မွန်သတင်းအေဂျင်စီ (၂၀၂၂ ဩဂုတ် ၈)
မွန်ပြည်နယ်၊ ဇင်းကျိုက်မြို့တွင် စိတ်ကြွဆေးပြားရောင်းချနေသူကို သြဂုတ် ၇ ရက်၊ နေ့လည် ၁ နာရီဝန်းကျင်ခန့်က လက်လုပ်သေနတ်များနှင့် အတူ ဖမ်းဆီးရမိခဲ့ကြောင်း သိရသည်။
ဇင်းကျိုက်မြို့နယ်၊ ခလောက်အင်းရပ်ကွက် နယ်မြေ (၃) ရှိ နေအိမ်တစ်လုံးကို ဝင်ရောက်ရှာဖွေခဲ့ရာ အဆိုပါ နေအိမ်တွင် နေထိုင်သည့် သံပန်းလုပ်ငန်းလုပ်ကိုင်သူ ကိုနိုင်မင်းဦးကို တွေ့ရှိခဲ့ပြီး ဆက်လက်ရှာဖွေရာ အိမ်ခန်းအတွင်း၌ စိတ်ကြွရှုးသွပ်ဆေးပြား ၅၀ ပြားကို ဖမ်းဆီးရမိခဲ့သည်။
ထို့အတူ လက်လုပ်သေနတ် ၃ လက်နှင့် သံဘောစေ့များကို သိမ်းဆည်းရမိခဲ့ကြောင်း ဇင်းကျိုက်နယ် မြေရဲစခန်းနှင့် နီးစပ်သူ တစ်ဦးက ပြောသည်။
“လောလောဆယ်တော့ မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားတယ်”ဟု ပြောသည်။
ကိုနိုင်မင်းဦးကို တရားမဝင် လက်နက်ကိုင်ဆောင်မှုနှင့် ပတ်သတ်ပြီး ဆက်လက် အမှုဖွင့်ကာ အရေးယူမှုများ လုပ်ဆောင်သွားမည်ဖြစ်ကြောင်း သိရသည်။
အဆိုပါ အမှုနှင့် ပတ်သတ်ပြီး ဆက်စပ်အမှုကျုးလွန်သူများ ရှိ/မရှိကို စစ်ဆေးလျှက်ရှိကြောင်း သိရသည်။
အလားတူ ပြီးခဲ့သည့် ဩဂုတ် ၄ ရက်က သံဖြူဇရပ်မြို့နယ် ပင စစ်ဆေးရေးဂိတ်တွင် သံဖြူဇရပ်မှ ရေးမြို့ဘက်သို့ အမျိုးသမီးတစ်ဦးမောင်းနှင်လာသော ယာဉ်တွင် စိတ်ကြွရူးသွပ်ဆေးပြား ၅၂၀၀ ပြား ဖမ်းမိခဲ့သည်။
Topics; #ဇင်းကျိုက် #စိတ်ကြွဆေးပြား #လက်နက်
