ရေးမြို့နယ်အတွင်းရှိ မွန်ပြည်သစ်ပါတီထိန်းချုပ်နယ်မြေအတွင်း အင်အား ၅၀ နီးပါးခန့်ရှိ သစ်မှောင်ခိုဂိုဏ်းတစ်ခုကို မွန်ပြည်သစ်ပါတီတပ်ဖွဲ့များက ဇန်နဝါရီ ၁၂-၁၃ ရက်နေ့များတွင် ဖမ်းဆီးထိန်းသိမ်းရမိကြောင်းမွန်ပြည်သစ်ပါတီဗဟိုမှ သိရသည်။
၄င်းသစ်မှောင်ခိုဂိုဏ်းမှ ဘူဒိုဇာတစ်လုံး၊ ဆင်များ၊ လက်ကိုင်သစ်ခွဲလွှစက်များနှင့်အတူ သစ်နှင့် ခွဲသားများ၊ ခုတ်လှဲပြီးသစ်အချို့ ဖမ်းဆီးရမိသည်ဟု မွန်ပြည်သစ်ပါတီ ထိပ်ပိုင်းခေါင်းဆောင်တစ်ဦးက ပြောသည်။
အဆိုပါ ဖမ်းဆီးရမိထားသည့် သစ်မှောင်ခိုဂိုဏ်း အလုပ်သမားများ၏ ထုတ်ဖော်ပြောဆိုချက်အရ ၄င်းတို့သည် တောင်ငူဒေသနှင့် ဧရာဝတီတိုင်းဒေသကြီးမှ လာရောက်ကြသူများဟု သိရပြီး သစ်မှောင်ခိုခေါင်းဆောင်နှင့် အဖွဲ့ကိုလည်း ဆက်လက်ရှာဖွေဖော်ထုတ်သွားမည်ဟု ၄င်းမွန်ပြည်သစ်ပါတီခေါင်းဆောင်က ဆိုသည်။
ရေး-ထားဝယ်အဝေးပြေးမော်တော်ကားလမ်းအရှေ့ဖက်ခြမ်း မွန်ပြည်သစ်ပါတီ၏ဗဟိုဌာနချုပ်ဝန်းကျင်ဒေသတဝိုက် မာန်အောင်တောင်၏အရှေ့ဖက် သစ်တောဧရိယာများအတွင်း ၂၀၁၀ ခုနှစ်ကတည်းက မွန်ပြည်သစ်ပါတီမှ သစ်ထုတ်လုပ်ခွင့် ပိတ်ပင်တားမြစ်ခဲ့ကြောင်း သိရသည်။
ထို့အတူ မြန်မာနိုင်ငံတွင် တရားဝင်ရော၊ တရားမဝင်ပါ သစ်ခုတ်လှဲသည့်အတွက် သစ်တောပြုန်းတီးကာကွယ်နိုင်ရန် NLD အစိုးရသစ် လက်ထက်၌ သစ်ခုတ်လှဲခွင့်ကို ယာယီတားမြစ်ထားသည်။
