စပတမ်နူဂိတုသေပ်တေမ်ဗာမံက်ဏံတုဲ ပ္ဍဲဍုင်မန်ဝွံ ပရေင်စၟဳစၟတ်အာကၠုင်ဂှ် ပဵုတုဲတေင်ဂြတ်ကၠုင်ဒၟံင်နွံရောင် တၠကွဳစက်ဒမြိပ်လာင် မတ်မလီု-ရေဝ်မွဲတၠ ဟီုလဴထ္ၜးရ။
လၟုဟ်မ္ဂး ဂကောံပံင်ကောံတၠအဝဵုအလဵုအသဳ နူကဵုနေပျဳတဝ်တအ် စဓမံက်ကၠုင်ရုပ်ရဴ ပရေင်စၟဳစၟတ်တေင်ဂြတ်ကၠုင်တုဲ ပရေင်အာကၠုင်တရဴ ပရေံကၠုင်ဒၟံင်နွံရောင် သ္ဂးရ။
“အကြာမွဲၜါတ္ၚဲဏံ ပရေင်အာကၠုင်ပရေံကွေံကွေံ၊ ဂကောံပံင်ကောံ (တၠအဝဵု) ဍေံ မင်မံင်အတေံ အဏံ ဂၠိုင်ကွေံကွေံ၊ ဍေံဟီုဂှ်တှ်ေ မင်စၟဳစၟတ်ကပေါတ်ဟွံလုပ်သၞောဝ် ကၠုင်နူပယျဵုသေံရ၊ ဆဂး အကြာဂှ်တှ်ေ ကွဳလိုန်ဓာတ်လိုင်ဇြေန် နွံ / ဟွံမွဲ၊ ကွဳစက်လိုင်ဇြေန်နွံ / ဟွံမွဲ၊ အာအလဵု၊ ကၠုင်နူအလဵု၊ ဍေံစၟဳစၟတ်ဒၟံင်နွံ၊ အာကၠုင်စ စိုတ်ဟွံသောင်” သာ်ဝွံ တၠကွဳစက် ဒမြိပ်လာင်ဂှ် ဟီုရ။
ပ္ဍဲဍုင်မန်ဂှ် ထ္ၜးဟိုတ်ကဵု ရပ်စပ်စၟဳစၟတ်ကပေါတ်ဟွံလုပ်သၞောဝ် လုပ်ဒၟံင်ဂၠံင်ပယျဵုဍုင်သေံဂှ်တုဲ ဂကောံပံင်ကောံ (တၠအဝဵု) တအ် ဂၠိုင်ကဵုဂကောံ ဂၠိုင်ကဵုဒၞာဲဂှ် မင်ကြတ်စၟဳစၟတ်ဒၟံင် ညးဍုင်ကွာန်တအ် လတူဂၠံင်ကွဳစက်ဇၞော်မွဲဒမြိပ်နွံရ။
“အဓိကဂှ်တှ်ေ ဂၠံင်ဆက်စပ်ကဵု ဗြဝတဳ ကဵု ဂၠံင်ဆက်စပ်ကဵု ကျာ်ပိ စၟဳစၟတ်ဂၠိုင်၊ စနူဍုင်မတ်မလီု ဍုင်သဓီု ပံင်၊ လ္ပာ်သၟဝ်ဏံတှ်ေ မုဟ်ဍုင် ဇြပ်ဗု ရေဝ် ဖအိုတ်ရ၊ ကွဳစက်တှ်ေ စၟဳစၟတ်ကပေါတ်၊ အကြာဂှ်တှ်ေ သီုကဵုစၟဳစၟတ်လာင်ဇြေန် နွံ / ဟွံမွဲ၊ အဃောဂှ် ဒးစွံသတိမွဲတှ်ေ မၞိဟ်အဝဲထတ်ယုက် မၞိဟ်ဍောတ်ဍောတ်တအ် ဒးစွံသတိဂၠိုင်၊ အာကၠုင်မၞိဟ်မွဲဓဝ်တှ်ေ အာကၠုင်ဟွံထေက်ပုဟ်၊ ဍေံတင်စုတ်ဒုဟ်မွဲမွဲတုဲတှ်ေ ဍေံကော်ဏာ၊ ကၠေံအာ ဗီုဏံ ကတဵုဒှ်ဂၠိုင်ကွေံကွေံ” သာ်ဝွံ ညးဆက်ဟီုရ။
အကြာဂိတုသေပ်တေမ်ဗာမံက်ဏံဂှ် သွာင်ဂၠံင်ဗြဝတဳကီု၊ သွာင်ဂၠံင်ပယျဵုကျာ်ပိကီု ဂကောံစၟဳစၟတ် (တၠအဝဵု) တအ် စၟဳစၟတ် ရပ်ကပေါတ်တိတ်နူသေံ တေင်ဂြတ်ကွေံကွေံတုဲ မွဲအခိင်ဂှ် ညးဍုင်ကွာန် အာတရဴတအ်ကီု၊ ကွဳစက် / ကွဳလိုန်ဓာတ် အာတရဴတအ်ကီု ပရေင်စၟဳစၟတ် တေင်ဂြတ်ကၠုင်နွံရ။
