ရှမ်းပြည်နယ်တောင်ပိုင်း ဟိုပုန်း၊ လွိုင်လင်နှင့် ဆီဆိုင်ဒေသတို့တွင် ဖြစ်ပွားနေသည့် တိုက်ပွဲများအတွင်း အရပ်သားသေဆုံးမှု ၄၇ ဦးအထိရှိလာကြောင်း ပအိုဝ်းလူငယ်အစည်းအရုံး PYO ၏ ထုတ်ပြန်ချက်အရ သိရသည်။
ရှမ်းပြည်တောင်ပိုင်းဒေသအတွင်း ပြီးခဲ့သည့် ဇန်နဝါရီလ ၂၁ ရက်နေ့ကစပြီး စစ်ကောင်စီတပ်၊ ပအိုဝ်းအမျိုးသားတပ်မတော် (PNA) ပူးပေါင်းတပ်ဖွဲ့နှင့် ပအိုဝ်းအမျိုးသားလွတ်မြောက်ရေးတပ်မတော် (PNLA) ပူးပေါင်းတပ်ဖွဲ့တို့ကြား တိုက်ပွဲဖြစ်ပွားခဲ့သည်။
တိုက်ပွဲစတင်ဖြစ်ပွားခဲ့သည့် ဇန်နဝါရီလ ၂၁ ရက်နေ့မှ မတ်လ ၂ ရက်နေ့အထိ ၄၂ ရက်တာကာလအတွင်း အရပ်သား ၄၇ ဦး သေဆုံးသွားခဲ့ပြီး၊ ၅၉ ဦး ထိခိုက်ဒဏ်ရာရရှိသည်ဟု PYO က ထုတ်ပြန်ထားသည်။
သေဆုံးသူများသည် လက်နက်ကြီးထိမှန်တာ၊ လေကြောင်းတိုက်ခိုက်ခံရတာ၊ အဖမ်းခံရပြီး သတ်ဖြတ်ခံရတာတွေနှင့် စစ်ရှောင်ရင်း ပစ်ခတ်ခံရခြင်း၊ စစ်တပ်၏ မှားယွင်းပစ်ခတ်ခြင်း၊ ကြောက်လန့်ပြီး ထွက်ပြေးရင် စစ်တပ်မှ လိုက်လံပစ်ခတ်ခြင်းကြောင့် သေဆုံးသွားခဲ့သည်ဟု ထုတ်ပြန်ထားသည်။
သေဆုံးသူ ၄၇ ဦးတွင် လသားအရွယ်ကလေး ၁ ဦးအပါအဝင် ကလေး ၅ ဦး၊ အမျိုးသမီး ၂ ဦး၊ အမျိုးသား ၃၄ ဦးနှင့် ကျား၊ မ အတည်မပြုနိုင်သူ ၆ ဦး ပါဝင်သည်။
တိုက်ပွဲအတွင်း စစ်ကောင်စီတပ်ဘက်မှ လေကြောင်းတိုက်ခိုက်မှု ၃၇၁ ကြိမ်ထက်မနည်း ပြုလုပ်ခဲ့သလို လက်နက်ကြီးပစ်ခတ်မှုလည်း ၁၁၃၅ ကြိမ်ထက်မနည်း လုပ်ဆောင်ခဲ့ကြောင်းလည်း PYO က ထုတ်ပြန်ထားသည်။
တိုက်ပွဲကြောင့် အရပ်သားပြည်သူ တစ်သိန်းနီးပါး ထွက်ပြေးတိမ်းရှောင်နေကြပြီး၊ နေအိမ်၊ စာသင်ကျောင်း၊ ဘာသာရေးအအဆောက်အဦး၊ ဆေးရုံ၊ ဆေးခန်းအပါအဝင် အဆောက်အဦး ၂၀၀ နီးပါးလည်း ထိခိုက်ပျက်စီးမှုရှိသည်ဟု ထုတ်ပြန်ချက်တွင် ဖော်ပြထားသည်။
မတ်လ ၄ ရက်နေ့ကလည်း ပအိုဝ်းကိုယ်ပိုင်အုပ်ချုပ်ခွင့်ရဒေသ ဆီဆိုင်မြို့ကို စစ်ကောင်စီက စစ်ကြောင်းထိုးတိုက်ခိုက်လာသဖြင့် တိုက်ပွဲပြင်းပြင်းထန်ထန် ဖြစ်ပွားခဲ့ကြောင်း ပအိုဝ်းအမျိုးသားလွတ်မြောက်ရေးတပ်မတော် PNLA က ထုတ်ပြန်ထားသည်။
တိုက်ပွဲအတွင်း အထိနာခဲ့သောကြောင့် စစ်ကောင်စီတပ်သည် တိုက်ပွဲနှင့် မသက်ဆိုင်သည့် ဆီဆိုင်မြို့ကို လက်နက်ကြီးဖြင့် အကြိမ် ၄၀ ကျော် ပစ်ခတ်တိုက်ခိုက်ခဲ့ကြောင်း ထုတ်ပြန်ချက်တွင် ဖော်ပြထားသည်။
စစ်ကေယင်စီအနေဖြင့်ပအိုဝ်းဒေသကို ရည်ရွယ်ချက်ရှိရှိ ဖျက်စီးနေပြီး ဘာသာရေးဆိုင်ရာအဆောက်အအုံများကိုပါ ပစ်မှတ်ထားတိုက်ခိုက်နေကြောင်း PNLA မှ ပြောဆိုထားသည်။
