ရေးမြို့အနောက်ဘက် ကပ္ပလီပင်လယ်ပြင် ဝါးကျွန်းအနောက်ဘက်ရေမိုင် ၄၅မိုင်တွင် အောက်တိုဘာလ ၂၆ ရက်နေ့ ညပိုင်းက ရေလုပ်ငန်းရှင် ဦးအေးထွန်းပိုင်ဆိုင်သော စိန်ပိုက်ငါဖမ်းစက်လှေပေါ်တွင်ရေလုပ်သားအချင်းချင်းစကားများရန်ဖြစ်မှုကြောင့် ရေလုပ်သားတစ်ဦးသေဆုံးခဲ့ကြောင်း ရေးမြို့မစခန်းမှူး ဒုရဲမှူး စိုးမွန်က ပြောကြားသည်။
” ငါးဖမ်းစက်လှေပေါ်မှာရှိတဲ့ ပိုက်ဖာဓားနဲ့ထိုးခဲ့တယ်လို့သိရတယ်၊တရားခံကို ဖမ်းဆီးရမိအမှုဖွင့်ထားပြီး စစ်ဆေးဆောင်ရွက်နေပါတယ် ” ဟု ၄င်းကပြောသည်။
ဖြစ်စဉ်င်္နှင့်ပတ်သက်၍ အောင်အောင်အား မမစ(ရေး) (ပ)၃၅၅ အမှုကြီးနှစ်စဉ်အမှတ်၁၇/၂၀၁၇ ၊ ရာဇသတ်ကြီးပုဒ်မ ၃၀၂ အရ အောက်တိုဘာလ ၂၇ ရက်နေ့နံနက်ပိုင်းအချိန်တွင် ရေးမြို့မရဲစခန်းတွင် ဖမ်းဆီးထားရှိပြီးလိုအပ်သောစစ်ဆေးဆောင်ရွက်မှုများ ဆောင်ရွက်နေကြောင်း ရေးမြို့မရဲစခန်းကသိရသည်။
ပင်လယ်ပြင်၏သဘာဝအရ လူမှုဆက်ဆံရေးနယ်ပယ်ကျဉ်းမြောင်းသည့်အတွက်စိတ်ပိုင်းဆိုင်ရာအားဖြင့် ဒေါသထွက်လွယ်ကြောင်း၊ စိတ်ပင်ပန်းမှုများလည်းရှိကြောင်း၊ လူသတ်လက်နက်များအနေဖြင့်လည်းလှေအတွင်း အဆင်သင့်ရှိနေပြီး စိတ်မထိန်းနိုင်ပါက အလွယ်တကူ
ကျူးလွန်မိစေနိုင်ကြောင်း ရေးမြို့နယ်ငါးလုပ်ငန်းဦးစီးဌာန ဦးစီးမှူးဦးဇော်မင်းဦးက ပြောဆိုထားသည်။
” ထွက်ပေါက်အနေနဲ့ တခဏလေးထင့်စကားလေးပြောခံရတာနဲ့တင်လက်ကပါသွားတာကြောင့်လဲ လူသတ်မှုတွေဖြစ်သွားနိုင်ပါတယ်၊ အဲဒီတော့
ကျွန်တော်တို့အနေနဲ့ သူတို့ကို စိတ်ဖြောင်းဖျမှုအပိုင်းတွေပါထည့်ပြီးတော့လုပ်ငန်းရှင်တွေအနေနဲ့ ဆောင်ရွက်ပေးနိုင်မှပဲ အဆင်ပြေလာမယ်လို့
ကျွန်တော်ထင်ပါတယ် ” ဟု ၄င်းက မှတ်ချက်ပြုသည်။
ယခုနှစ် အောက်တိုဘာလ ၁၇ ရက်နေ့အထိ ပင်လယ်ငါးဖမ်းလုပ်ငန်းနှင့်ပတ်သက်သောသေမှုသေခင်းနှင့် လူသတ်မှုပေါင်း ၅၀ ခု ဖြစ်ပွားခဲ့သည်ဟုရေးမြို့နယ်ရဲတပ်ဖွဲ့မှူးရုံးမှတ်တမ်းများအရ သိရသည်။
