ထိုင်းနိုင်ငံမှ ကန်ကလာချန် Kaeng Krachan Forest သစ်တောဥယျာဉ်ကို ကမ္ဘာ့အမွေအနှစ်စာရင်း (UNESCO)ဝင်ရန်တင်သွင်းရာ မြန်မာနိုင်ငံမှ ကန့်ကွက်မှုကို ကမ္ဘာ့အမွေအနှစ်ကော်မတီ အစည်းအဝေးက လက်ခံခဲ့ပြီး ထိုင်နိုင်ငံအားနောက်တစ်နှစ် ထပ်မံကြိုးစားရန် ဆုံးဖြတ်ခဲ့ကြောင်း ကမ္ဘာ့အမွေအနှစ် ဒေသများဌာနခွဲ က သိရသည် ။
ယင်းကန်ကလာချန်ဥယျာဉ်ကို နယ်မြေပိုင်နက် (Coordinate)မျဉ်းများရေးဆွဲရာ၌ မြန်မာနိုင်ငံနယ်နမိတ် (၃၄) ရာခိုင်နှုန်း ပါဝင်နေသည့်အတွက် မြန်မာနိုင်ငံမှ ကန့်ကွက်ကြောင်း တင်ပြခဲ့ခြင်းဖြစ်သည် ။
ယင်းဆုံးဖြတ်ချက်ကို ပြင်သစ်နိုင်ငံ ပါရီမြို့ရှိ ယူနက်စ်ကို (UNESCO) ရုံးချုပ်တွင် အောက်တိုဘာ (၂၄) ရက်နေ့ မှ(၂၆) ရက်နေ့အထိကျင်းပသည့် ကမ္ဘာ့အမွေအနှစ် ကော်မတီ၏ Extra Ordinary Meeting ၌ ဆုံးဖြတ်ခဲ့ခြင်းဖြစ်သည် ။
“ထိုင်း နဲ့ မြန်မာ ပိုင်နက် ထိစပ်နယ်မြေသတ်မှတ်မှု မပြီးသေးပါဘူး ။ နှစ်နိုင်ငံညိှနိှုင်းမှုတော့ မရှိပါဘူး ။ ဒီလိုနယ်နိမိတ်မသတ်မှတ်ရသေးပဲ ထိုင်းဘက်က ယူနက်စ်ကို ဝင်ဖို့တင်တာပါ ။ ဒါကို ယူနက်စ်ကိုကလည်း လက်မခံပါဘူး ။ သူတို့ကတော့ ဒီနယ်နိမိတ် သတ်မှတ်ပြီးတဲ့ အထိစောင့်ရမှာဖြစ်တယ်” ဟု သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဋ္ဌာန ဝန်ကြီးရုံး (သစ်တော) ညွှန်ကြားရေးမှူး ဦးမျိုးမင်း က ပြောသည် ။
ထို့အပြင် ကန်ကလာချန်သစ်တောဥယျာဉ်အတွင် မြန်မာနိုင်ငံမှ မြေဧရိယာ ဟက်တာ တစ်သောင်းခန့် ပါဝင်ပြီး ယင်းမြေပေါ်တွင် ကရင်မျိုနွယ်စုတစ်ချို့ နေထိုင်လုပ်ကိုင်စားသောက်နေကြကြောင်း သိရသည် ။
ယင်းကရင်မျိုးနွယ်စုများနှင့် ပတ်သတ်၍ တိကျသည့် စီမံခန့်ခွဲမှုစနစ်များ ရေးဆွဲတင်ပြရန် ကမ္ဘာ့အမွေအနှစ်ကော်မတီက ဆုံးဖြတ်ချက်ချခဲ့သည့် အပြင် နှစ်နိုင်ငံနယ်နိမိတ် ပြန်လည်သတ်မှတ်ကာ ညိှနိှုင်းဆောင်ရွက်ရန်လည်း ပါဝင်ကြောင်း ကမ္ဘာ့အမွေအနှစ် ဒေသများဌာနခွဲ က သိရသည် ။
ယင်းကန်ကလာချန်သစ်တောဥယျာဉ်သည် ထိုင်းနိုင်ငံRatchaburi, Phetchaburi, Prachuab Kirikhanစသည့်ခရိုင် ၃ ခုနှင့် မြန်မာနိုင်ငံ တနင်္သာရီကမ်းမြောင်ဒေသရှိ တနင်္သာရီလေညာသစ်တောကြိုးဝိုင်းတို့နယ်နိမိတ်ချင်းထိစပ်ခြင်းဖြစ်ပြီး ၂၀၁၀ – ၂၀၁၁ ခုနှစ် ကတည်းက ကမ္ဘာ့အမွေအနှစ်စာရင်း (UNESCO)ဝင်ရန်တင်သွင်းခဲ့ခြင်းဖြစ်ကြောင်း သိရသည် ။
ထိုင်းနှင့် မြန်မာနိုင်ငံသည် ၁၃၀၀ မိုင်ကျော် နယ်နိမိတ်မြေထိစပ်မှုရှိသော်လည်း တိကျသောနယ်ခြားမှုတ်တိုင် စိုက်ထူခြင်း မရှိသေးပေ။
