မွန်သတင်းအေဂျင်စီ (၂၈ သြဂုတ် ၂၀၂၂)
ထိုင်းမြန်မာနယ်စပ် ဘုရားသုံးဆူဒေသမှ တရားမဝင်မြန်မာအလုပ်သမားများ တင်ဆောင်လာသည့် မော်တော်ယာဥ်တစ်စီး ယနေ့နံနက် ၄ နာရီကျော်အချိန်ခန့်တွင် ကန်ချနပူရီခရိုင် စံခလပူရီမြို့ပြင်ရှိ PTT စက်သုံးဆီအရောင်းဆိုင်အနီး လမ်းချော်တိမ်းမှောက်သဖြင့် မြန်မာနိုင်ငံသား ၄ ဦး သေဆုံး၍ ကျန် ၉ ဦးဒဏ်ရာအသီးသီးရရှိခဲ့ကြောင်း သတင်းရရှိသည်။
“သေဆုံးတဲ့လူတွေ ဘယ်သူဘယ်ဝါဖြစ်တယ်ဆိုတာ မသိရသေးပါဘူး။ သေဆုံးခဲ့တဲ့ ၄ ဦးထဲမှာ ၁၄ အရွယ် ယောကျ်ားလေးတစ်ဦးအပါအဝင် အမျိုးသား ၃ ဦးနဲ့ အမျိုးသမီးတစ်ဦးပါဝင်တယ်”ဟု ကယ်ဆယ်ရေးဝန်ထမ်းတစ်ဦးက ဆိုသည်။
အခင်းဖြစ်ပွားရာသို့ စံခလပူရီရဲအရာရှိနှင့်တပ်ဖွဲဝင်တို့အပြင် ကယ်ဆယ်ရေးဝန်ထမ်းများ အချိန်မီရောက်ရှိသွားပြီး ကယ်ဆယ်ရေးဆောင်ရွက်ခဲ့ရာတွင် မြန်မာအလုပ်သမား အများအပြားတင်ဆောင်လာသည့် မော်တော်ယာဥ် အမြန်မောင်းနှင်မှုကြောင့် လမ်းကွေ့ငယ်လေး၌လမ်းချော်၍ လမ်းဘေးမြောင်းသို့ ထိုးကျတိမ်းမှောက်သွားခြင်းဖြစ်ကြောင်း သိရသည်။
ယင်းဖြစ်စဥ်တွင် ယာဥ်မောင်းနှင့် ပွဲစား ၂ တို့ ဦးစလုံး ထွက်ပြေးလွတ်မြောက်သွားသည် ယူဆရကြောင်း၊ ဒဏ်ရာရရှိသူများကို စံခလပူရီဆေးရုံသို့ ပို့ဆောင်ကုသပေးလျက်ရှိကြောင်း စံခလပူရီမြို့မှ ကယ်ဆယ်ရေးသမားတစ်ဦးက ပြောသည်။
အလားတူ ထိုင်းနိုင်ငံ၊ မယ်ဟောင်ဆောင်ခရိုင်တွင် တရားမဝင်မြန်မာလုပ်သား ၁၀ ဦး လိုက်ပါလာသည့် ကားတစ်စီးကို သြဂုတ် ၂၅ ရက် နံနက်ပိုင်းက ထိုင်းအာဏာပိုင်တို့ ဖမ်းမိခဲ့ပြီး အတူပါရှိလာသော နောက်ထပ်ကားနှစ်စီး မောင်းပြေးလွတ်မြောက်သွားကြောင်း ထိုင်းသတင်းများက ဖော်ပြသည်။
