မင်းပိုင်(အောက်တိုဘာ ၉)
တနင်္သာရီတိုင်းဒေသကြီး၊ ရေဖြူမြို့နယ် အလယ်စခန်းကျေးရွာအနီး ချိုချဉ်တောင်နေရာတဝိုက်ရှိ ခြံတစ်ခုတွင် အောက်တိုဘာလ ၈ ရက်နေ့ မွန်းလွဲပိုင်းအချိန်က မြေမြှုပ်မိုင်းတစ်လုံးပေါက်ကွဲမှုကြောင့် ဒေသခံတစ်ဦး ခြေထောက်ထိခိုက်ဒဏ်ရာ အနည်းငယ်ရရှိခဲ့သည်။
အဆိုပါ အလယ်စခန်းကျေးရွာအနီးရှိ ချိုချဉ်တောင်၊ ကြောင်လျှာကွင်းနေရာတဝိုက် NCA လက်မှတ်ရေးထိုးထားကြသော မွန်ပြည်သစ်ပါတီ NMSP နှင့် ကရင်အမျိုးသားအစည်းအရုံး KNU တို့ လှုပ်ရှားနယ်မြေတွင် ယမန်နှစ်မှစတင်၍ မြေမြှုပ်မိုင်း ၆ ကြိမ်ထက်မနည်းပေါက်ကွဲသဖြင့် ဒေသခံများထိခိုက်ဒဏ်ရာရရှိခဲ့သည့်ဖြစ်စဉ်များကို တနင်္သာရီတိုင်းဒေသကြီး ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-S မှ တစုံတရာ အရေးယူဆောင်ရွက်ခြင်းမရှိဟု စုံစမ်းသိရှိရသည်။
အလယ်စခန်းကျေးရွာအုပ်ချုပ်ရေးမှူး နိုင်တင်စန်းက “ဒါက လက်လုပ်မိုင်းပဲ အခု ပေါက်ကွဲတဲ့မြေမြှုပ်မိုင်းက လူမှာပြတ်ရှထိခိုက်မှု အကြီးအကျယ်မဖြစ်ခဲ့ဘူး၊ ခြေထောက်ကျဉ်တယ်၊ ရောင်ရမ်းတယ်၊” ဟု ပြောသည်။
အလယ်စခန်းကျေးရွာအနီးပတ်ဝန်းကျင်တဝိုက်တွင် လက်သည်မပေါ်သော မြေမြှုပ်မိုင်းပေါက်ကွဲနေသည့်ဖြစ်စဉ်များကို ကျေးရွာအုပ်ချုပ်ရေးမှုးတစ်ဦးအနေဖြင့် များစွာ စိတ်ထိခိုက်ရကြောင်း၊ ဖြစ်စဉ်ကို သက်ဆိုင်ရာအစိုးရတာဝန်ရှိသူများထံ တင်ပြသည့်အခါ ညှိနှိုင်းဆောင်ရွက်မည်ပေးမည်ဟုသာ ပြောဆိုခဲ့ပြီး အရေးယူဆောင်ရွက်ခဲ့ခြင်းမရှိကြောင်း ၎င်းကဆိုသည်။
ယမန်နေ့ မွန်းလွဲ ၃ နာရီအချိန်ခန့်တွင် ကွမ်းသီးခြံတစ်ခြံ၌ ဝဥတူးဖော်သည့် ညီအစ်ကိုယ်နှစ်ဦးအနက် ညီဖြစ်သူ နိုင်မွန်ချမ်း မြေမြှုပ်မိုင်း နင်းမိပေါက်ကွဲသဖြင့် ခြေထောက်ဒဏ်ရာရရှိခြင်း ဖြစ်သည်။
ဒဏ်ရာရရှိသူ၏ အစ်ကိုယ်ဖြစ်သူ နိုင်ရှန်က “ပေါက်ကွဲသံတစ်ခုကြားလိုက်တာနဲ့ သူ့ကိုလှည့်ကြည့်တော့ လဲကျနေပြီ၊ သူ့ဘယ်ဖက်ခြေထောက်မှာ ကျိန်းတယ်လို့ပဲ ပြောတယ်” ဟု မွန်သတင်းအေဂျင်စီကို ပြောသည်။
အဆိုပါ မြေမြှုပ်မိုင်းနင်းမိသည့် နိုင်မွန်ချမ်း၏ ဘယ်ဖက်ခြေထောက် ဖူးရောင်လာသည့်အတွက် ည ၇ နာရီခန့်အချိန်တွင် ရေးမြို့ ပြည်သူ့ဆေးရုံကြီးသို့ သွားရောက်ပြသခဲ့ကြောင်း ၎င်းကဆက်ပြောသည်။
လက်ရှိ အခြေအနေတွင် မိုင်းအရေး ဆောင်ရွက်သူများသည် အစိုးရထံမှသော် လည်းကောင်း၊ တိုင်းရင်းသားလက်နက်ကိုင်များထံမှ သော်လည်းကောင်း၊ မိုင်းနေရာ သတ်မှတ်ခြင်း၊ ရှင်းလင်းခြင်းများအတွက် ခွင့်ပြုချက် တစ်စုံတစ်ရာ မရသေးကြောင်းလည်း မြေမြှုပ်မိုင်း အသုံးပြုမှု ပိတ်ပင်တားမြစ်ခြင်း နိုင်ငံတကာ စည်းရုံးလှုံ့ဆော်ရေးအဖွဲ့ ICBL ၏ မြေမြှုပ်မိုင်းစောင့်ကြည့် လေ့လာရေး မြန်မာနိုင်ငံအစီရင်ခံစာတွင် ရေးသား ဖော်ပြထားသည်။
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် NCA အရ ပြည်တွင်းငြိမ်းချမ်းရေးဖော်ဆောင်ရာတွင် အန္တရာယ်တစ်ခုဖြစ်သည့် မြေမြုပ်မိုင်းများထပ်မံပြုလုပ်ခြင်းကို တားမြစ်ထားသလို မိုင်းကင်းစင်ရေးနယ်မြေများသတ်မှတ်ဖော်ဆောင်ရန်လည်း သဘောတူညီထားသည်။
