မွန်သတင်းအေဂျင်စီ(မေ ၁၇)
ပြည်ထောင်စုရွေးကောက်ပွဲကော်မရှင်က မွန်ညီညွတ်ရေးပါတီ တည်ထောင်ဖွဲ့စည်းခွင့်ပြုကြောင်း ယနေ့တွင် အကြောင်းကြားစာပေးပို့ခဲ့သည်ဟု ပါတီ၏ တွဲဖက်အတွင်းရေးမှူး(၁) နိုင်လယိတမက မွန်သတင်းအေဂျင်စီသို့ ပြောသည်။
“ဒီနေ့ညနေ ၄ နာရီမတိုင်ခင်လောက်မှာ ပြည်ထောင်စုရွေးကောက်ပွဲကော်မရှင်က ကျနော်တို့ပါတီဗဟိုဌာနချုပ်ကို အီးမေးလ်နဲ့အကြောင်းကြားလာတယ်၊ မွန်ညီညွတ်ရေးပါတီတည်ထောင်ဖွဲ့စည်းခွင့် အကြောင်းကြားစာ ပေးပို့လာတယ်၊ မူရင်းစာကိုတော့ စာတိုက်ကနေပေးပို့ထားပြီးလို့ ဆိုတယ်” ဟု နိုင်လယိတမက ဆိုသည်။
၂၀၁၉ ခုနှစ် မေလ ၁၆ ရက်နေ့တွင် ကျင်းပသော ပြည်ထောင်စုရွေးကောက်ပွဲကော်မရှင်စုံညီအစည်းအဝေး အမှတ်စဉ် (၁၆/၂၀၁၉) က လိုအပ်သည်များကို စိစစ်ပြီးဖြစ်၍ မွန်ဒေသလုံးဆိုင်ရာဒီမိုကရေစီပါတီ နှင့် မွန်အမျိုးသားပါတီ Mon National Party ပူးပေါင်း၍ မွန်ညီညွတ်ရေးပါတီ Mon Unity Party အဖြစ် တည်ထောင်ဖွဲ့စည်းခွင်ပြုရန် လျှောက်ထားချက်ကို ခွင့်ပြုကြောင်း ဆုံးဖြတ်ခဲ့သည်ဟု အကြောင်းကြားစာတွင် ပါရှိသည်။
နိုင်လယိတမက “ နိုင်ငံရေးပါတီဥပဒေအရဆိုလို့ရှိရင် ပေါင်းစည်းခွင့်ရပြီးရင် တစ်လအတောအတွင်းမှာ ပါတီမှတ်ပုံတင်ခွင့် နောက်ထပ်တဖန် လျှောက်တင်ဖို့လိုအပ်ပါတယ်၊ ဒီအတွက် လိုအပ်တဲ့စာရွက်စာတမ်းတွေလည်း ကျနော်တို့မှာ အဆင်သင့်ရှိပါတယ်၊ မကြာခင်ရက်ပိုင်းမှာ တင်ဖြစ်ပါမယ်” ဟု ဆက်ပြောသည်။
မွန်အမျိုးသားပါတီ MNP၊ မွန်ဒေသလုံးဆိုင်ရာဒီမိုကရေစီပါတီ AMDP၊ မွန်ကိုယ်စားပြုပါတီ တည်ထောင်လိုသူများနှင့် အရပ်ဖက်မွန်လူမှုအဖွဲ့အစည်းများဖြင့် လက်ရှိပေါင်းစပ်ဖွဲ့စည်းထားသည့် မွန်ညီညွတ်ရေးပါတီတွင် ဗဟိုကော်မတီဝင် စုစုပေါင်း ၁၄၀ ဦးရွေးချယ်ထားကြောင်း သိရသည်။
Photo- မွန်ညီညွတ်ရေးပါတီ ပေါင်းစည်းတည်ထောင်ခွင့်
အကြောင်းကြားစာ(Copy)
