မွန်ပြည်နယ်၊ သံဖြူဇရပ်မြို့နယ်၊ ရဲတံခွန်ကျေးရွာခံတစ်ဦး ဩဂုတ်လ ၂၂ ရက်နေ့က မြေမြှုပ်မိုင်းနင်းမိပေါက်ကွဲမှုကြောင်း ပြင်းထန်ဒဏ်ရာရရှိခဲ့သည်ဟု ဒေသခံတို့ထံမှ သိရသည်။
ယမန်နေ့ နံနက် ၉ နာရီအချိန်ခန့်က သံဖြူဇရပ်မြို့နယ်၊ ရဲတံခွန်ကျေးရွာနေ အသက် ၃၀ နှစ်အရွယ် ကိုစိုးသန်း ဆိုသူသည် ထင်းခုတ်ရန်အသွား ရွာဘုန်းကြီးကျောင်းအနီးရှိ ရော်ဘာခြံတွင် မြေမြှုပ်မိုင်းနင်းမိခြင်းဖြစ်သည်။
မြေမြှုပ်မိုင်းနင်းမိပေါက်ကွဲမှုကြောင့် ကိုစိုးသန်းသည် ခြေထောက်နှစ်ဖက်လုံး ပြင်းထန်သည့် မိုင်းစထိမှန်ဒဏ်ရာများ ရရှိခဲ့ကြောင်း ဒေသခံတို့က ပြောသည်။
ပြင်းထန်ဒဏ်ရာရရှိခဲ့သည့် ကိုစိုးသန်းကို လူမှုကူညီရေးအဖွဲ့တို့၏အကူအညီဖြင့် သံဖြူဇရပ်မြို့နယ်ပြည်သူ့ဆေးရုံသို့ ပို့ဆောင်ဆေးကုသမှုခံယူနေသည်။
စစ်ကောင်စီက သံဖြူဇရပ်-ရေး-ထားဝယ် အမှတ်(၈) ပြည်ထောင်စုလမ်းမကြီးကို ပြန်လည်ထိန်းချုပ်နိုင်ရေး စစ်ကောင်စီက စစ်ကြောင်းထိုးဝင်ရောက်နေပြီး လမ်းမကြီးတလျှောက်ရှိ ကျေးရွာနှင့် အနီးနားတဝိုက်တို့တွင် ဝင်ရောက်တပ်စွဲထားသည်လည်း ရှိသည်။
ဒေသတွင်း ဝင်ရောက်လာသည့် စစ်ကောင်စီတပ်နှင့် ဒေသတွင်းလှုပ်ရှားနေသည့် တော်လှန်ရေးပူးပေါင်းတပ်ဖွဲ့တို့ကြား တိုက်ပွဲနေ့စဉ်နီးပါးဖြစ်ပွားနေသည်။
ပြီးခဲ့သည့် ဩဂုတ်လ ၁၅ ရက်နေ့ နေ့လည်ပိုင်းကလည်း ရဲတံခွန်ရွာသစ် ဘုရားကုန်းတွင် ဝင်ရောက် တပ်စွဲထားသည့် စစ်ကောင်စီတပ်အင်အား ၁၀၀ ခန့်ကို တော်လှန်ရေးပူပေါင်းတပ်ဖွဲ့တို့က ချောင်းမြောင်းပစ်ခတ်တိုက်ခိုက်ခဲ့သည်။
ယခု မြေမြုပ်မိုင်းနင်းမိသည် ရဲတံခွန်ကျေးရွာတဝိုက်တွင် စစ်ကောင်စီတပ်များ လှုပ်ရှားသွားလာနေသည့်အပြင် တပ်စွဲထားသည့်နေရာလည်းဖြစ်သည့်အတွက် မြေမြုပ်မိုင်းသည် စစ်ကောင်စီတပ်တို့ ထောင်ထားသည့်မိုင်းဖြစ်နိုင်သည်ဟု ဒေသခံတို့က ပြောသည်။
