ဒီဇင်ဘာ ၈၊ ၂၀၂၃
မွန်ပြည်နယ်၊ ကျိုက်ထိုမြို့နယ်တွင် ပြည်သူ့ကာကွယ်ရေးတပ် PDF များကို ထောက်ပံ့သည်ဆိုသည့်စွပ်စွဲချက်ဖြင့် ရဟန်းတစ်ပါး ဖမ်းဆီးအမှုဖွင့်ခံရကြောင်း သိရသည်။
ကျိုက်ထိုမြို့ရှိ ဘုန်းကြီးကျောင်းတစ်ကျောင်းမှ ရဟန်းတစ်ပါးအား အကြမ်းဖက်မှုတိုက်ဖျက်ရေး ဥပဒေအရ အမှုဖွင့်အရေးယူထားကြောင်း သတင်းရရှိသည်။
ကျိုက်ထိုမြို့ရှိ ဘုန်းကြီးကျောင်းတစ်ကျောင်းတွင် သီတင်းသုံးနေသည့် ဥူးဥတ္တမကို စစ်ကောင်စီတပ်တို့က ဒီဇင်ဘာလ ၅ ရက်နေ့က ဖမ်းဆီးခဲ့ပြီး အကြမ်းဖက်မှုတိုက်ဖျက်မှု ဥပဒေဖြင့် အမှုဖွင့်ခဲ့သည်။
“ဥူးဥတ္တမက NUG နဲ့ PDF အဖွဲ့တွေက ပြုလုပ်တဲ့ ကမ်ပိန်းတစ်ခု Kpay နဲ့ ငွေကြေးထည့်ဝင်ထားတာကို တာဝန်ရှိသူတွေက စိစစ်တွေ့ရှိခဲ့တဲ့အတွက် ယခုလို အမှုဖွင့်အရေးယူထားတာလို့ သိရတယ်” ဟု လုံခြုံရေးတပ်ဖွဲ့နှင့် နီးစပ်သူတစ်ဦးက ပြောသည်။
ဥူးဥတ္တမကို ကျိုက်ထိုမြို့မရဲစခန်းတွင် (ပ) ၁၀၆/၂၀၂၃၊ (၂၀၁၄) ခုနှစ် အကြမ်းဖက်မှုတိုက်ဖျက်ရေး ဥပဒေပုဒ်မ ၅၀ (ည) ဖြင့် အမှုဖွင့်အရေးယူထားကြောင်း ဆိုသည်။
အလားတူ ယမန်နေ့ ဒီဇင်ဘာလ ၅ ရက်နေ့ကလည်း မုဒုံမြို့နယ်၊ ဖယ်ဒိုကျေးရွာနေ မသူဇာဝင်း (ခ) ချန ဆိုသူကိုလည်း NUG နှင့် PDF တို့ကို Wave Money မှတဆင့် ငွေကြေးထောင်ပံ့ခြင်းများ ပြုလုပ်ထားသည်ဟုဆိုကာ ဖမ်းဆီးထိန်းသိမ်းခံနေရသည်ဟု ဒေသခံတို့ထံမှ သိရသည်။
မော်လမြိုင် ဒီဇင်ဘာ (၈) လူမှုကွန်ရက်ပေါ် မမှန်သတင်းများ ရေးသားနေသည်ဟုဆိုကာ မော်လမြိုင်မြို့ခံ အမျိုးသားတစ်ဦး ပုဒ်မ – ၅၀၅ (က) ဖြင့် ဖမ်းဆီးအမှုဖွင့်ခံရကြောင်း မြို့ခံများထံမှ သိရသည်။
ဒီဇင်ဘာလ ၅ ရက်နေ့တွင်ပင် မော်လမြိုင်မြို့၊ စစ်ကဲကုန်းရပ်ကွက်နေ အသက် ၄၆ နှစ်အရွယ် ဦးဇွဲအာကာ (ခ) သားချိုဆိုသူကိုလည်း လူမှုကွန်ရက်စာမျက်နှာပေါ် စစ်ကောင်စီကို ဝေဖန်သည့်စာရေးသားဖြန့်ဝေခဲ့သည်ဆိုပြီး စစ်ကောင်စီက ဖမ်းဆီးခဲ့ပြီး ပုဒ်မ – ၅၀၅ (က) ဖြင့် အမှုဖွင့်ထားသည်ဟု သိရသည်။
