သၟတ်ဇူဒီုဒၟံင် အကြာဘာလကျာ် တိုန်ဒၟံင်တန်ဗ္တောန် သွက်ဂွံတိတ်ဍုင်မ္ၚး လ္တူဍုင်လ္ဂုင်ဂမၠိုင်တအ်ဂှ် ဟိုတ်နူဒပ်ပၞာန်ဗၟာတအ် ဗက်ရပ်သၟတ်တအ်တေင်ဂြတ် ကၠုင်ဂှ်တုဲ ကျာ်ဇၞော်ဂ္ဇအ်ဘာတအ် မ္ဒးကဵုကလေင်စဴထောံ ဍုင်မန်အိုတ်ရရောင် ညးကြပ်ကဵု ကျာ်ဇၞော်ဂ္ဇအ်ဘာ ဍုင်လ္ဂုင်မွဲတၠ ဟီုလဴထ္ၜးရ။
“လၟုဟ် ပ္ဍဲလ္ဂုင် ဍေံ (ဒပ်ပၞာန်ဗၟာ) တအ် ဗက်ရပ်တေင်တိုန်ကွေံကွေံမွဲတဲ၊ ကၠာတေံတှ်ေ ဗက်ရပ်သၟတ်တအ် ဗတမ်ၜက် အခိင် (၁၀) နာဍဳ (၁၁) နာဍဳဂှ်တှ်ေ ဗက်ရပ်၊ လၟုဟ်ဗီုဂှ်ဟွံသေင်ရ၊ တ္ၚဲပၠိုတ်တိုန်ညိတှ်ေ ဗက်ရပ်တံင်ကေတ်သၟတ်တအ် အကြာဂၠံင် အကြာဇျှော်ခရော် ဒှ်ကၠုင်၊ လဆောဝ်တှ်ေ ဍေံတိုန်ဂၠာဲသီုလတူဘာ၊ ဟိုတ်နူဂှ်ရ သၟတ်ကွးဘာတအ် ဇူဒီုဒၟံင် ပ္ဍဲဘာအတေံ အဏံ နူကွာန်တေံ ကွာန်ဏံဂှ်တှ်ေ ညးတအ် ဘာတ်ကဵုကလေင်စဴအာ ကွာန်ညး ကွာန်ညးအိုတ်ရ၊ သှ်ေမံင်ပ္ဍဲဘာလဂုင်ဂှ်တှ်ေ မၞိဟ်လွဳယဲ ဇၞော်ဇၞော်တအ်သှ်ေမံင်” သာ်ဝွံ မၞိဟ်ဗြဴအာထ္ၜးယဲလ္ဂုင် နူပွိုင်ဍုင်မုဟ်ဍုင် မၞုံအာယုက် (၆၀) သၞာံပြင်ဂှ် ဟီုထ္ၜးရ။
ပ္ဍဲလ္တူဍုင်လ္ဂုင်ဂှ် သၟတ်နူဍုင်မန်ဒေသနာနာတအ် တိုန်ဒၟံင်ဘာကီု၊ တိုန်ဒၟံင်တန်ဗ္တောန် သွက်ဂွံတိတ်ဍုင်သအာင်ဂှ်ကီု ဇူဒီုဒၟံင် ပ္ဍဲဘာလကျာ်ဂမၠိုင်ဂှ် သ္ပဟိုတ်နူကဵုဒပ်ပၞာန်တအ် ဂစာန်ရပ်ကဵုလုပ်သ္ပပၞာန်တေင်တိုန်ဂှ်တုဲ ဒၟံင်ဟွံၜိုဟ်ဩိုဟ်ဂှ်ရ ကလေင်စဴကၠုင်သ္ၚိဌာန် ပ္ဍဲဍုင်မန်အိုတ်ရ။
“လၟုဟ်တှ်ေ ပ္ဍဲလ္ဂုင်ဂှ် တ္ၚဲပၠိုတ်တိုန်ညိတှ်ေ သ္ၚိတ်ဇြဒၟံင် လောန်နူကွာန်ရးဏီ၊ ကၠာတေံတှ်ေ တ္ၚဲပၠိုတ်တှ်ေ မၞိဟ်အာကၠုင် စဳမံင်အလုံဂၠံင်ဍာန်မွဲ၊ လၟုဟ်တှ်ေ တ္ၚဲပၠိုတ်တိုန်ညိတှ်ေ မၞိဟ်အာကၠုင်ဟွံမွဲရ၊ သၟတ်တအ် ဇူမံင်ဒၟံင် ပ္ဍဲဘာအတေံ အဏံ ဂှ်လေဝ် စဴထောံအိုတ်ရ၊ နူကဵုဍေံရပ်မၞိဟ်ဍောတ်ဍောတ်တအ် တေင်တိုန်ဏံတုဲတှ်ေ သၟတ်တအ်ဟွံဂံင်မံင်အိုတ်ရ၊ ကျာ်ဇၞော်တအ်လေဝ် ဟွံဂံင်ကေတ်တာလျိုင်အိုတ်ရ” သာ်ဝွံ တၠကွဳစက်ဒမြိပ်ပလံင်မၞိဟ်ယဲ ဍုင်မန်ကဵု လ္ဂုင် နူပွိုင်ဍုင်မုဟ်ဍုင်မွဲတၠဂှ် ထပ်ဟီုပၠန်ရ။
ပ္ဍဲရးလ္ဂုင်ဝွံ သၟတ်လုပ်အဝဲဒးယိုက်ဂၠေင်ပၞာန်တအ်ဂှ် ဒပ်ပၞာန်ဗၟာတအ် ရပ်တံင်ဒၟံင် နူလတူသ္ၚိလုပ်စရင်တအ်ကီု၊ အခိင်ဗတမ်ဒမၠုမ္ဂး ဗက်ရပ်တံင်ဒၟံင်သၟတ်အကြာဂၠံင်ဍာန်ကီု အကြာဏံဂှ် ဗက်ရပ်ကေတ်ပ္ဍဲသ္ၚိကီု၊ ဗက်တံင်ရပ်ကေတ် အကြာဂၠံင်ဍာန်ကီု တေင်တိုန်ဒၟံင်ဂှ်တုဲ သၟတ်လတူဍုင်လ္ဂုင်တအ် ရုသံင်ဒၟံင်အိုတ်ရ။
အသိင်ဗက်တံင်ရပ်သၟတ်ပ္ဍဲရးလ္ဂုင်တအ် တေင်ကြံင်တိုန်ကၠုင်ဂှ်တုဲ သၟတ်အာတိုန်ဒၟံင်တန်ဗ္တောန် သွက်ဂွံတိတ်ဍုင်သအာင်တအ်ကီု၊ ညးဍုင်ကွာန်အာထ္ၜးယဲ ဇူဒၟံင်ပ္ဍဲဘာလကျာ်ဂမၠိုင်တအ်ကီု လကိုတ်ဒၟံင်အိုတ်တုဲ ဒးမံင်ဒၟံင်ကဵုသတိ အိုတ်ရောင်ဂှ်လေဝ် မၞိဟ်အာထ္ၜးယဲပ္ဍဲလ္ဂုင်တအ် ဟီုဒၟံင်အိုတ်ရ။
