လွတ်လပ်သောမွန်သတင်းအေဂျင်စီ၊ ဖေဖော်ဝါရီ ၁၆၊ ၂၀၂၄။
မွန်ပြည်သစ်ပါတီ (စစ်အာဏာရှင်တိုက်ဖျက်ရေး) ရဲ့ စစ်အာဏာရှင်စနစ် ပပျောက်ရေး တော်လှန်ရေးအင်အားစုအားလုံးနှင့် ပူးပေါင်းတိုက်ပွဲဝင်သွားမည်ဖြစ်ကြောင်း ထုတ်ပြန်ကြေညာချက်ကို ကြားကာလအမျိုးသားညီညွတ်ရေးအစိုးရ (NUG) က ကြိုဆိုကြောင်း ယနေ့ (ဖေဖော်ဝါရီ ၁၆) ရက်စွဲဖြင့် ကြေညာချက်တစ်ရပ် ထုတ်ပြန်လိုက်သည်။
စစ်အာဏာရှင်စနစ် မြန်မာ့မြေပေါ်မှ လုံးဝ ကင်းစင် ပပျောက်ပြီး အနာဂတ် ဖက်ဒရယ် ဒီမိုကရေစီပြည်ထောင်စု တည်ဆောက်နိုင်ရေးအတွက် မွန်ပြည်သစ်ပါတီ (စစ်အာဏာရှင် တိုက်ဖျက်ရေး) အပါအဝင် တော်လှန်ရေး အင်အားစုအားလုံးနှင့် အခိုင်အမာလက်တွဲပူးပေါင်း တိုက်ပွဲဝင်သွားမည်ဟုလည်း NUG က ထုတ်ပြန်ချက်တွင် ကတိပြုထားသည်။
တစ်ဖက်တွင်လည်း လက်ရှိတော်လှန်ရေးတွင် ပါဝင်လာခြင်းမရှိသေးသည့် တိုင်းရင်းသားတော်လှန်ရေး အင်အားစုများအနေဖြင့်လည်း လက်ရှိအခွင့်အလမ်းကို အမိအရဆုပ်ကိုင်ပြီး ပြည်သူ့နွေးဦးတော်လှန်ရေးတွင် ပူးပေါင်းပါဝင်လာကြဖို့ NUG က တိုက်တွန်းထားသည်ကို ဖတ်ရှုးရသည်။
ပြည်သူများကို အကာအကွယ်ပေးရန်၊ တိုင်းရင်းသားလူမျိုးများ လိုလားတောင့်တသည့် အမျိုးသားတန်းတူရေးနှင့် ကိုယ်ပိုင်ပြဌာန်းပိုင်ခွင့် အပြည့်အဝရှိသော ဖက်ဒရယ်ပြည်ထောင်စု တည်ဆောက်ရန်အတွက် စစ်ကောင်စီကို ဆန့်ကျင်တိုက်ပွဲဝင်နေသည့် တိုင်းရင်းသား တော်လှန်ရေးအဖွဲ့အစည်းများ၊ နွေဦးတော်လှန်ရေးအင်အားစုများနှင့် ပူးပေါင်းပြီး စစ်ကောင်စီကို တိုက်ခိုက်သွားမည်ဟု မွန်ပြည်သစ်ပါတီ (စစ်အာဏာရှင် တိုက်ဖျက်ရေး) က ဖေဖော်ဝါရီလ ၁၄ ရက် နေ့စွဲဖြင့် ထုတ်ပြန်ကြေညာခဲ့သည်။
အဆိုပါထုတ်ပြန်ချက်အရ လက်ရှိအခြေအနေတွင် စစ်ကောင်စီနှင့် နိုင်ငံရေးအရ ဆက်လက်တွေ့ဆုံဆွေးနွေး အဖြေရှာရန် မဖြစ်နိုင်တော့ဟု မွန်ပြည်သစ်ပါတီ (စစ်အာဏာရှင် တိုက်ဖျက်ရေး) က ဆိုထားသည်။
ထို့ကြောင့် မွန်ပြည်သစ်ပါတီ အထွေထွေအတွင်းရေးမှုး နိုင်ဇေယျ၊ ဗဟိုအလုပ်မှုဆောင် နိုင်လရီဂကောင်း၊ နိုင်ဗညားလယ်နှင့် ဒုစစ်ဦးစီးချုပ် ဗိုလ်မှုးချုပ် စလွန်းထောတို့အပါအဝင် ယုံကြည်ချက်၊ ရပ်တည်ချက်တူညီသည့် အခြားဗဟိုကော်မတီဝင်များ၊ တပ်ဗိုလ်၊ တပ်မှုး၊ ရဲဘော်များနှင့် မျိုးချစ်ပုဂ္ဂိုလ်များ စုပေါင်းပြီး မွန်ပြည်သစ်ပါတီ (စစ်အာဏာရှင်တိုက်ဖျက်ရေး) အမည်ဖြင့် အာဏာသိမ်းစစ်တပ်ကို တိုက်ခိုက်သွားမည်ဟု ထုတ်ပြန်ခဲ့ခြင်းဖြစ်သည်။
