ယဉ်ထောမွန် (၂၇ ဇန်နဝါရီ ၂၀၂၁)
မွန်ပြည်နယ်အတွင်းရှိ ကျန်းမာရေးဝန်ထမ်း ၃၈၀၀ နီးပါးခန့်ကို သက်ဆိုင်ရာမြို့နယ်ဆေးရုံများ၌ ကိုဗစ်-၁၉ ကာကွယ်ဆေးကို ယနေ့တွင် စတင်ထိုးနှံခဲ့ကြောင်း မွန်ပြည်နယ်ကျန်းမာရေးဦးစီးဌာန ဒုဦးစီးမှုး ဒေါက်တာဝတ်မှုံက ပြောသည်။
“နောက်ထပ် ၁ ရက်လောက် ထပ်ထိုးရင်တော့ အားလုံးပြီးလောက်မယ်၊ ကာကွယ်ဆေးကလည်း လူဦးရေ ၄၀၀၀ နီးပါစာလောက်ပဲရထားတော့ ကျန်းမာရေးဝန်ထမ်းတွေအတွက် ကွက်တိဖြစ်နေတော့ စေတနာ့ဝန်ထမ်းတွေက ကျန်နေတာပေါ့၊ ဒါအတွက်ကိုလည်း ကျန်းမာရေးနှင့် အားကစားဝန်ကြီးဌာန အမြန်ဆုံးဆောင်ရွက်နေပါတယ်၊ အားမငယ်ကြပါနဲ့”ဟု ဒေါက်တာဝတ်မှုံက ဆိုသည်။
သံဖြူဇရပမြို့နယ်အနေဖြင့် ကျန်းမာရေးဝန်ထမ်းစုစုပေါင်း ၂၁၅ ယောက်အနက် ယနေ့တွင် အယောက် ၁၀၀ နီးပါးထိုးနှံခဲ့ကြောင်း၊ ခွဲတမ်းအနေဖြင့် လူ ၁၀ ဦးထိုးနှံနိုင်သည့် ဆေး၂၄ လုံးရရှိထားကြောင်း သံဖြူဇရပ်မြို့နယ် ပြည်သူ့ကျန်းမာရေး ဦးစီးဌာနမှုး ဒေါက်တာမင်းသန့်ဇင်က မွန်သတင်းအေဂျင်စီသို့ ပြောသည်။
“ဆေးက တစ်ကြိမ်ထိုးထားပြီးရင် ၅၀ ရာခိုင်နှုန်းလောက်ကာကွယ်နိုင်တာပေါ့ နှစ်ကြိမ်ထိုးပြီးရင် ၉၅ ရာခိုင်နှုန်းလောက်က ကာကွယ်နိုင်တယ်ဆိုတော့ ဘာမှတော့ စိတ်ပူဆရာမလိုတော့ဘူး၊ ထိုးနှံခွင့်ရလို့လည်း အရမ်းဝမ်းသာတယ်၊ လှုဒါန်းပေးတဲ့ အိန္ဒိယနိုင်ငံကိုလည်း ကျေးဇူးတင်တယ်”ဟု ဒေါက်တာမင်းသန့်ဇင်က ဆိုသည်။
ကိုဗစ်-၁၉ကာကွယ်ဆေးထိုးနှံခြင်းကို (၂၇-၁-၂၀၂၁)တွင် ကျန်းမာရေးဝန်ထမ်းများနှင့် စေတနာ့ဝန်ထမ်းများကိုလည်းကောင်း၊ (၂၉-၁-၂၀၂၁)တွင် ပြည်သူ့လွှတ်တော် ကိုယ်စားလှယ်များကိုလည်းကောင်း၊ (၃၀-၁-၂၀၂၁)ရက်နေ့တွင် အမျိုးသားလွှတ်တော်ကိုယ်စားလှယ်များနှင့် တပ်မတော်သားလွှတ်တော်ကိုယ်စားလှယ်များကိုလည်းကောင်း ထိုးနှံသွားမည်ဖြစ်ကြောင်း ကျန်းမာရေးနှင့်အာကစားဝန်ကြီးဌာနမှ ထုတ်ပြန်ထားသည်။
“ပထမဆုံးထိုးပေးတဲ့အုပ်စုဟာ ပထမအကြိမ်ထိုးပြီးသွားတာနဲ့ ပြီးသွားပြီးဆိုတော့ အေးအေးဆေးနေလို့မဖြစ်ပါဘူး။ ကျွန်မတို့ကျန်းမာရေးနှင့် အားကစားဝန်ကြီးဌာနကနေ သတ်မှတ်ထားတဲ့ စည်းမျဉ်းစည်းကမ်းတွေအတိုင်း ဆက်ပြီးတော့ မိမိကိုယ်ကို ကာကွယ်သွားရမှာ ဖြစ်ပါတယ်။ မျက်နှာဖုံးတပ်ရမယ်၊ လက်ဆေးရမယ်၊ လူစုလူဝေးကြားထဲမှာမသွားရဘူး၊ ခပ်ခွာခွာနေရမယ် စသဖြင့်ပေါ့။ ဒီအခြေခံစည်းမျဉ်းစည်းကမ်းတွေကို ဆက်ပြီးတော့လိုက်နာသွားဖို့လိုပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် ၂၁-၁-၂၀၂၁ ရက်နေ့က ပြည်သူများသို့အစီရင်ခံတင်ပြရာတွင် ပြောကြားသည်။
မွန်ပြည်နယ်အတွက် ကိုဗစ်-၁၉ကာကွယ်ဆေးကို မော်လမြိုင်မြို့ရှိ ပြည်နယ်ပြည်သူ့ကျန်းမာရေးဦးစီးဌာနရုံးသို့ ဇန်နဝါရီလ ၂၆ ရက်နေ့ ည ၁၁ ခွဲခန့်တွင် ရောက်ရှိခဲ့ပြီး အိန္ဒိယနိုင်ငံမှ မြန်မာနိုင်ငံသို့ ပထမဦးဆုံး ပေးပို့လှုဒါန်းသည့် ကိုဗစ်-၁၉ ကာကွယ်ဆေး ၁ ဒဿမ ၅ သန်းကို ဇန်နဝါရီ ၂၂ ရက်နေ့က လက်ခံရရှိခဲ့ခြင်း ဖြစ်သည်။
