မွန်သတင်းအေဂျင်စီ (၂၀၂၁ မေ ၂၁)
ရေးမြို့နယ် လမိုင်းမြို့နှင့် မော့ကနင်ကျေးရွာရှိ အထက်တန်းကျောင်း ၂ ကျောင်းနှင့် လမိုင်းမြို့စီမံအုပ်ချုပ်ရေးအဖွဲ့ရုံးတို့တွင် မေလ ၂၀ ရက်နေ့ ညပိုင်းအချိန်က မိနစ်အနည်းငယ်စီခြား၍ ဗုံး ၃ လုံးပေါက်ကွဲခဲ့ပြီး လမိုင်းအထကတွင် မပေါက်ကွဲသေးသည့် လက်လုပ်ဗုံးတစ်လုံးကိုလည်း သက်ဆိုင်ရာမှ သိမ်းဆည်းရမိကြောင်း သိရသည်။
“အရင်ဦးဆုံး လမိုင်းအထကမှာပေါက်တယ် မြေကြီးတုန်ပြီး အသံအကျယ်ကြီးကြားရတယ်၊ အထက်တန်းကျောင်းကို ကျနော်တို့သွားကြည့်တဲ့အချိန်မှာ ရဲတွေလုံခြုံရေးတွေရောက်နေပြီ၊ မပေါက်ကွဲသေးတဲ့ လက်လုပ်ဗုံးတစ်လုံး တွေ့ရတယ်” ဟု ပေါက်ကွဲမှုအပြီး ဖြစ်စဉ်ကိုသွားရောက်လေ့လာသူ လမိုင်းမြို့ခံတစ်ဦးက ပြောသည်။
ပေါက်ကွဲမှုကြောင့် လမိုင်းအထက်တန်းကျောင်း ပြူတင်းပေါက်တံခါး ၃ ချပ်ပွင့်ထွက်၍ မှန်ဘောင်များကွဲပြီး ရေပိုက်ပေါက်သွားကြောင်း ၎င်းက ဆိုသည်။
၎င်းက “နောက်တော့ မြို့အုပ်ချုပ်ရေးမှူးရုံးမှာ ဗုံးတစ်လုံးထပ်ပေါက်ပြန်တယ် တံခါးပွင့်ထွက်သွားတယ် ရုံးကာထားတဲ့ သံချောင်းတွေကွေးကောက်သွားတယ်၊ နောက်တစ်ခါ မော့ကနင်အထက်တန်းကျောင်းမှာ တစ်လုံးထပ်ပေါက်ပြန်တယ်၊ အနောက်ဖက်ခြမ်း ကျောင်းအဝင်ဝနေရာ ခြံတံခါးမှာဗုံးတပ်ထားတာလို့ ယူဆရတယ်၊ ပေါက်ကွဲမှုနဲ့အတူ ကျောင်းဆောင်အပေါ်ထပ် လေကာမှန် ၄ ချပ်၊ အောက်ထပ် ၂ ချပ်ကွဲသွားတယ်” ဟု ဆက်ပြောသည်။
သို့ရာတွင် အဆိုပါ ပေါက်ကွဲမှုဖြစ်စဉ်များကြောင့် မည်သူတစ်ဦးတစ်ယောက်မှ ထိခိုက်ဒဏ်ရာရရှိသည်ကို မကြားသိရကြောင်း ၎င်းက ဆိုသည်။
အလားတူ ရေးမြို့နယ် ကျောင်းရွာ ကျေးရွာအုပ်ချုပ်ရေးမှူးရုံးတွင်လည်း မေလ ၁၉ ရက်နေ့ ညဦးပိုင်းက ဗုံးပေါက်ကွဲသဖြင့် အုပ်ချုပ်ရေးမှူးအပါအဝင် လူလေးယောက် ထိခိုက်ဒါဏ်ရာ ရရှိခဲ့ပြီး မော်လမြိုင်စစ်ဆေးရုံသို့ ပို့ဆောင်ခဲ့ရသည်။
