တော်လှန်ရေးကာလတစ်လျှောက်တွင် အမျိုးသမီးများ အုပ်ချုပ်ရေး၊ တရားစီရင်ရေး၊ ဥပဒေပြုရေးရာကဏ္ဍများ၌ ဦးဆောင်ပါဝင်နိုင်ရန် လိုအပ်နေသေးကြောင်း မွန်ပြည်ဖက်ဒရယ်ကောင်စီဥက္ကမှ မွန်အမျိုးသမီးများနေ့ အခမ်းအနားမိန့်ခွန်းတွင် ထောက်ပြပြောဆိုသည်။
ယနေ့ ၂၂ ကြိမ်မြောက် မွန်အမျိုးသမီးများနေ့အခမ်းအနားကို နယ်စပ်ဒေသရှိ မွန်လူမှုအဖွဲ့အစည်းများဦးဆောင် ကျင်းပခဲ့ရာ မွန်ပြည်ဖက်ဒရယ်ကောင်စီ ဥက္ကဌမှ အထိမ်းအမှတ်မိန့်ခွန်းတွင် ထောက်ပြပြောဆိုသည်။
တော်လှန်ရေးအနောက်တန်းမှနေ၍ ပါဝင်ပံ့ပိုးမှု၊ ပဋိပက္ခကိစ္စရပ်များတွင် ကူညီကယ်ဆယ်မှုနှင့် ပညာရေးကိစ္စများတွင် အမျိုးသမီးများပါဝင်ဆောင်ရွက်မှုများစွာရှိသော်လည်း ဦးဆောင်မှုကဏ္ဍအတွက် လိုအပ်နေသေးကြောင်းနှင့် အမျိုးသားများမှ ပူပေါင်း၍ ပါဝင်ဖော်ဆောင်သွားရန် လိုအပ်သည်ဟု ဆိုသည်။
＂အမျိုသမီးတွေ နယ်ပယ်အသီးသီးမှာ ဦးဆောင်နိုင်ဖို့ တောက်လျှောက်ကြို့ပမ်းလာပေမဲ့ အခုထိ ခရီးရောက်ဖို့လိုနေသေးတယ် ကဏ္ဍအသီးသီးမှာ အမျိုးသမီးတွေ ဦးဆောင်တဲ့နေရာမှာပါဝင်ဖို့ မူဝါဒမှာရော၊ ရွေးချယ်ခန့်အပ်တဲ့နေရာမှာ စဉ်းစားတိုင်း အမျိုးသီးတွေပါဝင်ဖို့ ဦးဆောင်နိုင်ဖို့ အမျို့သားတွေလည်း ဝိုင်းဝန်းပံ့ပိုးပေးရမယ်＂
မွန်ပြည်ဖက်ဒရယ်ကောင်စီအနေဖြင့်လည်း ကဏ္ဍအသီးသီးတွင် အမျိုးသမီးများ ပိုမိုပါဝင်မှုနှင့် ဆုံးဖြတ်ခွင့်ရရှိမှုကို အလေးထားဆောင်ရွက်လျှက်ရှိသည်ဟုလည်း ဆိုသည်။
၎င်းအပြင် မွန်အမျိုးများနေတွင် လူ့ခွင့်အရေးချို့ဖောက်မှုများ အမြန်ဆုံးရပ်တန့်ရန်နှင့် အမျိုးသမီးများ ဦးဆောင်မှုအခန်းကဏ္ဍတွင် ပါဝင်ကာ တာဝန်ခံမှု အပြည့်အဝ ရယူနိုင်ရန်လည်း ယနေ့ ၂၂ ကြိမ်မြောက် မွန်အမျိုးသမီးများနေ့ အထိမ်းအမှတ်အဖြစ် မွန်ပြည်ဖက်ဒရယ်ကောင်စီမှ ထုတ်ပြန်ထားသေးသည်။
ဖိုဝါဒနှင့် လူမျိုးကြီးဝါဒ လွန်စွာကြီးမားပြီး အာဏာရှင်စနစ်အမြစ်တွယ်နေသည့် နိုင်ငံတွင် အခြားတိုင်းရင်းသူ အမျိုးသမီးများနှင့်နည်းတူ မွန်အမျိုးသမီးများလည်း ခေါင်းဆောင်ပိုင်းနှင့် ဆုံးဖြတ်ချက်ကဏ္ဍအတွက် လက်ရှိအချိန်အထိ တိုက်ပွဲဝင်နေရဆဲ၊ တော်လှန်နေရဆဲဖြစ်သည်။
အမျိုးသမီးများ ဦးဆောင်မှုကဏ္ဍအပြင် လုံခြုံရေးနှင့်ပတ်သတ်၍ ထောက်ခံမှုရှိသော လူမှုအသိုင်းအဝိုင်းများ တည်ဆောက်ခြင်း၊ အမျိုးသမီးများ၏ အခွင့်အရေးနှင့် လုံခြုံရေးကို ထောက်ခံသော ကွန်ယက်များနှင့် စနစ်များ ဖွံ့ဖြိုးတိုးတက်ရန်ရည်ရွယ်ကာ အခမ်းအနားတွင် အုပ်စုဖွဲ့ဆွေးနွေးခြင်းအစီအစဉ်များလည်း ပြုလုပ်ခဲ့သည်။
ယနေ့တွင် နယ်စပ်ရှိ မွန်လူမှုအဖွဲ့အစည်းများအပြင် မွန်ပြန်သစ်ပါတီ ဗဟို မွန်အမျိုးသမီးအဖွဲ့ CMWO မှလည်း မွန်ပြည်သစ်ပါတီ ခရိုင်အသီးသီးတွင် ၂၂ ကြိမ်မြောက်မွန်အမျိုးသမီးများနေ့ကို ဦးဆောင် ကျင်းပနေကြောင်းလည်း သိရသည်။
