မွန်သတင်းအေဂျင်စီ (ဇူလိုင် ၃၀)
မွန်ပြည်နယ်ကမ်းရိုးတန်း၌ ပင်လယ်ဆိပ်ကမ်းနှင့် အထူးစက်မှုဇုန်တည်ဆောက်မည်ဖြစ်ကြောင်း ဇူလိုင် ၂၉ ရက်နေ့က ဂျပန်ကုမ္ပဏီများတက်ရောက်သော Online ရင်းနှီးမြှုပ်နှံမှုဖိုရမ်တစ်ခုတွင် နိုင်ငံတော်အတိုင်ပင်ခံ ဒေါ်အောင်ဆန်းစုကြည် ပြောကြားလိုက်သည်။
အိန္ဒိယသမုဒ္ဒရာနှင့်ဆက်စပ်လျှက်ရှိသော မွန်ပြည်နယ်ကမ်းရိုးတန်းတွင် ဆောက်လုပ်ရန်စီစဉ်ထားသည့် အဆိုပါ ပင်လယ်ဆိပ်ကမ်းနှင့် အထူးစက်မှုဇုန်စီမံကိန်းသည် ထိုင်းနှင့်ဗီယက်နမ်တို့အား ဆက်သွယ်မည့်အဝေးပြေးလမ်းမကြီးလည်း ပါဝင်မည်ဖြစ်ကြောင်း NIKKEI Asia Review Online က ရေးသားဖော်ပြသည်။
ဒေါ်အောင်ဆန်းစုကြည်က”အလုပ်အကိုင်ဖန်တီးပေးမှုဟာ ကျမတို့ နိုင်ငံ ဖွံ့ဖြိုးတိုးတက်မှုအစီအစဉ်ရဲ့ အဓိကအချက်ပဲ” ဟု ဆိုသည်။
ဒေါ်အောင်ဆန်းစုကြည် ဦးဆောင်သော မြန်မာအစိုးရအနေဖြင့် အလုပ်အကိုင်အခွင့်အလမ်းများနှင့် နိုင်ငံခြားရင်းနှီးမြှုပ်နှံမှုများကို အားပေးမြှင့်တင်ရန်အတွက် မွန်န်ပြည်နယ်တွင် အထူးစီးပွားရေးဇုန်အသစ်တစ်ခု တည်ဆောက်ရန် ကြေငြာခြင်းဖြစ်သည်။
ရင်းနှီးမြှပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဦးသောင်းထွန်းက “ဒီစီးပွားရေးဇုန်အသစ်ဟာ မြန်မာနိုင်ငံရဲ့အခြားစီးပွားရေးဇုန်တွေထက်ပိုကြီးပြီး ပိုကောင်းတဲ့ချိတ်ဆက်မှုရှိပါလိမ့်မယ်” ဟု အဆိုပါ Online ရင်းနှီးမြှုပ်နှံမှုဖိုရမ်တွင် ပြောကြားခဲ့သည်။
မြန်မာနိုင်ငံအနေဖြင့် နိုင်ငံခြားတိုက်ရိုက်ရင်းနှီးမြှုပ်နှံမှုကို ပိုမိုဆွဲဆောင်ရန်မျှော်လင့်နေပြီး ၂၀၁၁ ခုနှစ်မှ လက်ရှိကာလအထိ ဂျပန်နိုင်ငံ၏ရင်းနှီးမြှုပ်နှံမှုမှာ ဒေါ်လာ ၁.၇ ဘီလီယံရှိခဲ့သည်။
ဂျပန်-မြန်မာစီးပွားရေး ကော်မတီ ဥက္ကဌ Ken Kobayashi က “ကိုရိုနာဗိုင်းရပ်စ်ကြောင့် ထောက်ပံ့ရေးကွင်း ဆက်တွေကို ပြန်လည်လှုပ်ရှားနိုင်ဖို့ စဉ်းစားရပါတယ်၊ မြန်မာနိုင်ငံဟာ စက်ရုံတွေ ပြန်လည်နေရာချထားနိုင်မှာဖြစ်တဲ့အတွက် ပိုမိုအာရုံစိုက်စရာ ဖြစ်လာလိမ့်မယ်လို့ ထင်ပါတယ်” ဟု ပြောသည်။
လက်ရှိမြန်မာနိုင်ငံတွင် ဂျပန်နှင့်ပူးတွဲဖွင့်လှစ်သော သီလဝါအထူးစီးပွားရေးဇုန်ရှိနေပြီး တရုတ်နိုင်ငံနှင့်ပူးတွဲဖွင့်လှစ်သွားမည့် ရခိုင်ပြည်နယ် ကျောက်ဖြူအထူးစီးပွားရေးဇုန်ဆောက်လုပ်ရေးအတွက် လုပ်ငန်းစတင်နိုင်ခြင်းမရှိသေးပေ။
COVID-19 ကပ်ရောဂါကြောင့် ကမ္ဘာ့စီးပွားရေးကျဆင်းလာမှုတွင် မြန်မာပြည် အထည်လိပ်နှင့် အထည်ချုပ်လုပ်ငန်းမှ အလုပ်သမား ၈ သိန်းခန့် ထိခိုက်ခဲ့ကြာင်း အပြည်ပြည်ဆိုင်ရာ အလုပ်သမားရေးရာအဖွဲ့ ILO က ထုတ်ပြန်ခဲ့သည်။
(NIKKEI Asia Review)
