မွန်ပြည်နယ်၊ မုဒုံမြို့နယ်၊ ကျိုက်ရွှဲကျေးရွာရှိ ဟွန်ဒါမြန်မာသစ်ပါးလွှာစက်ရုံက မန်နေဂျာနှစ်ဦးကို မွန်ပြည်သစ်ပါတီ NMSP-AD က ဖမ်းဆီးခေါ်ဆောင်သွားကြောင်း သိရသည်။
ကျိုက်ရွှဲကျေးရွာရှိ ဟွန်ဒါမြန်မာသစ်ပါးလွှာစက်ရုံက မန်နေဂျာနှစ်ဦးကို နိုဝင်ဘာလ ၆ ရက်နေ့က ဖမ်းဆီးခေါ်ဆောင်သွားခဲ့ကြောင်း မွန်ပြည်သစ်ပါတီ NMSP-AD က အတည်ပြုပြောဆိုသည်။
မွန်ပြည်သစ်ပါတီ NMSP-AD က ၎င်းတို့လှုပ်ရှားရာဒေသက စီးပွားရေးလုပ်ငန်းရှင်များ ခေါ်ယူတွေ့ဆုံလျက်ရှိကြောင်း ဟွန်ဒါမြန်မာသစ်ပါးလွှာစက်ရုံကိုလည်း ၎င်းတို့နှင့်အဆက်အသွယ်လုပ်ရန် အကြောင်းကြားခဲ့သော်လည်း အဆက်အသွယ်မပြုခဲ့သည့်အတွက် ယခုလို ဖမ်းဆီးရခြင်းဖြစ်ကြောင်း NMSP-AD ပြောရေးဆိုခွင့်ရှိသူ နိုင်ဗညာမွန်က လွတ်လပ်သော မွန်သတင်းအေဂျင်စီသို့ ပြောသည်။
“မြန်မာဟွန်ဒါသစ်ပါးလွှာစက်ရုံက မန်နေဂျာနှစ်ယောက်ကို ဖမ်းဆီးခေါ်ဆောင်သွားတာက ကျနော်တို့ NMSP-AD အဖွဲ့ပဲ။ ဘာလို့လဲဆိုတော့ ဒီမွန်ပြည်နယ်မှာ စီးပွားရေးလုပ်ငန်းရှင်တွေအားလုံး ကျနော်တို့နဲ့ အဆက်သွယ်ယူကြပါလို့ ပြောထားတာ ကြာပြီ။ ကျနော်တို့လည်း သူတို့နဲ့ အဆက်သွယ် လုပ်တယ်။ သူတို့က ပြန်ပြီး အဆက်သွယ်မလုပ်လို့ ဝင်ရောက်ဖမ်းဆီးရတာ ဖြစ်တယ်” ဟု နိုင်ဗညာမန်က ပြောသည်။
ဟွန်ဒါမြန်မာသစ်ပါးလွှာစက်ရုံက မန်နေဂျာနှစ်ဦးကို မွန်ပြည်သစ်ပါတီ NMSP-AD က နိုဝင်ဘာလ ၈ ရက်နေ့ ဆက်လက်ထိန်းသိမ်းထားဆဲဖြစ်သည်။
မွန်ပြည်သစ်ပါတီ NMSP-AD လှုပ်ရှားရာနယ်မြေဒေသအတွင်းရှိ စီးပွားရေးလုပ်ငန်းရှင်းများ NMSP-AD နှင့် အဆက်အသွယ်လုပ်ရမည်ဖြစ်ပြီး ပျက်ကွက်ပါက အရေးယူသွားမည်ဖြစ်ကြောင်းလည်း မွန်ပြည်သစ်ပါတီ မွန်ပြည်သစ်ပါတီ NMSP-AD က ပြောသည်။
“အဓိကပြောချင်တာက ကျနော်တို့လှုပ်ရှားတဲ့ နယ်မြေဒေသက စီးပွားရေးလုပ်ငန်းရှင်တွေအားလုံး ကျနော်တို့နဲ့ အရင်ဆုံး အဆက်သွယ်ယူကြပါ။ တိုးဂိတ်မှာရှိတဲ့ လူတွေကအစ ကျနော်တို့နဲ့ လာရောက် အဆက်သွယ်ယူကြပါလို့ Message ပေးချင်ပါတယ်” ဟု နိုင်ဗညာမွန်က ဆက်ပြောသည်။
မွန်ပြည်သစ်ပါတီ NMSP-AD သည် ပြီးခဲ့သည့် ဖေဖော်ဝါရီလ ၁၄ ရက်နေ့က မွန်ပြည်သစ်ပါတီ NMSP မှ ခွဲထွက်ကာ တော်လှန်ရေးအဖွဲ့များနှင့် ပူးပေါင်းပြီး စစ်အာဏာရှင်ကို တိုက်ခိုက်သွားမည်ဟု ကြေညာထားသည်။
မွန်ပြည်သစ်ပါတီ NMSP-AD သည် မွန်ပြည်နယ်အပြင် ကရင်၊ တနင်္သာရီဒေသတွင် လှုပ်ရှားလျက်ရှိပြီး စစ်ကောင်စီနှင့် စစ်ကောင်စီ ထောက်တိုင် ပြည်သူ့စစ်၊ အုပ်ချုပ်ရေးမှူ၊ သတင်းပေးများကို မကြာခဏရှင်းလင်းလေ့ရှိသည်။
