မွန်သတင်းအေဂျင်စီ (၂၀၂၂ ဇန်နဝါရီ ၁၁)
လက်ရှိတွင် ကျိုက်မရောအကျဥ်းထောင်၌ ထောင်ဒဏ် ၂ နှစ်ကျမှတ်ခံထားရသော မွန်ပြည်နယ်ဝန်ကြီးချုပ်ဟောင်း ဒေါက်တာအေးဇံကို စွဲဆိုထားသော အဂတိမှု ၉ မှုအတွက် ဇန်နဝါရီ ၁၀ ရက်က ရုံးထုတ်စစ်ဆေးခဲ့ကြောင်း နီးစပ်သူများမှ သိရသည်။
အဂတိမှုများကို ပြန်လည်ခုခံရန် ယခင် ဝန်ကြီးချုပ်အဖြစ် ဒေါက်တာအေးဇံတာဝန်ယူခဲ့သည့် အစိုးရအဖွဲ့ စာရွက်စာတမ်းများကို လာရောက်တင်ပြပေးရန် အတွက် တရားရုံတော်က ဆင့်ခေါ်စာ (သမ္မန်စာ) ထုတ်ပေးရန် ရုံးချိန်းတွင် ဒေါက်တာအေးဇံ၏ ရှေ့နေအဖွဲ့က တင်ပြခဲ့ကြောင်း သိရသည်။
သို့ရာတွင် တရားသူကြီးက အမှု ၉ မှုအနက် ၂ မှုကို ပယ်ချပြီး ကျန်သည့် ၇ မှုအတွက် လာမည့် ရုံးချိန်းတွင် ဆင့်ခေါ်စာ ထုတ်ပေး၊ မပေး အမိန့်ချသွားမည်ဖြစ်ကြောင်း သိရသည်။
ပယ်ချခံရသည့် အမှု ၂ မှုကို စစ်ဆေးမေးမြန်းရာတွင်လည်း ဒေါက်တာအေးဇံက ၎င်းတွင် အပြစ်ရှိသည်ဟုမဆိုကြောင်း ထွက်ဆိုခဲ့သည်ဟု သိရသည်။
ထို့ပြင် ရွေးကောက်ပွဲမလျော်ဩဇာသုံးသည်ဟုဆိုကာ ၄င်းသည်အမှု ၃ မှု ထပ်မံစွဲဆိုခံထားရပြီး လက်ရှိအဂတိမှု ၉ မှုအပြင် စုစုပေါင်း ၁၂ မှုကို တရားရင်ဆိုင်နေရသူဖြစ်သည်။
လက်ရှိတွင် ဒေါက်တာအေးဇံကို ရာဇသတ်ကြီး ဥပဒေပုဒ်မ ၅၀၅(ခ) ဖြင့် အလုပ်နှင့် ထောင်ဒဏ် ၂ နှစ် ချမှတ်ခံထားရပြီး ကျိုက်မရောဗဟိုအကျဉ်းထောင်၌ ထားရှိသည်။
