မွန်  ၊ အင်္ဂလိပ် ၊  Font

Breaking News
Home / သတင်း / ဓားပြအဖွဲ့နှင့် ဆက်စပ်သည့် လက်နက်များ ရေးမြို့တွင် ဆက်တိုက်ဖမ်းဆီးရမိ

ဓားပြအဖွဲ့နှင့် ဆက်စပ်သည့် လက်နက်များ ရေးမြို့တွင် ဆက်တိုက်ဖမ်းဆီးရမိ

ရေးသားသူ: >
လက်နက်ကိုင်ဓားပြအဖွဲ့ခေါင်းဆောင် မွန်ချမ်း(Internet)
လက်နက်ကိုင်ဓားပြအဖွဲ့ခေါင်းဆောင် မွန်ချမ်း(Internet)
လွတ်လပ်သော မွန်သတင်းအေဂျင်စီ – မွန်ပြည်နယ်၊ ရေးမြို့နယ် တောင်ပိုင်းတွင် မွန်ချမ်း ဦးဆောင်လှုပ်ရှားသည့် လက်နက်ကိုင်ဓားပြအဖွဲ့မှ အဖွဲ့ဝင်နှစ်ဦးကို စက်တင်ဘာလ ၃ ရက်နေ့တွင် ရေးမြို့ တံတားကြီးဂိတ်၌ တပ်မတော်က ဖမ်းဆီးရမိပြီး စစ်ဆေးဖော်ထုတ်ရာမှ လက်နက်များ ဆက်တိုက်ဖမ်းဆီးရမိခဲ့သည်ဟု သက်ဆိုင်ရာနှင့် နီးစပ်သူများထံမှ သိရသည်။

ဖမ်းဆီးရမိသူနှစ်ဦးကို တပ်နှင့် ရဲတပ်ဖွဲ့တို့ ပူးပေါင်းစစ်ဆေးဖော်ထုတ်ရာမှ အေကေ (၄၇) သေနတ်တစ်လက်ကိုလည်းကောင်း၊ ရေးမြို့နယ် အဘော်ကျေးရွာ၊ မွေးမြူရေးဇုံအနီးရှိ စားသောက်ဆိုင်တစ်ဆိုင်မှ လက်နက်ငယ် ၃ လက်နှင့် ခဲယမ်းအချို့ကိုလည်းကောင်း၊ ခေါဇာမြို့တွင် လက်နက်၊ လက်ပစ်ဗုံးနှင့် မိုင်းများကိုလည်းကောင်း၊ ရေးမြို့ သီရိမာလာရပ်ကွက်နှင့် ရေးမြို့နယ် မြောက်ပိုင်း အာယုတောင်ကျေးရွာတို့တွင် လက်နက်ငယ်များကိုလည်းကောင်း အသီးသီး ဖမ်းဆီရမိပြီး၊ မူးယစ်ဆေးဝါးမှုများကိုလည်း ဖော်ထုတ်ဖမ်းဆီးနိုင်ခဲ့သည်ဟု ရဲတပ်ဖွဲ့နှင့် နီးစပ်သူတစ်ဦးက ပြောသည်။

၎င်းက “တံတားကြီး စစ်ဆေးရေးဂိတ်မှာ မွန်ချမ်းအဖွဲ့က နှစ်ယောက်ကို စစ်တပ်က ဖမ်းမိတာစပြီး ကွင်းဆက်ကို လိုက်တော့ မူးယစ်ဆေးဝါးတွေ၊ လက်နက်တွေ၊ လက်ပစ်ဗုံးတွေ၊ မိုင်းတွေ ဆက်တိုက်ဆိုသလို သိမ်းဆည်းနိုင်ခဲ့တယ်။ လက်နက်ငယ် ၁၀ လက်လောက် သိမ်းဆည်းနိုင်ခဲ့တယ်” ဟု ပြောသည်။

စက်တင်ဘာလ ၁၀ ရက်နေ့ ညနေပိုင်းတွင် ရေးမြို့၊ အောင်မေတ္တာရပ်ကွက်ရှိ မွန်ချမ်း၏ နေအိမ်ကို တပ်နှင့် ရဲတပ်ဖွဲ့ဝင်များ ဝင်ရောက်စီးနင်း ရှာဖွေရာမှ မွန်ချမ်းနှင့် သက်ဆိုင်သည့် စာရွက်စာတမ်းအချို့ကိုလည်းကောင်း၊ ၎င်း၏ဇနီးထံမှ သိန်း ၁၂၀ ကျော် တန်ဖိုးရှိ ရွှေထည်ပစ္စည်းများကိုလည်းကောင်း သိမ်းဆည်းရမိသည်ဟု သူက ပြောသည်။

