စစ်ကောင်စီအဖွဲ့မှ အသက် ၈၅ နှစ် ပြည့်ပြီးသည့် သက်ကြီးရွယ်အိုများအား လူမှုရေးပင်စင်အဖြစ် တစ်လ တစ်သောင်းကျပ်ပေးဆောင်နေသည့် ထောက်ပံ့ကြေးပမာဏ နည်းပါးလွန်းကြောင်း သက်ကြီးရွယ်အိုစောင့်ရှောက်နေသူတို့က ဆိုသည်။
အသက် ၈၅ နှစ်ပြည့်ပြီး သက်ကြီးရွယ်အိုများ လူမှုရေးပင်စင် ခံစားရရှိနိုင်ရေး ယခု မေလ ၃၁ ရက်နေ့နောက်ဆုံးထား၍ သက်ဆိုင်ရာ ရပ်ကွက်/ကျေးရွာအုပ်ချုပ်ရေးမှူးများ သို့မဟုတ် နီးစပ်ရာ လူမှုဝန်ထမ်းရုံးများတွင် စာရင်းပေးသွင်းရန်နှင့် အသွားအလာ အခက်ခဲရှိသည့် သက်ကြီးရွယ်အိုများ အနေဖြင့် အိမ်ထောင်စုစာရင်းပါ သား၊သမီး၊မြေး တစ်ဦးဦးမှ ကိုယ်စားလှယ်အဖြစ် စာရင်းသွင်းနိုင်ကြောင်း စစ်ကောင်စီအဖွဲ့မှ ထုတ်ပြန်ထားသည်။
ယခင် NLD အစိုးရလက်ထက်မှ လက်ရှိအချိန်အထိ လူမှုရေးပင်စင်စရိတ်ကို အသက် ၈၅ ပြည့်ပြီးသည့် သက်ကြီးရွယ်အိုတို့ကို တစ်လတစ်သောင်းကျပ်နှုန်းဖြင့် ၃ လတစ်ကြိမ် လက်ခံရရှိနေသော်လည်း ယနေ့ခေတ် ကုန်ဈေးနှုန်း၊ ဆေးဝါးစရိတ်နှင့် အညီပေးဆောင်သင့်ကြောင်း သံဖြူဇရပ်မှ သက်ကြီးရွယ်အို စောင့်ရှောက်နေသူတစ်ဦးက ဆိုသည်။
“ဒီခေတ်ကုန်ဈေးတွေနဲ့ဆိုရင် တစ်လ တစ်သောင်းဆိုတာ ဘယ်လောက်မလဲပေါ့နော်။ ဆေးတစ်မျိုး ဝယ်ဖို့တောင် မလောက်ပါဘူး။ အစားအသောက်၊ သုံးစွဲစရိတ်တွေအားလုံးကို ဈေးကြီးပြီး အားလုံးကြပ်တည်းနေကြတယ်” ဟု သံဖြူဇရပ်မှ သက်ကြီးရွယ်အိုရှောက်စောင့်နေသူတစ်ဦးက ပြောသည်။
ပြည်သူ့အင်အားဦးစီးဌာန၏ အချက်အလက်များအရ မြန်မာနိုင်ငံအတွင်း သက်ကြီးရွယ်အိုဦးရေ ၆ ဒသမ ၃ သန်းကျော်ရှိပြီး၊ အဲဒီထဲက အသက် ၈၅ နှစ်နှင့်အထက် သက်ကြီးရွယ်အိုဦးရေမှာ ၂၈၄၈၀၀၀ ကျော်ခန့်ရှိသည်ဟု သိရသည်။
သို့သော် ကရင်ပြည်နယ်အတွင်းရှိ ဒေသခံတို့ စစ်အာဏာသိမ်းကာလနောက်ပိုင်း အဆိုပါ ထောက်ပံ့မှုနှင့် ပြတ်တောက်သွားခဲ့ရပြီး လက်ရှိတွင် အုပ်ချုပ်ရေးမှုးအဖွဲ့တို့က စာရင်းပြန်လည်ကောက်ယူနေကြောင်း ကြာအင်းဆိပ်ကြီး ဒေသခံတစ်ဦးက ဆိုသည်။
” စစ်အဏာသိမ်းပြီးနောက်ပိုင်းတော့ လူတိုင်းမရတော့ဘူး။ အုပ်ချုပ်ရေးမှုးနှင့် နီးစပ်သူတွေပဲရတော့တာ၊ ပြီးတဲ့ အပတ်ကမှပဲ အသက် ၈၅ နှစ်ပြည့်သူတွေကို စာရင်းကောက်ဖို့ စာရောက်လာတယ်။ သူတို့ဘယ်လိုထောက်ပံ့သွားမလဲတော့မသိဘူး” ဟု ကြာအင်းဆိပ်ကြီးမှ အုပ်ချုပ်ရေးမှူးပိုင်းနှင့် နီးစပ်သူတစ်ဦးက ပြောသည်။
အမျိုးသားလူမှုရေး ပင်စင်ထောက်ပံ့ခြင်းအစီအစဉ်ကို ၂၀၁၇-၂၀၁၈ ဘဏ္ဍာရေးနှစ်မှစပြီး အသက်(၉၀)နှစ်နှင့်အထက် သက်ကြီးရွယ်အိုများကို တစ်ဦးတစ်လလျှင် ကျပ်တစ်သောင်း နှုန်းဖြင့် သုံးလတစ်ကြိမ်ထောက်ပံ့ပေးခဲ့သည်။ ထိုနောက် ၂၀၁၈-၂၀၁၉ခု ဘဏ္ဍာရေး နှစ်မှစ၍ အသက်အရွယ်သတ်မှတ်နှုန်းလျော့ချကာ အသက်(၈၅)နှစ်နှင့်အထက် သက်ကြီးရွယ်အိုများကို ထောက်ပံ့ပေးခဲ့သည်။
မြန်မာနိုင်ငံတွင် စစ်တပ်အာဏာသိမ်းပြီးနောက်ပိုင်း ပြည်တွင်းစီးပွားရေးကျပ်တည်းမှုနှင့် အလုပ်အကိုင်ရှာပါးမှုကြောင့် ဆင်းရဲမွဲတေမှုများ မြင့်တက်လာနေပြီး တောင်းရမ်းစားသောက်နေသည့် ကလေးသူငယ်နှင့် သက်ကြီးရွယ်အိုတို့ များပြားနေကြောင်း သိရသည်။
