ရှမ်းပြည်နယ်မြောက်ပိုင်း၊ လားရှိုးမြို့တွင် စစ်ကောင်စီသတင်းပေးဟု ယူဆရသူအချို့ကို မြန်မာအမျိုးသားဒီမိုကရက်တစ် မဟာမိတ်တပ်မတော် MNDAA က ဖမ်းဆီးထားကြောင်း ဒေသခံများက ပြောသည်။
စီသတင်းပေးဟု ယူဆရသူတို့က StarLink အင်တာနက်လိုင်းကို အသုံးပြုပြီး လေယာဉ် ဗုံးကြဲရမည့် ပစ်မှတ်အတိအကျကို စစ်ကောင်စီထံ သတင်းပေးနေသည်ကို သက်သေနှင့်တကွ MNDAA က ရရှိထားသည်ဟု ဆိုသည်။
ထိုကြောင့် MNDAA က လတ်တလောတွင် Star Link အင်တာနက်များကို ယာယီဖြတ်တောက်ထားပြီး သတင်းပေးများကို ဖမ်းဆီးမှု လုပ်ဆောင်နေခြင်း ဖြစ်သည်။
“လိုင်းတွေဖြတ်ထားတာ။ ပြီးတော့ ဒလန်တွေ မိထားတယ်။ မနေ့က မြို့လယ်မှာ အဲဒီဒလန်တွေကို ထုတ်ပြသေးတယ်။ ဒီနေ့တော့ နေရာရွှေ့သွားပြီ။ တစ်ပတ်တစ်ခါ ထုတ်ပြမယ်ပြောတယ်။ သူတို့ရဲ့ဖုန်းတွေကို စစ်တော့ စစ်တပ်ကလူတွေနဲ့ ဗုံးကြဲဖို့ နေရာတွေ ပြောထားတာကို အတိအကျ သက်သေနဲ့ ရသွားတာ။ အဲ့တာကြောင့် ဖမ်းတာတဲ့။ ၅ ယောက်လောက်ရှိတယ် တွေ့ခဲ့တာတော့” ဟု လားရှိုးမြို့ခံတစ်ဦးက ပြောသည်။
MNDAA က စစ်ကောင်စီသတင်ပေးဟု ယူဆရသူ အယောက် ၃၀ ခန့်ကို ဖမ်းဆီးထိန်းသိမ်းထားကြောင်း ၎င်းထဲတွင် အမျိုးသမီးများလည်း ပါဝင်ကြောင်း ဒေသခံတို့က ပြောသည်။
ဖမ်းဆီးထားသည့် စစ်ကောင်စီသတင်းပေးဆိုသူများကို မည်ကဲ့သို့သော အရေးယူဖြင့် အရေးယူသွားမည်ဆိုသည်ကို MNDAA က တရားဝင် ထုတ်ပြန်ထားခြင်းမရှိသေးပေ။
MNDAA က သတင်းပေးဆိုသူများအပြင် မြို့ပေါ်ရှိ ဒေသခံနေအိမ်များကို ဖောက်ထွင်သူများကိုလည်း ဖမ်းဆီးအရေးယူထားကြောင်း သိရသည်။
MNDAA ထိန်းချုပ်ထားသည့် လားရှိုးမြို့ကို စစ်ကောင်စီက ပစ်မှတ်အတိအကျဖြင့် နေ့တိုင်းလိုလို လေယာဉ် ဗုံးကြဲတိုက်ခိုက်နေပြီး စက်တင်ဘာလမှ အောက်တိုဘာလ ၆ ရက်နေ့အတွင်း လေကြောင်းတိုက်ခိုက်မှုကြောင့် ဒေသခံ ၉ ဦးသေဆုံးကာ၊ ၅၀ ကျော် ထိခိုက်ဒဏ်ရာရရှိသည်ဟု MNDAA က ထုတ်ပြန်ထားသည်။
လားရှိုးမြို့အပြင် တအာင်းတပ်မတော် TNLA ထိန်းချုပ်ထားသည့် နယ်မြေများတွင်လည်း စစ်ကောင်စီသတင်းပေးများ ဖမ်းဆီးရမိထားကြောင်း ဒေသတွင်း သတင်းများ၏ ဖော်ပြချက်အရ သိရသည်။
