လုပ်ကြံခံသေဆုံးခဲ့သည့် ဘီးလင်းမြို့နယ် ပြည်ခိုင်ဖြိုးပါတီဥက္ကဋ္ဌ၏ ယောက်ဖဖြစ်သူ သေနတ်ဖြင့် ထပ်မံလုပ်ကြံခံရသေဆုံး

မွန်သတင်းအေဂျင်စီ (၂၀၂၁ စက်တင်ဘာ ၂၇)

လုပ်ကြံခံသေဆုံးခဲ့ရသည့် ဘီးလင်းမြို့နယ်၊ ပြည်ခိုင်ဖြိုးပါတီဥက္ကဌ၏ ယောက်ဖတော်စပ်သူ ဦးသန်းဝင်းထွန်း ယနေ့ (စက်တင်ဘာလ ၂၇ ရက်) နံနက်ပိုင်းတွင် သေနတ်ဖြင့် ထပ်မံလုပ်ကြံခံရပြီး သေဆုံးသွားကြောင်း စုံစမ်းသိရှိရသည်။

“သူ့အိမ်ရှေ့လမ်းထိပ်မှာရပ်နေတုန်းအပစ်ခံလိုက်ရတာ။ အရင်က သူ့​ ယောက်ဖ လုပ်ကြံခံရတယ်။ ၄ လအတိမှာ သူလည်း ထပ်လုပ်ကြံခံရတယ်။”ဟု ဒေသခံတစ်ဦးက ဆိုသည်။

ဘီးလင်းမြို့နယ် ပြည်ခိုင်ဖြိုးပါတီဥက္ကဋ္ဌ ဦးမြင့်ဆွေသည်လည်း ပြီးခဲ့သည့်မေလ ၂၇ ရက်နေ့က အလူးလေးကျေးရွာရှိ ကြက်မောက်ခြံသို့ သွားရာလမ်းခရီးတွင် သေနတ်ဖြင့် လုပ်ကြံခံရပြီးနောက် ၄ လအတိမှာ ၎င်း၏ ယောက်ဖဖြစ်သူ ဦးသန်းဝင်းထွန်း ထပ်မံလုပ်ကြံခံရပြီး သေဆုံးခဲ့ခြင်းဖြစ်သည်။

ဦးသန်းဝင်းထွန်းကို အမည်မသိလူတစ်စုကလာရောက်ပစ်ခတ်ခဲ့ပြီး ဆေးရုံသို့ပို့ဆောင်နေစဥ် ​သေဆုံးခဲ့ကြောင်း စုံစမ်းသိရှိရသည်။ 

အလားတူ ပြည်သူ့အကျိုးပြုကျောင်းသားများပါတီမှ မွန်ပြည်နယ်ဥက္ကဋ္ဌ ဖြစ်သူ ဦးတိုးနိုင် (ခ) ဦးရန်ရှင်းသည်လည်း စက်တင်ဘာ ၁၆ ရက် ညနေပိုင်းက ကျိုက်ထိုမြို့တွင် သေနတ်ဖြင့် ပစ်သတ်ခံရပြီး သေဆုံးခဲ့ရသည်။

ဖေဖော်ဝါရီက စစ်အာဏာသိမ်းမှုဖြစ်စဥ်အပြီး မွန်ပြည်နယ်အတွင်း ဘီးလင်း၊ ကျိုက်ထို၊ သထုံနှင့် ရေးမြို့နယ်တို့တွင် ပြည်ခိုင်ဖြိုးပါဝတီဝင်များ၊ ရပ်ကျေးအုပ်ချုပ်ရေးမှူးများနှင့် ရာအိမ်မှူးများ ဆက်တိုက်လုပ်ကြံခံနေရကြောင်း သတင်းများက ဖော်ပြနေသည်။