မွန်သတင်းအေဂျင်စီ (၂၀၂၁ အောက်တိုဘာ ၁၁)
ပြည်တွင်းထွက် ငါးများကို တရုတ်နိုင်ငံသို့ တင်ပို့ရာတွင် တရုတ်ဘက်မှ လိုက်နာရန် ညွှန်ကြားထားသော အချက် ၇ ချက်ကို လိုက်နာရန် ခက်ခဲကြောင်း ပြည်နယ်ငါးလုပ်ငန်းရှင်များထံမှ သိရသည်။
တရုတ်ဘက်မှ ကိုဗစ်နှင့် ပတ်သက်ပြီး တင်းကြပ်လိုက်သည့် စည်းကမ်းချက်များအနက် ၃ ချက်ကို လိုက်နာဆောင်ရွက်ရန် ငွေကြေးကုန်ကျမှု များနေကြောင်း မော်လမြိုင်မြို့နယ်မှ ငါးလုပ်ငန်းရှင် တစ်ဦးက ပြောသည်။
“နှစ်ပတ်တစ်ခါ အလုပ်သမားတွေရော၊ ဝန်ထမ်းတွေရော ဓာတ်ခွဲခန်းမှာ စစ်ရမယ်ဆိုတာက နည်းနည်းတော့ ကျွန်တော်တိူ့အတွက် ဂွကျတယ်။ သူတို့ပို့တဲ့ ခုနှစ်ချက်မှာ သုံးချက်လောက်တော့ မလုပ်နိုင်ဘူးပေါ့လေ”ဟု ၎င်းက ပြောသည်။
တရုတ်နိုင်ငံမှ ညွှန်ကြားချက်များတွင် ငါးများကို ကိုဗစ်ရောဂါရှိမရှိ စစ်ဆေးရန်၊ ငါးလုပ်ငန်း လုပ်ကိုင်သူများ ကိုဗစ်ရောဂါ ကာကွယ်ဆေးထိုးရန်၊ ကာကွယ်ဆေးထိုးပြီးပါက နှစ်ပတ်တစ်ကြိမ် ရောဂါပိုး ရှိ မရှိ စစ်ဆေးရန် စသည့် အချက် သုံးချက်ကို လုပ်ဆောင်ပေးရန် ငွေကြေးကုန်ကျမှုများစွာ ရှိနိုင်ကြောင်း ၄င်းကဆက်ပြောသည်။
ပြည်နယ်ထွက်ငါးများကို တရုတ်နိုင်ငံသို့သာ အဓိက တင်ပို့နေခြင်းဖြစ်ပြီး တရုတ်ဘက်မှ စည်းကမ်းတင်းကြပ်လိုက်သောကြောင့် တင်ပို့ရာမှာ အခက်အခဲရှိလာကြောင်း၊ ပြည်ပသို့ တင်ပို့ရာတွင် အခက်အခဲများ ရှိနေသောကြောင့် ပြည်တွင်းတင်ပို့ရေးလုပ်ငန်း တချို့ ရပ်နားထားရကြောင်း မော်လမြိုင်မှ ငါးတင်ပို့ရေးလုပ်ငန်းရှင် တစ်ဦးက ပြောသည်။
“လောလောဆယ်တော့ ပြည်တွင်းစားသုံးလောက် အနေအထားမှာပဲ ရှိတယ်။ ပြည်ပကို မဖြုန်းနိုင်ရင် ခက်တာပေါ့။ ပြည်တွင်းလောက်ပဲဆိုရင်တော့ ခက်တာပေါ့။ အခုဆို ရပ်တဲ့သူတွေက ရပ်ကုန်ကြပြီ”ဟု ၎င်းက ပြောသည်။
ပြည်တွင်း၌လည်း ငါးဖမ်းဆီးရရှိမှု နှင့် အရောင်းအဝယ် ကျဆင်းလာသည့် အခြေအနေ နှင့်လည်း ရင်ဆိုင်နေရကြောင်း၊ မွန်ပြည်နယ်ထွက် ငါးပုတ်သင်၊ ငါးသလောက်၊ ငါးကွင်းရှပ်များကို တရုတ်နိုင်ငံက အဓိကထား ဝယ်ယူကြောင်း သိရသည်။
ပြီးခဲ့သည့် ၂၀၂၀-၂၁ ဘဏ္ဍာနှစ် စက်တင်ဘာ ၃၀ ရက်နေ့အထိ မြန်မာ့ရေထွက်ကုန် ပြည်ပပို့မှုတန်ဖိုး ယခင်ကာလတူနှင့်နှိုင်းယှဥ်ပါက အမေရိကန်ဒေါ်လာ ၇၄ ဒဿမ ၀၆၅ သန်း လျော့နည်းသွားကြောင်း စီးပွားရေးနှင့် ကူးသန်းရောင်းဝယ်ရေးဌာနမှ သိရသည်။
Photo-ရေးမြို့နယ် ပင်လယ်ငါးဖမ်းလှေများနှင့် ကျားဖောင်များ (DVB)
