မွန်စာပေများကို မြှင့်တင်ရေးနှင့် မွန်ကလောင်ရှင်များအသင်းဖွဲ့စည်းရန်အတွက် လာမည့်ဒီဇင်ဘာလ ပထမအပတ်အတွင်း ကမာဝက်မြို့၊ ဓာတ်တော်ကျောင်းတိုက်တွင် မွန်စာပေညီလာခံကို (၃) ရက်ကြာ ကျင်းပမည်ဖြစ်ကြောင်း မွန်ကလောင်ရှင်များအသင်း(ယာယီ)မှ သိရသည်။
“အဓိကတော့ ကျွန်တော်တို့ မွန်ကလောင်ရှင်များအသင်းကို ဖွဲ့စည်းဖို့ပဲ ၊ အခုက ယာယီပဲ ဖွင့်ထားတယ်လေ ဒီမွန်စာပေညီလာခံ ကျင်းပတဲ့ နောက်ဆုံးနေ့မှာဆိုရင် ဖွဲ့စည်းပုံကို ဆွေးနွေးပြီးတော့ မွန်ကလောင်ရှင်များအသင်းကို ဖွဲ့စည်းမည်” ဟု မွန်ကလောင်ရှင်များအသင်း(ယာယီ) အတွင်းရေးမှူး နိုင်ဝဏ္ဏမာန်က ပြောသည်။
“ဦးဆောင်ဆွေးနွေးသူတွေကတော့ ကျွန်တော်တို့ ရည်ရွယ်ထားတာပဲ ရှိသေးတယ် သူတို့လက်ခံလားမခံလားတော့ မသိဘူး၊ နိုဝင်ဘာ ၇/၈ လောက်ဆိုရင် ကမာဝက်၊ ဓာတ်တော်ကျောင်းမှာ ကျွန်တော်တို့ အစည်းအဝေးလုပ်ဖို့ ရှိတယ်၊ အဲအချိန်ကျမှ သေချာမယ်” ဟု မွန်ကလောင်ရှင်များအသင်း(ယာယီ) ဥက္ကဋ္ဌ နိုင်အောင်ဂျနဲ့က ဆိုသည်။
မွန်ကလောင်ရှင်များအသင်း(ယာယီ)ကို ပြီးခဲ့သည့် ဇန်နဝါရီလ ၃၀ ရက်နေ့က ဖွဲ့စည်းခဲ့ပြီး အောက်တိုဘာလ ၁၂ ရက်နေ့က ကမာဝက်မြို့ ဓါတ်တော်ကျောင်းတိုက်၌ ပြုလုပ်သည့် အစည်းအဝေးတွင် မွန်စာပေညီလာခံတရပ်ကျင်းပရန် ဆုံးဖြတ်ထားခြင်း ဖြစ်သည်။
