မွန်ပြည်နယ်၊ ကျိုက်ထိုမြို့နယ်၊မရမ်းချောင်ကျေးရွာအနီးရှိ ပိန္နဲပင်အကွေ့တွင် ယာဉ်နှစ်စီး မျက်နှာချင်းဆိုင်တိုက်မိပြီး ၃ ဦးသေဆုံးသွားကြောင်း သိမ်ဇရပ်နယ်မြေရဲစခန်းမှ သတင်းရရှိသည်။
ဖြစ်စဉ်မှာ သြဂုတ်လ (၁၃) ရက်နေ့၊ ညနေပိုင်းက မော်လမြိုင်မှ ရန်ကုန်ဘက်သို့ မောင်းနှင်လာသော ယာဉ်အမှတ် (7E/3805) အဖြူရောင် ပရိုဘောက်ယာဉ်သည် ကျိုက်ထိုမြို့နယ်၊ မရမ်းချောင်ကျေးရွာ၊ ပိန္နဲပင်ကွေ့ မိုင်တိုင်အမှတ်(၉၁/၁) နှင့် (၉၂/၂) ကြား အရောက်တွင် အရှိန်မထိန်းနိုင်ဘဲ ရန်ကုန် ဘက်မှ မောင်းနှင်လာသော ပုသိမ်-မော်လမြိုင် ယာဉ်လိုင်း ကံထူးအောင်မှန်လုံယာဉ်ကို မျက်နှာချင်းဆိုင်တိုက်မိရာ ပရိုဘောက်ယာဉ်မောင်းမှာ နေရာတွင်ပင် ပွဲချင်းပြီးသေဆုံးခဲ့ပြီး ၄င်းနှင့်အတူလိုက်ပါလာသော အမျိုးသားတစ်ဦးနှင့် အမျိုးသမီးတစ်ဦးမှာသိမ်ဇရပ် ဆေးရုံသို့ ပို့ဆောင်စဉ် သေဆုံးသွားကြောင်း သိမ်ဇရပ်နယ်မြေရဲစခန်းမှ သိရှိရသည်။
ဖြစ်စဉ်နှင့် ပတ်သက်ပြီး ပရိုယာဉ်မောင်းကို ပ ၂၇/၂၀၁၇၊ ယာဉ်မဆင်မခြင်မောင်းနှင်မှု၊ ရာဇသတ်ကြီးပုဒ်မ ၃၀၄(က)၊၃၃၈ ဖြင့် အမှုဖွင့်အရေးယူထားပြီး သေဆုံးသူများကို သိရှိပါက သိမ်ဇရပ်နယ်မြေရဲစခန်း ဖုန်းနံပါတ် ဝ၅၇ ၆၂၀၉၂ ကိုဆက်သွယ်ပေးကြပါရန် သိမ်ဇရပ်နယ်မြေ စခန်းမှူးက ကြေညာထားသည်။
အလားတူ ကျိုက်ထိုမြို့နယ်၊ ကော့ဘိန်းကျေးရွာအနီး၊ ရန်ကုန်-မော်လမြိုင်အဝေးပြေးကားလမ်းပေါ် ၌ ဇူလိုင်လ ၁၂ ရက်နေ့ ည ၁၀ နာရီခန့်က ခရီးသည်တင်မှန်လုံယာဉ် နှစ်စီးမျက်နှာချင်းဆိုင် တိုက်မိခဲ့ပြီး ၃ ဦးသေဆုံးကာ ၃၂ ဦးဒဏ်ရာရရှိခဲ့ကြောင်း မီဒီယာများတွင် သတင်းဖော်ပြခဲ့သည်။
