုန်းအင်း အနောက်ကျေးရွာ၊ ကုန်းအင်းအရှေ့ကျေးရွာ၊ ဆက်ကုန်းကျေးရွာ၊ ဆင်တဲကုန်းကျေးရွာနှင့် သပြေခင်ကျေးရွာ ရည်ရွယ်ချက်ရှိရှိ လက်နက်ကြီးများဖြင့် ပစ်ခတ်ခဲ့သည်ဟု ဆိုသည်။
သြဂုတ်လ ၁၇ ရက်နေ့ ညနေ ၄ နာရီအချိန်ခန့်က စစ်ကောင်စီတပ် ခမရ-၄၃၉ တပ်ရင်းမှ ပစ်ခတ်လိုက်သည့် လက်နက်ကြီးသည် အိမ်ပင်သာရွာဘုန်းကြီးကျောင်းပေါ် ကျရောက်ပေါက်ကွဲခဲ့သည်။
ဘုန်းကြီးကျောင်းပေါ် လက်နက်ကြီးကျရောက်ပေါက်ကွဲမှုကြောင့် ရဟန်းတစ်ပါး ပျံလွန်တော်မူပြီး ကိုရင်တစ်ပါးနှင့် ရွာသားတစ်ဦး ကျည်စထိမှန်ဒဏ်ရာရရှိခဲ့သည်ဟု KNU က ထုတ်ပြန်ထားသည်။
၎င်းပြင် သြဂုတ်လ ၂၁ ရက်နေ့ နံနက် ၉ နာရီခန့်ကလည်း စစ်ကောင်စီတပ် ခမရ-၅၉၉ တပ်ရင်းမှ ကျွန်းတောကျေးရွာထဲကို ၁၂၀ မမ လက်နက်ကြီး ၂ လုံး ပစ်ခတ်ခဲ့သည်။
လက်နက်ကြီးသည် ကျွန်းတောရွာ စာသင်ကျောင်းအတွင်း ကျရောက်ပေါက်ကွဲခဲ့ပြီး ကျောင်းသား နှစ်ဦး၊ ကျောင်းသူ ၃ ဦး စုစုပေါင်း ၅ ဦး ထိခိုက်ဒဏ်ရာရရှိခဲ့ကြသည်ဟု ဆိုသည်။
စစ်ကောင်စီတပ်မှ လက်နက်ကြီးဖြင့် ပစ်ခတ်မှုကြောင့်ကုန်းအင်းတောင်ကျေးရွာ၊ ကုန်းအင်း အနောက်ကျေးရွာ၊ ကုန်းအင်းအရှေ့ကျေးရွာ၊ ဆက်ကုန်းကျေးရွာ၊ ဆင်တဲကုန်းကျေးရွာနှင့် သပြေခင်ကျေးရွာမှ ပြည်သူများ ဘေးလွတ်ရာသို့ ထွက်ပြေးတိမ်းရှောင်နေကြရသည်ဟု KNU က ထုတ်ပြန်ထားသည်။
#photocredit_𝗞𝗮𝗿𝗲𝗻 𝗡𝗮𝘁𝗶𝗼𝗻𝗮𝗹 𝗨𝗻𝗶𝗼𝗻
