ငလျင်လှုပ်ခတ်မှုကြောင့် နေပြည်တော်ရှိ မွန်ဘုန်းတော်ကြီးကျောင်း ထိခိုက်ပျက်စီးမှုများခဲ့ပြီး ပြန်လည်ထူထောင်ရေးအတွက် အကူအညီလိုအပ်နေကြောင်း ကျောင်းထိုင်ဆရာတော်ထံမှ သိရသည်။
ပြီးခဲ့သည့် မတ်လ ၂၈ ရက်နေ့က ဖြစ်ပွားခဲ့သည့် အားပြင်းငလျင် လှုပ်ခတ်မှုကြောင့် စစ်ကိုင်း၊ မန္တလေးနှင့် နေပြည်တော်၊ ရှမ်းပြည်နယ်နှင့် အခြားဒေသအချို့တို့တွင် ငလျင်ဒဏ် ခံခဲ့ရပြီး လူသေဆုံးမှု၊ ပျက်စီးဆုံးရှုံးမှုများ အဓိက ရင်ဆိုင်ကြုံတွေ့ခဲ့ရသည်။
ငလျင်ဘေးဒဏ်ခံရသည့်ထဲတွင် နေပြည်တော်ရှိ အောင်မင်္ဂလာမွန်ဘုန်းတော်ကြီးကျောင်းလည်းအပါအဝင်ဖြစ်ပြီး ငလျင်ကြောင့် သံဃာတော်များအပါအဝင် လူထိခိုက်သေဆုံးမှု မရှိခဲ့သော်လည်း ကျောင်းအဆောက်အဦး ပျက်စီးဆုံးရှုံးမှု အများအပြား ရှိခဲ့သည်ဟု အောင်မင်္ဂလာမွန်ဘုန်းတော်ကြီးကျောင်းမှ ဆရာတော်က လွတ်လပ်သော မွန်သတင်းအေဂျင်စီသို့ မိန့်ကြားသည်။
“ကျောင်းပရဝဏ်ထဲက မုဒ်ဦးနှစ်ဖက်စလုံးက ကျိုးပြီး ပြိုကျသွားတယ်။ ပြီးတော့ ကျောင်းခေါင်းမိုး အကာတွေက အကုန်ဖြုတ်ထွက်သွားပြီး ပြိုကျသွားတယ်။ အခုက အကုန်အက်ကွဲနေတယ်။ သိမ်တွေရော၊ သီးတင်သုံးတဲ့နေရာမှာတော့ အကုန်စောင်းနေတယ်။ ဒီနှစ်ပဲ ဆောက်လုပ်ပြီး ဦးတော်တင်ခါစပဲ ရှိသေးတဲ့ ဘုရားကလည်း ပြိုကျလာတယ်။ ကျောင်းအုတ်တံတိုင်တွေလည်း စောင်းနေတယ်။ ဘုန်းကြီးတွေရော၊ ကိုရင်တွေရော ထိခိုက်ဒဏ်ရာရတာက မရှိဘူး။ ကလေးအမေတစ်ယောက်ကပဲ ခေါင်းမိုးဖြုတ်ကျလို့ နည်းနည်းထိခိုက်သွားတာ ရှိတယ်” ဟု ဆရာတော်က မိန့်ကြားသည်။
လက်ရှိတွင် ရေ၊ မီး ပြတ်တောက်နေသည့်အတွက် အမှောင်ထဲတွင် နေထိုင်နေကြရပြီး ငလျင်ဒဏ်ခံခဲ့ရသည့် ကျောင်းဝင်းထဲတွင် မနေထိုင်ရဲကြပဲ ကျောင်းရှေ့ရှိ ကွင်းပြင်းတွင်သာ နေထိုင်နေကြရသည်ဟုလည်း ဆရာတော်က မိန့်သည်။
ငလျင်ကြောင့် ပြိုကျပျက်စီးသွားသည့် ကျောင်းအဆောက်အဦးများ ရှင်းလင်းရန် ယနေ့အချိန်ထိ ကူညီဆောင်ရွက်ပေးမည့်သူမရှိသေးကြောင်း၊ ကိုယ်ထူကိုယ်ထဖြင့် လုပ်ဆောင်နေရသည့်အတွက် အခက်အခဲဖြစ်နေကြောင်း ဆရာတော်က ဆက်မိန့်သည်။
“ဒီငလျင်ကြောင့် ပြိုကျလာတဲ့အရာတွေကို လာရောက်ရှင်းလင်းပေးတာတွေက မရှိသေးဘူး။ ဘယ်သူကလည်း လာရောက်မေးမြန်းစစ်ဆေးတာ မရှိဘူး။ ဒီကိုရောက်လာတဲ့ မွန်ဒကာနည်းနည်းနဲ့ပဲ ရှင်းလင်းမှုတွေ အနည်းငယ်ပဲ လုပ်ဆောင်ရသေးတယ်။ ကျန်တဲ့ အပျက်အစီးတွေက ဒီတိုင်းပဲ ထားထားရတယ်” ဟု ဆရာတော်က မိန့်ကြားသည်။
အောင်မင်္ဂလာမွန်ဘုန်တော်ကြီးကျောင်းကို နေပြည်တော်၊ ပုဗ္ဗသီရိမြို့နယ်၊ တပင်ရွှေထီးရပ်ကွက်တွင် မွန်ပြည်သူလူထုများ ခရီးသွားလာရေးတွင် ဝင်ရောက်နားခိုနိုင်ရန် ရည်ရွယ်ပြီး တည်ဆောက်ခဲ့ခြင်း ဖြစ်သည်။
