မွန်ပြည်နယ်၊ ရေးမြို့နယ်၊ လမိုင်းမြို့အနီး မော့ကနင်ကုန်းပေါ်ရွာသစ်တွင် ယနေ့ စက်တင်ဘာလ ၂၄ ရက်နေ့ ညနေ ၃ နာရီခန့်အချိန်တွင် အုတ်ဖြင့် ဆောက်ထားသည့်စင် ပြိုကျပြီး ကျောင်းသား ၃ ဦး သေဆုံးကာ ကျောင်းသား ၃ ဦးနှင့် အမျိုးသားတစ်ဦး ထိခိုက်ဒဏ်ရာရရှိကြောင်း ဒေသခံတို့ထံမှ သိရသည်။
မော့ကနင်ကုန်းပေါ်ရွာသစ် ဘောလုံးကွင်းတွင် ဆောက်ထားသည့် အုတ်စင်သည် မိုးအဆက်မပြတ်ရွာသွန်းမှုကြောင့် ပြိုကျသွားခဲ့ခြင်း ဖြစ်သည်ဟု ဆိုသည်။
အုတ်စင် ပြိုကျချိန်တွင် ဘောလုံးဖွင့်ပွဲအခမ်းအနားအတွက် ကျောင်းသား၊ ကျောင်းသူများက ဘောလုံးပွဲ ကြည့်ရန် စင်ပေါ် ရောက်ရှိနေကြချိန်ဖြစ်သည့်အတွက် ကျောင်းသားများ ထိခိုက် သေဆုံးမှု ရှိခဲ့သည်။
ဒေသခံတစ်ဦးက “စင်ကို အရင်က မွန်အမျိုးသားနေ့အတွက် ကွန်ကရစ်တိုင်တွေ အုတ်တွေနဲ့ ဆောက်ထားတာပါ။ ဒီနေ့တော့ ဘောလုံးပွဲ ဖွင့်ပွဲအတွက် သုံးတဲ့အချိန်မှာ ပြိုကျသွားတာ၊ တိုင်တွေလည်း ပြိုကျသွားတာကြောင့် ကျောင်းသား ၃ ဦးက သေဆုံးတယ်။ ကျန်တဲ့ ကျောင်းသား ၃ ဦးနဲ့ ဒီက ရွာသားတစ်ဦးက ထိခိုက်ဒဏ်ရာရခဲ့တယ်” ဟု ပြောသည်။
သေဆုံးသူကျောင်းသား ၃ ဦးကို လမိုင်းမြို့ ရင်ခွဲရုံသို့ ပို့ဆောင်ခဲ့ပြီး၊ ဒဏ်ရာရသူ ၄ ဦးကို လမိုင်းမြို့ပြည်သူ့ဆေးရုံသို့ အရေးပေါ် ဆေးကုသနေကြောင်း၊ ဒဏ်ရာရသူများထဲမှ ၂ ဦးသည် ဒဏ်ရာ ပြင်းထန်နေကြောင်း နီးစပ်သူများက ပြောသည်။
“ခုတော့ သေဆုံးသူရဲ့ အလောင်တွေကို ရွာကို ပြန်ပို့ထားပြီး၊ ဒဏ်ရာရသူတွေကတော့ လမိုင်ဆေးရုံမှာ ဆက်လက်ကုသပေးနေတယ်။ နှစ်ဦးက ဒဏ်ရာ ပြင်းထန်နေတယ်” ဟု အခြားဒေသခံတစ်ဦးက ဆိုသည်။
သေဆုံးသူများနှင့် ဒဏ်ရာရသူများသည် မော့ကနင်ကုန်းပေါ်ရွာသစ် အခြေခံပညာအလယ်တန်းကျောင်းတွင် ပညာသင်ကြားနေသည့် အသက် ၁၃ နှစ်မှ ၁၄ နှစ်အရွယ်၊ ၆ တန်းနှင့် ၇ တန်းကျောင်းသားများ ဖြစ်ကြောင်း ဒေသခံတို့ထံမှ သိရသည်။
