မွန်သတင်းအေဂျင်စီ (၂၄ ဇွန် ၂၀၂၁)
ထားဝယ်သပိတ်ဦးဆောင်သူ ကိုကျော်ထွေးအား ဇွန်လ ၂၃ ရက်နေ့က ထားဝယ်အကျဉ်းထောင် အထူးတရားရုံး၌ နိုင်ငံတော်အကြည်ညိုပျက်စေမှု ရာဇသတ်ကြီးပုဒ်မ ၅၀၅ (က) အပြင် လိုင်စင်မဲ့ကားအသုံးပြုသည့်အတွက် ပို့ကုန်သွင်းကုန်ဥပဒေ ပုဒ်မနှစ်ခုဖြင့် ထောင်ဒဏ် ၂ နှစ် ၄ လ အမျိန့်ချမှတ်လိုက်ကြောင်း မိသားစုဝင်တစ်ဦးထံမှ သိရသည်။
အဆိုပါ ထောင်ဒဏ်အမိန့်ချခံရသည့်အပေါ် မိသားစုမှ ကိုကျော်ထွေး၏ ရှေ့နေဖြစ်သူနှင့် တိုင်ပင်ပြီး အယူခံဝင်၊ မဝင် ဆုံးဖြတ်ရမည်ဖြစ်ကြောင်း၊ ကိုကျော်ထွေးနှင့် မိသာစုဝင်များ တွေ့ခွင့်မရသေးကြောင်း ၄င်းကဆိုသည်။
အဆိုပါ အမှုထဲတွင် ပုဒ်မ ၅၀၅ (က)ဖြင့် ထောင်ဒဏ် ၂ နှစ်နှင့် လိုင်စင်မဲ့ကားမောင်းနှင်အသုံးပြုသည့်အတွက် ထောင်ဒဏ် ၄ လ အမိန့်ချခံရကြောင်း သိရသည်။
ကိုကျော်ထွေးသည် မတ်လ ၁၀ ရက်နေ့က ထားဝယ်မြို့၊ ဝဲကျွန်း (၄) လမ်းထိပ်ရှိ ကားဝပ်ရှော့ခ်တွင် ကားပြုပြင်နေစဉ် အရပ်ဝတ်နှင့် စစ်သား၊ ရဲများ ရုတ်တရက်ရောက်ရှိလာပြီး ထိုးကြိတ်ကာ ဖမ်းဆီးခေါ်ဆောင်ခြင်းဖြစ်ကြောင်း ထားဝယ်မြို့ခံတစ်ဦးက ပြောသည်။
ထို့အပြင် ထားဝယ်မြို့ ဝဲကျွန်းရပ်ကွက်တွင် အဖမ်းခံထားရသည့် ဆန္ဒပြလှုပ်ရှားမှုသပိတ်ဦးဆောင်သူ ကိုအောင်ဝေယံကျော် ကိုလည်း ဇွန်လ ၂၁ ရက်နေ့က ထောင်ဒဏ် ၄ နှစ်အမိန့်ချခံထားရသည်။
