မွန်ပြည်နယ်၊ မော်လမြိုင်မြို့၊ ကော့စိန်ကျေးရွာတွင် နေထိုင်သည့် အသက် ၁၃ နှစ် အရွယ်ရှိ Grade-5 ကျောင်းသူတစ်ဦး အဓမ္မပြုကျင့်သတ်ဖြတ်ခံခဲ့ရကြောင်း ဒေသတွင်း သတင်းအရင်း အမြစ်များမှ သိရသည်။
အသက် ၁၃ နှစ်အရွယ်ရှိ မအိယမုံဖူး(ခ)ဝါဆိုမိုးသည် ပြီးခဲ့သည့် မေ ၂၆ ရက်နေ့ နံနက် ၇ နာရီခန့်တွင် ၎င်းကော့စိန်ရွာနေအိမ်မှ အုန်းသီးသွားကောက်ရန် ဆိုကာ ထွက်ခွာသွားပြီးနောက် ပြန်လည်မရောက်ရှိဘဲ ပျောက်ဆုံးနေခဲ့ကြောင်း သိရသည်။
ပျောက်ဆုံးနေသည့် မအိယမုံဖူးကို မေလ ၂၇ ရက်နေ့ နံနက် ၆ နာရီခွဲ အချိန်ခန့်က ဦးမောင်ဦးပိုင်ဆိုင်သည့် ကော့ပေါက်ကွင်းအုန်းခြံ၏ အိမ်ခြံဝင်းအတွင်း သေဆုံးလျှက် ပြန်လည်ရှာဖွေတွေ့ရှိခဲ့သည်ဟု စစ်ကောင်စီအုပ်ချုပ်ရေးအဖွဲ့နှင့် နီးစပ်သူတစ်ဦးက ဆိုသည်။
“ ဖြစ်နေတဲ့နေရာက မော်လမြိုင်နဲ့ နည်းနည်းဝေးနေတာဆိုတော့လေ၊ ကျွန်တော်တို့အနေနဲ့လည်း စုံစမ်းနေတုန်းပဲ”ဟု ၎င်းက ဆိုသည်။
ပြန်လည်ရှာဖွေတွေ့ရှိခဲ့သည့် မအိယမုံဖူး(ခ) ဝါဆိုမိုး၏ ရုပ်အလောင်းသည် အဓမ္မပြုကျင့်ခံထားရပြီး လည်ပင်းလေပြွန်ပြတ်ရှဒဏ်ရာ၊ ယာဘက်မျက်ခုံးပြတ်ရှဒဏ်ရာ၊ အပေါ်နှုတ်ခမ်းပြတ်ရှဒဏ်ရာတို့ဖြင့် မှောက်လျှက်သေဆုံးနေသည်ဟု ဆိုသည်။
မအိယမုံဖူး(ခ)ဝါဆိုမိုးဆိုသူသည် ကော့စိန်ရပ်ကွက်နေ အဘဦးအောင်ဆန်း၊ အမိဒေါ်သန္တာစိုးတို့၏ သမီးဖြစ်ပြီး အ.မ.က(ကော့စိန်)တွင် Grade-5 တက်ရောက်နေသည့် ကျောင်းသူဖြစ်သည်။
လက်ရှိတွင် ၎င်းအမှုနှင့်ပတ်သတ်မှုရှိသည်ဟု ယူဆရသည့် အမျိုးသားနှစ်ဦးကို သက်ဆိုင်ရာတို့က ယမန်နေ့က ဖမ်းဆီးထားပြီး စစ်ဆေးမေးမြန်းမှု လုပ်ဆောင်နေဆဲဖြစ်ကြောင်း သိရသည်။
ပြီးခဲ့သည့် မတ်လ ၁၉ ရက်နေ့ကလည်း ပဲခူးတိုင်းဒေသကြီး၊ တောင်ငူမြို့နယ်၊ ကျွန်းကုန်းကျေးရွာနေ (၉)တန်းကျောင်းသူတစ်ဦးကို အမျိုးသားနှစ်ဦးက အဓမ္မပြုကျင့် သတ်ဖြတ်ခဲ့သည့် ဖြစ်စဉ်လည်း ရှိခဲ့သည်။
စစ်တပ်အာဏာသိမ်းပြီးနောက် နိုင်ငံတွင်း တရားဥပဒေစိုးမိုးပျက်ပြားမှုများလာသည်နှင့်တစ်ပြိုင်နက် ရပ်ရွာလူမှုပတ်ဝန်းကျင်တွင် လက်သည်မပေါ်သည့်သတ်ဖြတ်မှု၊ နောက်ခံအကြောင်းအရာကြောင့် သတ်ဖြတ်ခြင်းတို့ကို ပေါ်ပေါ်ထင်ထင်ကျူးလွန်နေကြကြောင်း လူ့အခွင့်ရေးလှုပ်ရှားသူတို့က ဆိုသည်။
