မွန်သတင်းအေဂျင်စီ (၂၀၂၁ အောက်တိုဘာ ၇)
သထုံမြိုနယ်တွင် ကိုဗစ် ၁၉ ရောဂါ ကာကွယ်ဆေး ထိုးပြီးသည် ပြည်သူ နှစ်သောင်းနီးပါးရှိလာပြီဖြစ်ကြောင်း အောက်တိုဘာ ၆ ရက်စာရင်းများအရ သထုံမြိုနယ် ကျန်းမာရေးဦးစီးဌာန ဦးစီးမှူး ဒေါက်တာသန်းဦးက ပြောသည်။
“ဒီနှစ်အတွင်းမှာ ကိုးသောင်းလောက်တော့ မှန်းထားတယ်။ ၅၀ ရာခိုင်နှုန်းပေါ့။ ၁၈ နှစ်ပြည့်အထိဆိုတော့လေ။ ၅၀ ရာခိုင်နှုန်းနဲ့ဆိုတော့ ကိုးသောင်းလောက်ထိ မှန်းထားတယ်”ဟု ၎င်းက ပြောသည်။
ကိုဗစ်ကာကွယ်ဆေးထိုးသည့် ပြည်သူများ ပိုမိုများပြားလာသည့်အတွက် ကူးစက်ပြန့်ပွားမှုနှုန်းလည်း သိသိသာသာ လျော့ကျလာပြီဖြစ်ကြောင်း၊ ကာကွယ်ဆေးထိုးထားပြီးသူများသည်လည်း ကျန်းမာရေးဦးစီးဌာန၏ ညွှန်ကြားချက်များကို စနစ်တကျ လိုက်နာရမည်ဖြစ်ကြောင်း ၄င်းကဆက်ပြောသည်။
သို့ရာတွင် ယခင်ကာလတွင် ကာကွယ်ဆေးထိုးရန် စိုးရိမ်ကြောက်ရွံ့နေကြသူများရှိသော်လည်း ယခုအခါ ကာကွယ်ဆေးလာရောက်ထိုးသူ များပြားလာကြောင်း ကာကွယ်ဆေးထိုးနှံသည့်နေရာတွင် ကူညီပေးနေသူ ပရဟိတဝန်ထမ်းတစ်ဦးက ပြောသည်။
“အစကတော့ ကာကွယ်ဆေးထိုးဖို့ ဖုန်းဆက်ပေးတယ်။ လိုက်ပြောပေးတယ်ပေါ့နော်။ လာမထိုးကြဘူး။ ကြောက်ကြတာပေါ့နော်။ အခုတော့ တော်တော်များများ လာထိုးနေကြပြီ။ ဒုတိယအကြိမ်တွေလည်း ပြီးနေပြီ”ဟု ၎င်းက ပြောသည်။
ကာကွယ်ဆေးထိုးဆောင်ရွက်ရာ၌ စာရင်းကောက်ယူခြင်း၊ သွေးပေါင်ချိန်ခြင်း၊ ကိုယ်အပူချိန်တိုင်းခြင်း၊ Oxymeter တိုင်းခြင်း၊ ဆေးထိုးပြီး နာရီဝက် စောင့်ကြည့်ခြင်းများရှိကြောင်း၊ ယင်းသို့ ကာကွယ်ဆေးထိုးနှံရာတွင် မူဝါဒအားဖြင့် ကူးစက်မှုနှုန်းလျော့ကျရေး၊ သေနှုန်းလျော့ကျလာရန်နှင့် စီးပွားထိခိုက်မှု လျော့ချရေးအတွက် ကာကွယ်ဆေးထိုးရန် ဦးတည်အုပ်စု (၁၂) အုပ်စုကိုဦးတည်ထားကြောင်း သိရသည်။
ကျန်းမာရေးနဲ့ အားကစားဝန်ကြီးဌာန ဗဟိုကူးစက်ရောဂါတိုက်ဖျက်ရေးဌာန ညွှန်ကြားရေးမှူး ဒေါက်တာခင်ခင်ကြီးက “တတိယလှိုင်း အောက်ထိမကျသေးဘူးနော် မပေါ့ဆစေဖို့ သတိပေးလိုက်ပါတယ်
ကိုဗစ်စည်းကမ်းတွေလဲလိုက်နာရင်း တဖက်ကလဲ ကာကွယ်ဆေးထိုးဖို့အကျုံးဝင်သူတွေ အမြန်ဆုံးထိုးနှံပါ” ဟု ၄င်းကို ဖေ့ဘုတ်တွင် တိုက်တွန်းရေးသားထားသည်။ မွန်ပြည်နယ်တွင် အသက် ၁၈ နှစ်ပြည့် ကာကွယ်ဆေးထိုးနှံသင့်သူ ၁၇ သိန်းကျော်ရှိပြီး ပြီးခဲ့သည့် စက်တင်ဘာ ၁၅ ရက်နေ့အထိ လူဦးရေ ၁ သိန်းခွဲကာကွယ်ဆေး ၂ ကြိမ်ထိုးနှံခဲ့ပြီးဖြစ်ကြောင်း၊ ယခုအခါ လူဦးရေ ၁ သိန်းကို ကာကွယ်ဆေးဆက်လက်ထိုးနှံပေးလျက်ရှိရာ နှစ်ကုန်သည်အထိ လူဦးရေထက်ဝက်ခန့်အား ကာကွယ်ဆေးထိုးနှံပေးရန်စီစဥ်ထားကြောင်း ပြည်နယ် ပြည်သူ့ကျန်းမာရေးဌာနမှ သိရသည်။
