မွန်ပြည်နယ်၊ ရေးမြို့နယ် နှစ်ကရင်ကျေးရွာတွင် ဇွန်လ ၈ ရက်နေ့ နံနက် ၉ နာရီအချိန်ခန့်က စစ်ကောင်စီတပ် ပစ်ခတ်လိုက်သည့် လက်နက်ကြီးကျည်ကျရောက်ပေါက်ကွဲမှုကြောင့် အမျိုးသမီး တစ်ဦးသေဆုံးကာ နေအိမ် နှစ်လုံး ပျက်စီးသွားကြောင်း ဒေသခံတို့ထံမှ သိရသည်။
ယနေ့ နံနက် ၉ နာရီအချိန်ခန့်က နှစ်ကရင်ကျေးရွာအတွင်းသို့ လက်နက်ကိုင်အဖွဲ့တစ်ဖွဲ့က သေနတ် ၃ ချက် ပစ်ဖောက်ကာ ဝင်ရောက်လာပြီးနောက် ကျေးရွာအုပ်ချုပ်ရေးမှူးဖြစ်သူ ဦးနေဝင်းမြင့်ကို ဖမ်းဆီးခေါ်ဆောင်သွားခဲ့သည့်ဖြစ်စဥ်ဖြစ်ပွားခဲ့သည်။
ထိုအချိန်တွင် နှစ်ကရင်ကျေးရွာနှင့် မော့ကနင်ရွာသစ်ကြားရှိ ဝယ်ဖယ်ကျေးရွာတွင် အခြေစိုက်ထားသည့် စစ်ကောင်စီအမြောက်တပ်မှ နှစ်ကရင်ကျေးရွာအတွင်းသို့ လက်နက်ကြီးဖြင့် ပစ်ခတ်ခဲ့ကြောင်း ဒေသခံတို့က ပြောသည်။
စစ်ကောင်စီတပ် ပစ်ခတ်လိုက်သည့် လက်နက်ကြီးကျည်သည် နှစ်ကရင်ကျေးရွာ ရပ်ကွက် ၅ ရှိ တရုတ်သင်္ချိုင်းအနီးတွင် ကျရောက်ပေါက်ကွဲခဲ့ပြီး ၎င်းအနီးတွင် နေထိုင်သည့် အသက် ၂၅ နှစ်အရွယ် ရွှေ့ပြောင်းအလုပ်သမား မတင်ကြီးဆိုသည့် အမျိုးသမီး ကျည်စထိမှန် သေဆုံးသွားခဲ့သည်ဟု ဒေသခံတစ်ဦးက ပြောသည်။
“မနက် ၉ နာရီခွဲလောက်မှာ လက်နက်ကြီးနဲ့ ၂ လုံး ဆက်တိုက်ပစ်တယ်။ နှစ်ကရင်ကျေးရွာ ရပ်ကွက် ၅ မှာရှိတဲ့ တရုတ်သင်္ချိုင်းအနီးမှာ လက်နက်ကြီးကျည်ကျရောက်ပေါက်ကွဲတဲ့အတွက် အဲ့ဒီနေရာအနီးမှာ နေထိုင်တဲ့ အသက် ၂၅ နှစ်အရွယ် ရွေ့ပြောင်းအလုပ်သမတစ်ဦးဖြစ်တဲ့ မတင်ကြီးက လက်နက်ကြီးကျည်စထိမှန်ပြီးဒဏ်ရာရပြီး ဆေးရုံပို့တဲ့အချိန်မှာ သေဆုံးသွားတယ်။ နေအိမ် ၂ လုံးက လက်နက်ကြီးကျည်ကျရောက်ပေါက်ကွဲလို့ ပျက်ဆီးသွာတယ်” ဟု ပြောသည်။
နံနက် ၁၀ နာရီဝန်းကျင်အချိန်ခန့်ကလည်း တရုတ်သင်္ချိုင်းအနီးတွင် လက်နက်ကြီးကျည်တစ်လုံး ထပ်မံ ကျရောက်ပေါက်ကွဲခဲ့သေးကြောင်းလည်း ၎င်းဒေသခံက ဆိုသည်။
နှစ်ကရင်ကျေးရွာ ရပ်ကွက် ၅ ရှိ တရုတ်သင်္ချိုင်းအနီးတွင် ဇွန်လ ၇ ရက်နေ့ နံနက်ပိုင်းကတည်းက အမည်မသိလက်နက်ကိုင်အဖွဲ့ဝင်များ ရောက်ရှိနေပြီး ကျေးရွာအတွင်း လှုပ်ရှားသွားလာနေခဲ့ကြောင်း ရွှေ့ပြောင်းလုပ်သားတစ်ဦးက ပြောသည်။
“ရွာမှာကလည်း စစ်တပ်လည်းမရှိဘူး။ ရဲကင်းစခန်းရှိပေမယ့် ရဲတွေမနေတော့တာ ၆ လ လောက်ရှိသွားပြီး။ နောက်ပြည်သူ့စစ်တွေလည်းမရှိဘူး။ ဒီနေ့မှာလည်း တိုက်ပွဲမဖြစ်ပါဘူး” ဟု ၎င်းရွှေ့ပြောင်းလုပ်သားက ပြောသည်။
လက်နက်ကိုင်အဖွဲ့ ဖမ်းဆီးခေါ်ဆောင်သွားခဲသည့် ကျေးရွာအုပ်ချုပ်ရေးမှူး ဦးနေဝင်းမြင့်လည်း နေ့လည်ပိုင်းအချိန်ခန့်က နေအိမ်သို့ ပြန်လည်ရောက်ရှိလာပြီးဖြစ်ကြောင်း ဒေသခံတို့ထံမှ သိရသည်။
စစ်အုပ်ချုပ်ရေးကြေညာခံထားရပြီး စစ်ကောင်စီတပ်နှင့် ဒေသတွင်းလှုပ်ရှားနေသည့် ပြည်သူ့ကာကွယ်ရေး PDF တပ်ဖွဲ့တို့အကြား ပစ်ခတ်တိုက်ခိုက်မှု မကြာခဏဖြစ်ပွားနေသည့် ရေးမြို့နယ်တွင် စစ်ကောင်စီတပ် ပစ်ခတ်မှုကြောင့် ဒေသခံအရပ်သား ထိခိုက်သေဆုံးမှုရှိခဲ့သလို ပြည်သူ့ကာကွယ်ရေးတပ်ဖွဲ့တို့ကြောင့်လည်း လူထိခိုက်သေဆုံးမှုရှိခဲ့သည်။
