တနင်္သာရီတိုင်း၊ ရေဖြူမြို့နယ်၊ ကော့လှိုင်ကျေးရွာနှင့် မရမ်းချောင်းကျေးရွာအနီး၌ စစ်ကောင်စီတပ်များနှင့် တော်လှန်ရေးမဟာမိတ်ပူးပေါင်းတပ်ဖွဲ့များကြား ဩဂုတ်လ ၁၉ မှ ၂၅ ရက်နေ့အထိ တိုက်ပွဲဆက်တိုက်ဖြစ်ပွားခဲ့ပြီး စစ်ကောင်စီဘက်မှ ၃၆ ဦးထက်မနည်းသေဆုံးခဲ့ကြောင်း မွန်ပြည်တော်လှန်ရေးတပ်(MSRF)မှ ထုတ်ပြန်ထားသည်။
ကလိန်အောင်အခြေစိုက် ခလရ-၂၈၂ တပ်ရင်းမှ လက်နက်ကြီးများဖြင့် ပစ်ကူခဲ့ပြီး ကော့လှိုင်ကျေးရွာနှင့် မရမ်းချောင်းကျေးရွာကြား အင်အား ၁၅၀ ဖြင့် စစ်ကြောင်းထိုးလာသည့် သြဂုတ် ၁၉ ရက်နေ့မှစ၍ နှစ်ဖက်တိုက်ပွဲ စတင်ပြင်းထန်လာခဲ့သည်။
၇ ရက်တာအတွင်း ထိတွေ့တိုက်ပွဲ အကြိမ်ကြိမ်ဖြစ်ပွားခဲ့ပြီး တော်လှန်ရေးမဟာမိတ်ပူးပေါင်းတပ်ဖွဲ့ဘက်မှ လက်နက်ကြီး၊လက်နက်ငယ်အပြင် ဒရုန်းဖြင့် ဗုံးကျဲတိုက်ခိုက်မှုများ လုပ်ဆောင်ခဲ့သည်ဟု ဖော်ပြထားသည်။
အဆိုပါတိုက်ပွဲများတွင် ရန်သူစစ်ကောင်စီဘက်မှ အနည်းဆုံး ၃၆ ဦးသေဆုံးခဲ့ပြီး၊ ခမရ-၄၀၉ တပ်ရင်းမှ ဗိုလ်မှူးအပါအဝင် စစ်သားအများအပြားဒဏ်ရာရရှိခဲ့ကြောင်း ထုတ်ပြန်ထားသည်။
ယနေ့အထိ ရေဖြူ-ကလိန်အောင်လမ်းပိုင်းတွင် စစ်ရေးအခြေအနေများ ဆက်လက်တင်းမာလျှက်ရှိပြီး၊ ကော့လှိုင်၊ မရမ်းချောင်း၊ မိုင် ၆၀၊ သာယာမွန်ရွာအပါအဝင် ကျေးရွာ ၈ ရွာမှ ဒေသခံ ၅၀၀၀ နီးပါး ဘေးလွတ်ရာ နေရာများသို့ တိမ်းရှောင်နေကြရသည်။
စစ်ကော်မရှင် စစ်ကြောင်းအဖွဲ့ကို တိုက်ခိုက်နေသည့် တော်လှန်ရေးမဟာမိတ် ပူးပေါင်းတပ်ဖွဲ့များတွင် ညီနောင်တပ်ဖွဲ့ဖြစ်သည့် မွန်ပြည်တော်လှန်ရေးတပ် MSRF နှင့်အတူ ပြည်သူ့ကာကွယ်ရေးတပ်မတော် နည်းဗျူဟာ ၃၃၊ ရာမညမွန်တပ်တော် R.M.A၊ ဒေါနစစ်ကြောင်း -(၂) YGF၊ ဒေါနစစ်ကြောင်း – (၃) KBDF ၊ ရေးဘီလူးတပ်ရင်း၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ABSDF တပ်ရင်း (၁)၊ ရေးသိန်းငှက်၊ ကရင်အမျိုးသားလွတ်မြောက်ရေးတပ်မတော် KNLA တပ်မဟာ (၆) တပ်ရင်း (၂၇) နှင့် ကြယ်လင်းရောင်(ဆာကပေါ)တပ်ရင်း KTLA တို့ပူးပေါင်းပါဝင်ခဲ့နေကြောင်း MSRF မှအချက်အလက်အရ သိရသည်။
တိုက်ပွဲများအတွင်း တော်လှန်ရေးမဟာမိတ်ဘက်မှ ထိခိုက်မှုအခြေအနေကို ထုတ်ပြန်ထားခြင်းမရှိသေးသည့်အပြင် ပြောဆိုခွင့်လည်းမရှိသေးကြောင်း တော်လှန်ရေးတပ်ဖွဲ့ တာဝန်ရှိသူများမှ ဆိုသည်။
