မွန်ပြည်နယ်တွင် ၂၀၁၈ တက္ကသိုလ်ဝင်တန်းစာမေးပွဲဖြေဆိုမည့် ကျောင်းသူ/သား ၂၇၅၈၈ ဦးရှိသည်ဟု မွန်ပြည်နယ် ပညာရေးမှူးရုံးထံမှ သိရသည်။မွန်ပြည်နယ်၏ ၂၀၁၇-၂၀၁၈ ပညာနှစ် တက္ကသိုလ်ဝင်တန်းအောင်ချက်ကောင်းစေရန် ပညာသင်နှစ် စကတည်းကပင် စီမံချက်ရေးဆွဲပြီး အချိန်ပိုသင်ကြားခြင်း၊ ဖြည့်စွတ်သင်ကြားခြင်း၊ ကုစားသင်ကြားခြင်း၊ ဘာသာရပ်ဟောပြောပွဲများကျင်းပခြင်း၊ ၃ နာရီမေးခွန်း အကြိုစာမေးပွဲများကျင်းပခြင်း၊ အောင်ချက်နည်းသည့်မြို့နယ်တို့ကို ကြပ်မတ်ဆောင်ရွက်ခြင်းများဖြင့် စနစ်တကျ ဆောင်ရွက်လျက်ရှိသည်ဟု ပြည်နယ်ပညာရေးမှူး ဦးမျိုးတင်အောင်က ပြောသည်။
ပြင်ပဖြေဆိုသူများအပါအဝင်၂၀၁၈ တက္ကသိုလ်ဝင်တန်းစာမေးပွဲဖြေဆိုကြမည့် ကျောင်းသူ/သား ၂၇၅၈၈ ဦးတို့သည် ပြည်နယ်အတွင်းရှိ စာစစ်ဌာန ၅၀ ခုတို့တွင် ဝင်ရောက်ဖြေဆိုကြမည်ဖြစ်သည်ဟု ဦးမျိုးတင်အောင်က ဆက်ပြောသည်။
၂၀၁၈ တက္ကသိုလ်ဝင်တန်းစာမေးပွဲကို မတ်လ ၇ ရက်နေ့တွင် စတင်ဖြေဆိုရမည်ဖြစ်ပြီး စာမေးပွဲစစ်ဆေးမှုသည် မတ်လ ၁၆ ရက်နေ့ထိဖြစ်သည်။
မွန်ပြည်နယ်တွင် အထကကျောင်း ၉၂ ကျောင်း၊ အထက (ခွဲ) ၆၆ ကျောင်းနှင့် ကိုယ်ပိုင်ကျောင်း ၉ ကျောင်း စုစုပေါင်း တက္ကသိုလ်ဝင်တန်းဖြေဆိုသည့်ကျောင်း ၁၆၇ ကျောင်းရှိသည်ဟု ပြည်နယ်ပညာရေးမှူးရုံးမှ သိရသည်။
မွန်ပြည်နယ်၌ ၂၀၁၅-၂၀၁၆ ပညာသင်နှစ်တွင် စာရင်းရှိ တက္ကသိုလ်ဝင်တန်း စာမေးပွဲဖြေဆိုသည့် ကျောင်းသူ/သား ၂၀၇၀ဝ ဦးကျော်ရှိခဲ့ကာ ၂၀၁၆-၂၀၁၇ ပညာသင်နှစ်တွင် စာရင်းရှိ ကျောင်းသူ/သား ၂၄၁၀ဝ ဦးကျော်ရှိသည်ဟု ပြည်နယ်ပညာရေးမှူးရုံးရှိ စာရင်းအရ သိရသည်။
မွန်ပြည်နယ်သည် မြန်မာတနိုင်ငံလုံးတွင် ၆ နှစ်ဆက်တိုက် အောင်ချက်အကောင်းဆုံး ရရှိလာခဲ့ရာ ၂၀၁၄-၂၀၁၅ ပညာသင်နှစ်တွင် ဒုတိယနေရာသို့ အောင်ချက်ကျခဲ့သော်လည်း ၂၀၁၅-၂၀၁၆ ပညာသင်နှစ်မှစကာ ပထမနေရာပြန်လည်ရရှိလာခဲ့သည့် ပြည်နယ်ဖြစ်သည်။
