ဗညားပိုင် (၁၆ ဖေဖော်ဝါရီ ၂၀၂၁)
စစ်အာဏာသိမ်းမှုဖြစ်ပေါ်ပြီးနောက်ပိုင်း မြို့ပေါင်း ၉၀ ကျော်ခန့်တွင် ဖေဖော်ဝါရီ ၈ ရက်နေ့က ကာဖျူး-ပုဒ်မ ၁၄၄ ညမထွက်ရအမိန့် ထုတ်ပြန်ထားသဖြင့် ကုန်တင်ကားများ ညပိုင်းသွားလာမရဖြစ်နေပြီး ကုန်ပစ္စည်းပို့ဆောင်ရေး အခက်အခဲဖြစ်ပေါ်လာကြောင်း ကုန်တင်ကားမောင်းသူတစ်ဦးက မွန်သတင်းအေဂျင်စီသို့ ပြောသည်။
မော်လမြိုင်-ရန်ကုန်သို့ ကုန်တင်ကားမောင်းသူတစ်ဦးက “ခုက ၈ နာရီညမထွက်ရဆိုတော့ အရမ်းစောတာပေါ့နော်၊ ၈ နာရီကျတော့ ကုန်တင်တာတို့ ပြီးတော့ တခြားနေရာတွေမှာ ကုန်မရတော့ စောင့်ရတာတို့ကျတော့ ဒီမှာပဲ မိုးချုပ်သွားတယ်။ တခါတလေကျ ၈ နာရီက ဒီမှာပဲဖြစ်သွားတော့ မောင်းလို့မရတော့ဘူး အဲဒါကြောင့် အခက်အခဲဖြစ်တာပေါ့” ဟု ဆိုသည်။
ကုန်ပစ္စည်းသယ်ယူပို့ဆောင်နေသည့်ကားအသင်းတွင် မော်လမြိုင်မှ ရန်ကုန်သို့ တစ်နေ့လျှင်ကုန်တင်ကား ၄ စီးထွက်သည့်အနက် လတ်တလော နိုင်ငံရေးအခြေအနေကြောင့် တစ်နေ့ ၂ စီးသာထွက်နိုင်တော့ကြောင်း ၎င်းကဆက်ပြောသည်။
လူ(၅)ဦး သို့မဟုတ် (၅)ဦးထက်ပိုသော လူများသည့်လမ်းမကြီးများ အများပြည်သူသွားရာလမ်း၊ လမ်းသွယ်၊ လမ်းကြား၊ ဥယျာဉ် သို့မဟုတ် အများပြည်သူနှင့်ဆိုင်သော နေရာများတွင် စုဝေးခြင်းမပြုရန်နှင့် ည(၈)နာရီအချိန်မှ မနက်(၄)နာရီအချိန်အတွင်း ညမထွက်ကြရန် သက်ဆိုင်ရာရပ်ကွက်ကျေးရွာအသီးသီးတွင် အသံချဲ့စက်များဖြင့် နေ့စဉ်လှည့်လည်အသိပေးနေကြောင်း သတင်းရရှိသည်။
“အရင်အမိန့်မထုတ်ခင်ကဆိုရင် ဒီကနေပစ္စည်းတွေတင်ပြီးတော့ ည ၉ ဖြစ်ဖြစ် ၁၀ နာရီဖြစ်ဖြစ် မောင်းသွားတော့ စစ်တောင်းလောက်ရောက်ရင် အိပ်လိုက်တယ်၊ မနက်ကျရင် ထမောင်းတယ်။ တခါတလေ ဒီဘက်မှာစောတယ်ဆိုရင် ရန်ကုန်ထိ အရောက်မောင်းတယ်၊ ခုကျတော့ အဲ့လိုမောင်းလို့မရတော့ဘူး” ဟု အဆိုပါ ကုန်တင်ကားမောင်းသူက ဆက်ပြောသည်။
ထို့အပြင် ညမထွက်ရအမိန့်ကြောင့် မွန်ပြည်နယ်အတွင်းရှိ စားသောက်ဆိုင်၊ လမ်းဘေးဆိုင်များသည်လည်း ည ၈ နာရီ မတိုင်မီအချိန်၌ ဆိုင်များပိတ်သိမ်းပြီး နေအိမ်သို့အရောက်ပြန်ကြကြောင်း သိရသည်။
လတ်တလောဖြစ်ပေါ်နေသော နိုင်ငံရေးအခြအနေကြောင့် ပုဒ်မ ၁၄၄ ညမထွက်ရအမိန့်ထုတ်ပြန်ထားသော်လည်း တပ်မတော်အာဏာသိမ်းမှုကို လက်မခံနိုင်သောကြောင့် နိုင်ငံတဝန်းရှိ မြို့ပေါ်အသီးသီး၌ လူထုဆန္ဒပြမှုများ နေ့စဉ်ဆက်တိုက် ဖြစ်ပေါ်လျှက်ရှိသည်။
အလားတူ တစ်နိုင်ငံလုံးအနှံ့ CDM လှုပ်ရှားမှုကြောင့် ပုဂ္ဂလိကဘဏ်များ ပိတ်ထားရပြီး ငွေကြေးစီးဆင်းမှုများအပိုင်းတွင် အခက်အခဲများဖြစ်ပေါ်နေကြောင်း သိရသည်။