အောင်မေတ္တာရပ်ကွက်မှ အမည်မဖော်လိုသူတစ်ဦးက “ဒီလိုလက်နက်ကိုင်ဓားပြအဖွဲ့တွေရဲ့ဒဏ်ကို ဒေသတစ်ခုလုံး ခံစားနေရတာ ကြာပြီ။ မြို့ပေါ်မှာ ဒီလိုလက်နက်တွေ ရှိနေတာဟာ စိုးရိမ်စရာပဲ။ ဒါပေမဲ့ ခုလိုဖော်ထုတ်ဖမ်းဆီးနိုင်တာကို ကြိုဆိုပါတယ်” ဟု ပြောသည်။

ဓားပြခေါင်းဆောင် မွန်ချမ်းသည် ရေးတောင်ပိုင်းတွင် လှုပ်ရှားခဲ့သည့် ဓားပြအဖွဲ့ကို နှိမ်နင်းရန်အတွက် ၂၀၁၄ ခုနှစ်တွင် တပ်မတော်၏ အစီအစဉ်ဖြင့် နိုင်ဗင်း ဦးဆောင်သည့် မွန်ငြိမ်းချမ်း ကာကွယ်ရေးတပ်ဖွဲ့သို့ ဒုအဖွဲ့ခေါင်းဆောင်အဖြစ် ရောက်ရှိခဲ့သော်လည်း နောက်ပိုင်းတွင် နိုင်ဗင်းအဖွဲ့မှ ခွဲထွက်ကာ ဆက်ကြေးကောက်ခြင်း၊ ပြန်ပေးဆွဲခြင်း၊ ဓားပြတိုက်ခြင်းဖြင့် ထိုဒေသတွင် ဆက်လက်လှုပ်ရှားနေသူ ဖြစ်သည်။

သြဂုတ်လ ၂၅ ရက်နေ့က မွန်ချမ်း ဦးဆောင်သည့်အဖွဲ့က ရေးမြို့နယ် တောင်ပိုင်း၊ ခေါဇာမြို့နယ်၊ ဓနိသကြားကျေးရွာအနီးတွင် နိုင်ဗင်းနှင့် နိုင်လင်းဦး ဦးဆောင်သည့် မွန်ငြိမ်းချမ်းကာကွယ်ရေးတပ်ဖွဲ့ကို ဝင်ရောက်ပစ်ခတ်ရာမှ မွန်ငြိမ်းချမ်း ကာကွယ်ရေးတပ်ဖွဲ့မှ နှစ်ဦး ဒဏ်ရာရရှိခဲ့သည်။

နောက်ဆုံးရရှိသည့်သတင်းအရ ဓားပြအဖွဲ့ခေါင်းဆောင် မွန်ချမ်းကို ယခုလအတွင်း အလင်းဝင်ရန် သို့မဟုတ် အဖမ်းခံစေရန် မိသားစုဝင်များက ရေးမြို့အခြေစိုက် စကခ (၁၉) ထံ တာဝန်ခံထားကြောင်း သိရသည်။

About မွန်သတင်းအေဂျင်စီ

Check Also

ရေးမြို့နယ်ပင်လယ်ပြင်အတွင်း ရေလုပ်သားတစ်ဦးသံပိုက်ဖြင့်အရိုက်ခံ ရေထဲပြုတ်ကျခဲ့

မွန်ပြည်နယ်၊ ရေးမြို့နယ် ကပ္ပလီပင်လယ်ပြင်အတွင်း အစင်ကျေးရွာ စိန်ပိုက်ငါးဖမ်းလှေရေလုပ်သားတစ်ဦး သံပိုက်ဖြင့်အရိုက်ခံရသဖြင့် ရေထဲပြုတ်ကျသည့်တစ်လခန့်ကြာဖြစ်စဉ်အား စက်တင်ဘာလ၂၀ ရက်နေ့တွင် အမှုတိုင်ကြားခဲ့ကြောင်း ရေးမြို့မရဲစခန်းမှ သိရသည်။ Related

Leave a Reply

%d bloggers like this: